Matiu 21
21
Ọbọbọ I Ru Nẹ Ne A Si La E Jerusalẹm
(Mak 11:1-11; Luk 19:28-40; Jọn 12:12-19)
1Iran ghi bu Jerusalẹm iran keghi do sẹ Bẹtfag vbe Oke Ọliv. Evba ọre Jesu ke gie eva vbe uwu avbe erhuanegbe ẹre ke odaro. 2Ọ tama iran wẹẹ, “Wa gha rrie ẹvbo ne ọ rre odaro uwa na. Wa gha miẹn vbe ọwarọkpa ekẹtẹkẹtẹ ne a dere ke ẹe kevbe ovbi ẹre. Wa rhan iran viọ bu mwẹ gha dee. 3Ọmwa ne ọ rhirhi gu uwa guan, wa tama rẹn wẹ, ‘Nọyaẹnmwa mwẹ emwi ne ọ ra ya iran ru.’ Ọ gha gie iran gha dee ọwarọkpa.”
4Ọna sunu ne a ya mu ẹmwẹ ne akhasẹ tae sẹ wẹẹ:
5“Wa khama Zaiọn ne okpẹvbo,
ọba ruẹ bu ruẹ dee nian.
Ọmẹhẹ ne ọ hin ekẹtẹkẹtẹ,
ọ hin ekẹtẹkẹtẹ ne aranmwẹ ne a ya kun ihẹ
ke ovbi ekẹtẹkẹtẹ ne sọguọsọguọ.”
6Avbe erhuanegbe keghi gele gha khian ya ru vbene ọ gie iran. 7Iran keghi mu ekẹtẹkẹtẹ nii vbe ovbi ẹre rre. Iran wa ukpọn yan iran, Jesu keghi tota yan iran. 8Emwa ni bun keghi wa ukpọn iran ye odẹ, emwa ọvbehe keghi vbe giagia abọ erhan, iran wa ehia ye odẹ. 9Avbe emwa ni ke odaro ne Jesu kevbe ni rre ọre odieke keghi tọn urhu mu kha wẹẹ, “Urhomwẹ nọ ne ovbi e Devid. Afiangbe Osanobua nọ ne ọmwa ne ọ dee vbe eni Nọyaẹnmwa, Uyi nọ ne Osanobua.”
10Ugbẹn vbe Jesu ghi wa la ore Jerusalẹm, ẹvbo ni hia keghi wa mu rueghe. Emwa hia keghi nọ wẹẹ, “Gha ọ na khin?” 11Iran keghi wanniẹn wẹẹ, “Ọ na ọrọre Jesu ne akhase ovbi e Nazarẹt ne Galili.”
Jesu La Uwu Ọgua Osa
(Mak 11:15-19; Luk 19:45-48; Jọn 2:13-22)
12Jesu keghi la uwu Ọgua Osa, ọ keghi khulo iran ni khiẹn kevbe ni dẹ ladian vbe Ọgua Osa. Ọ keghi ya eteburu iran ni rọ igho uhunmwu rhu kevbe ukhuerhe iran ni khiẹn elikhukhu. 13Ọ tama iran wẹẹ, “A gbẹn ọẹn ye uwu ebe wẹẹ Osanobua khare wẹẹ, ‘Owa erhunmwu ọre a gha tie owa mwẹ?’ Sokpan wa ya ẹe khian ẹgun oyi!”
14Avbe uke kevbe arọe keghi bu ẹre la uwu Ọgua Osa, ọ keghi sinmwi iran hia. 15Ugbẹn vbe avbe igiohẹn kevbe iran ni ma emwa Uhi ghi miẹn emwi ọyunnuan ne ọ ru deba avbe ibiẹka nọ go kevbe ni wee vbe uwu Ọgua Osa wẹẹ, “Uyi nọ ne ovbi e Devid.” 16Iran tama Jesu wẹẹ, “Wẹ họn ẹmwẹ ne iran ta yi?” Jesu wanniẹn tama iran wẹẹ, “I wa họn ẹsẹse. Wa ma he tie ebe ne ọ khare wẹẹ, ‘Wa ma ibiẹka kevbe emobọ ẹmwẹ urhomwẹ ne ọ gbae.’ ”
17Jesu keghi sẹ iran rae gha rrie Bẹtani, ọ kegha rre evba vbe asọn nii hia.
