Matiu 20
20
Iran Ni Winna Vbe Ugbo Emwiokọ
1“A ye Arriọba ẹrinmwi gie okpia ọkpa ne ọ mwẹ ugbo emwiokọ ne ovbe kpaegbe vbe owiẹ vbirrivbirri ya viọ emwa iwinna ye ugbo ẹre. 2Iran ghi gba tae ye ikọbọ ọkpa vbe ẹdẹ nẹ, iran na gha rrie ugbo ya winna. 3Rẹn keghi vbe gha rrie ẹki vbe ihe ẹgogo ihinrin, ọ keghi do vba emwa eso ni i mwẹ emwi ne iran ru vbe evba. 4Ọ kevbe tama iran wẹẹ, ‘Wa gha rrie ugbo mwẹ ya winna, I gha ha osa ne uwa vbe ne ọ ke yi.’ 5Iran ni keghi vbe gha khian. Erriọ zẹẹ ọre ọ vbe ru ẹe vbe ẹgogo iweva kevbe ẹgogo eha. 6Ọ ghi bu ẹghẹ ne ẹgogo isẹn ra ya tu, ọ keghi vbe dọlegbe gha rrie ẹki, ọ keghi vbe do vba emwa eso ni mudia vbe evba. Ọ nọ iran wẹẹ, ‘vbọzẹ ne uwa i na mwẹ emwi ọkpa ne uwa rhie ru ẹre yi?’ 7Iran wanniẹn tama rẹn wẹẹ, ‘Ma ma miẹn ọmwa ne ọ viọ ima ye iwinna.’ Ọ khama iran wẹẹ, ‘Wa vbe gha rrie ugbo mwẹ khekherriọ.’
8“Ọ ghi sẹ ẹghẹ akota, nọyan ugbo keghi tie ọgbẹn ebe ẹre ne ọ do ha osa ne iran ni ya winna, ọ na wẹ ne ọ ka ha osa ne iran ni kiekie rre. Ọ keghi ya sẹ egbe iran ni ka gha rre. 9A keghi ha iran ni rre vbe odẹ ihe ẹgogo isẹn ikọbọ ọkpọkpa. 10Ọ ghi sẹ egbe iran ni ka suẹn iwinna, iran keghi te rhie aro ye Igho ne ọ kpọlọ sẹ ọnii, sokpan ọ keghi vbe ha iran ikọbọ ọkpọkpa. 11Iran ghi miẹn igho nẹ, iran keghi suẹn gha gui ẹzọ uwunu da ne ọ viọ iran ye iwinna wẹẹ, 12‘Iran ne u kiekie viọ na, ẹgogo ọkpa kẹkan ọre iran ya winna, sokpan ma na, te ima wa winna la ẹdẹ hoho vbe uwu akpan ovẹn, vbe u ghi na ha ima hia igho ọkpa hẹẹ?’ 13Nọyan ugbo keghi wanniẹn tama ọkpa vbọ wẹẹ, ‘Danmwehọ ose mwẹ, I ma mu uẹn ru. Ẹ i re ikọbọ ọkpa vbe ẹdẹ ma gba tae yi? 14Rhie igho ruẹ ne u gha rrie owa. Inu igho ne I ha nu uẹn ọre I ra vbe hae ne iran ni kiekie rre na. 15Wẹ ma yayi ighe I sẹtin lo igho mwẹ vbe ne ọ khọnmwẹ, ra te ohu mwẹ ghi mu uẹn rhunmwuda ighe I ze emwi obọ?’ ”
16Jesu keghi gbe ẹe wanniẹn wẹẹ, “Erriọ ye zẹẹ. Ikaro gha khian ikiekie, ikiekie gha khian ikaro.”