Jesu Fi Erhan Ohọ Unu
(Mak 11:12-14, 20-24)
18Jesu ghi dọlegbe die ore ẹvbo vbe ẹdẹ ne ogieva, ohanmwẹ kegha gbẹe. 19Rẹn keghi bẹghe erhan ohọ ọkpa vbe ọkpẹn odẹ. Sokpan ọ ma miẹn emwi rhọkpa vbe uhunmwu ẹnrẹn gberra ebe. Rhunmwuda ọnii Jesu tama erhan ohọ nii wẹẹ, “U i ghi dọlegbe mọ ọvbehe.” Erhan ohọ ni keghi kaka ọwarọkpa nii.
20Unu keghi yan avbe erhuanegbe vbe iran miẹn emwi na. Iran nọ rẹn wẹẹ, “Vbọzẹ ne erhan ohọ ni na wa kaka ọwarọkpa vberriọ yi?”
21Jesu wanniẹn tama iran wẹẹ, “Ne I tama uwa, a deghẹ uwa yayi vbe ne a i na biro eva, wa gha sẹtin ru egbe emwi ne I ru erhan ohọ na re, vbe ẹmwata wa gha sẹtin khama oke wẹẹ, ‘Vbọ uhe ne u ya werriẹ fi uwu okun,’ ọ ghi gha ye erriọ. 22Deghẹ wa yayi, emwi ne uwa rhirhi nọọn, ọ gha sẹ uwa obọ.”
Inọta Vbekpa Asẹ Ọghe Jesu
(Mak 11:27-33; Luk 20:1-8)
23Jesu keghi dọlegbe la Ọgua Osa, ugbẹn vbe ọ ghi ma emwa emwi, avbe igiohẹn kevbe eniwanrẹn avbe Ju bu ẹre rre do nọ rẹn wẹẹ, “De asẹ ne u mwẹ ne u ya ru avbe emwi na, gha ọ rhie asẹ nu uẹn?”
24Jesu wanniẹn tama iran, “I gha nọ uwa ọta ọkpa kẹkan wa gha rhie ewanniẹn mẹ, I gha tama uwa asẹ ne I mwẹ ne I ya ru emwi na hia. 25De ehe ne asẹ ne Jọn ya samẹ ke rre yi? Obọ Osanobua ra obọ ọmwa?” Iran kegha mu ẹmwẹ na yo mu uẹn rre wẹẹ, “Vbe a ra tae hẹ yi? Ma gha kha wẹẹ obọ Osanobua, ọ gha nọ emwi ne ọ ghi zẹ ne ima ma na ya e Jọn yi. 26Sokpan ma gha kha wẹẹ obọ ọmwa nọ, a ma rẹn emwi ne iran na gha ru rhunmwuda iran hia wa kha ighẹ akhasẹ ẹmwata ọre Jọn khin.” 27Rhunmwuda ọnii, iran wanniẹn tama Jesu wẹẹ, “Ma ma rẹn.” Rẹn kevbe tama iran wẹẹ, “Mẹ i vbe tama uwa khekherriọ asẹ ne I ya ru avbe emwi na.
Itan Emọ Ikpia Eva
28“Vbe uwa a ro ẹmwẹ na hẹ? Okpia ọkpa kegha mwẹ emọ ikpia eva. Ọ keghi ya tama nọdiọn wẹẹ, ‘Ovbi mwẹ, ya winna vbe, ugbo emwiokọ ẹrẹna.’ 29Ọ wanniẹn wẹẹ, ‘I i sẹtin yo.’ Sokpan, vbe okiekie ẹre, ọ fi ekhọe werriẹ, ọ na gha khian. 30Erha iran keghi vbe ya tama nọkpa vberriọ zẹẹ. Rẹn keghi wanniẹn wẹẹ, ‘I họn ẹn evbavba.’ Sokpan ọ ma yo. 31Vbe uwu iran eva na, gha ọ ru emwi ne erha ẹe ho vbọ?” Iran wanniẹn wẹẹ, “Nọdiọn nọ.” Jesu wanniẹn tama iran wẹẹ, “Ne I tama uwa, avbe iran ni koko igho uhunmwu kevbe avbe igberagia ọre ọra ka la arriọba Osanobua khẹ uwa. 32Rhunmwuda, Jọn ne Ọsamẹ rre do ma uwa odẹ ẹmwata ne uwa gha la, wa ma ya ẹe yi. Sokpan, iran ni koko igho uhunmwu kevbe avbe igberagie keghi ya ẹe yi. Wa rhe yevbe miẹn emwi vberriọ, wa ma wẹ ne uwa fi ekhọe werriẹ vbe okiekie ne uwa do ya ẹe yi.”
Itan Iran Ni Gbe Aro Ghe Ugbo Emwiokọ
(Mak 12:1-12; Luk 20:9-19)
33Jesu keghi khama iran wẹẹ, “Wa vbe danmwehọ itan ọvbehe: okpia ọkpa rrọọ ne ọ mwẹ otọ, ọ keghi mu ẹre ugbo emwiokọ, ọ gba ogba ga ẹre, ọ keghi vbe fian okọ ne a na ru ẹdin yọọ, ọ keghi vbe bọọ owa ọbodẹ ne ọ yo yọọ, ọ keghi mu uẹn ne emwa vbe agbeghae, ọ na gha rrie ehe. 34Ọ ghi sẹ ẹghẹ ne a ya rhọ emwiorhọ, ọ keghi gie ọkpa vbe uwu eviẹn ọnrẹn ne ọ ya miẹn iran oghae ne ọse irẹn egbe vbọ viọ rre. 35Iran ni keghi munọ eviẹn ọnrẹn nii, iran mama ọkpa vbọ, iran gbe ọkpa vbọ rua fẹẹrẹ, iran keghi filo okuta gbe nọkpa. 36Okpia na keghi dọlegbe gie eviẹn ni bun sẹ ne ọ ka gie bu iran. Iran keghi wa vbe ru iran vberriọ zẹẹ. 37Vbe okiekie, ọ gie ovbi ẹre bu iran, ọ wẹẹ, ‘Ẹ i mwẹ iran ma tohan ovbi mwẹ.’ 38Sokpan iran ni rre ugbo nii ghi wa bẹghe ovbi ẹre na, iran keghi wa si uma wẹẹ, ‘Ghe ovbi enọyan ugbo, wa larre ne a gbe ẹe rua ne emwi ẹnrẹn khian ọghọmwa.’ 39Rhunmwuda ọnii, iran keghi mu uẹn, iran sanmwẹ ọẹn ladian vbe ugbo ni, iran keghi gbe ẹe rua.”
40Jesu keghi nọọn iran wẹẹ, “Nọyan ugbo gha ghi rre, vbe uwa yayi ighẹ ọ gha ru iran na hẹẹ?”
41Iran wanniẹn wẹẹ, “Te ọ ra gbele emwa dan ni uan, ọ ghi mu ugbo ni ne emwa ọvbehe ni gha viọ emwi ne ọ sẹ irẹn egbe ne ẹn vbe ẹghẹ, vbe iran a rhọ emwiorhọ.”
42Jesu tama iran wẹẹ, “Wa ma he tie emwi ne Ebe tae?
“ ‘Okuta ne iran ni bọ owa he wẹ ẹ i ma
ọre ọ ghi do khian a ma miẹn a i ru.
Nọyaẹnmwa ọre ọ ru emwi na,
emwi ne ọ yan ọmwa unu uan ọ na khin.’ ”
43Jesu keghi gbẹe wanniẹn wẹẹ, “Ne I tama uwa, a gha miẹn uwa Arriọba Osanobua, a ghi rhie ne emwa ọvbehe ni gha sẹtin mọ ọmọ ladian vbe ne ọ kei yi. [ 44Ọmwa ne ọ de gbe okuta ni, gha guọghọ ua. Sokpan ọmwa ne okuta ni de gbe gha wa rẹnkhuan.]”
45Avbe igiohẹn kevbe avbe Farisi ghi họn avbe itan ne Jesu kpae na, iran rẹnrẹn ighe iran ọre ọ kha. 46Iran te ho ne iran mu ẹn khui, sokpan ohan avbe emwa kegha mu iran rhunmwuda iran kha nẹ ighe akhasẹ ọre Jesu khin.
Currently Selected:
Matiu 21: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