Jesu Guan Kan Ẹmwẹ Uwu Ẹre Ukpogieha
(Mak 10:32-34; Luk 18:31-34)
17Ugbẹn vbe Jesu ghi rrie Jerusalẹm, ọ viọ avbe erhuanegbe ẹre ghe efẹn ọkpa vbe odẹ, ọ hẹko tama iran wẹẹ, 18“Wa danmwehọ, ma rrie Jerusalẹm nian, a gha sẹ evba, iran gha mu Ovbi Ọmwa gie avbe igiohẹn kevbe avbe iran ni ma emwa Uhi, iran gha bu ohiẹn uwu gbe ẹe. 19Iran ghi vbe rhie ẹre ne iran ni i re Ju, iran ni gha ya ẹe gbe ogiẹ, iran ghi gbe ẹre asan, iran ghi kan rẹn mu ugbugbe, vbe ikpẹdẹ ne ogieha, a gha huẹn ọnrẹn kpaegbe.”
Iye Ọmọ Do Nọ Emwi
(Mak 10:35-45)
20Iye ivbi e Zẹbede keghi bu Jesu gha dee, ọ vbokho egbe rriotọ nẹẹn, ọ keghi rinmwian ẹre iyobọ.
21Jesu nọ rẹn wẹẹ, “Vbe u wẹ ne I ru nuẹn?” Rẹn wanniẹn wẹẹ, “Yan ma mwẹ wẹẹ, u gha rriọba nẹ ivbi mwẹ ọre ọ ra gha tota ke uẹ, ọkpa vbe obọ erha ọmwa, kevbe nọkpa vbe obọ iye ọmwa.”
22Jesu wanniẹn tama iran wẹẹ, “Wa ma kue rẹn emwi ne uwa nọọn. Wa gha sẹtin wọn ukpu ne imẹ ra wọn na ra.” Iran wanniẹn tama rẹn wẹẹ, “Ma gha sẹtin.”
23Jesu wanniẹn tama iran wẹẹ, “Ẹmwata nọ ighe wa gha wọn vbe uwu ukpu mwẹ. Sokpan, mẹ i mwẹ asẹ ne a ya zẹ ọmwa ne ogha tota ye obọ erha ọmwa kevbe obọ iye ọmwa mwẹ. Avbe emwa ne Erha mwẹ rhie ẹre ye otọ khẹ ọre ọ yan rẹn.”
24Ugbẹn vbe erhuanegbe ne igbe ni dekẹe họn ẹmwẹ na, iran kegha mu ohu iran ne etẹn eva nii. 25Jesu keghi tie iran hia, ọ tama iran wẹẹ, “Wa rẹnrẹn wẹ iran ni khaemwisẹ yan emwa, wa mwẹ ẹtin vbe uhunmwu iran kevbe wẹẹ, iran ne ọkaolotu iran wa guan yan iran. 26Sokpan ọ ghe uwa i sẹtin gha ye vberriọ. Ne ọ rhirhi gha ho ne irẹn gha re ne ọ kpọlọ vbe uwu uwa, wẹ nẹ ọ gha re ọguọmwadia ni dekẹe. 27Ne ọ vbe ho ne irẹn gha re okaro, giee gha re ọviẹn uwa hia. 28Zẹẹ vbe ne Ovbi Ọmwa ye, ọ ma rre ne a do gha ga ẹe, sokpan ne irẹn do ga emwa kevbe ne ọ ya orhiọn rẹn dẹ emwa ni bun werriegbe.”
Jesu Sinmwi Arhuaro Eva
(Mak 10:46-52; Luk 18:35-43)
29Iran ghi ke Jẹriko ladian, emwa nii bun keghi gha bi lele Jesu khian. 30Arhu aro eva nii tota ye ọkpẹn odẹ ghi họn ighe Jesu ọre ọ gberra, iran datu wẹẹ, “Ovbi e Devid, tohan mwa enọwanrẹn.”
31Emwa nii rre evba keghi gu iran gui wẹ ne iran gue unu. Sokpan iran dọlegbe kakabọ datu wẹẹ, “Ovbi e Devid tohan mwa.”
32Jesu keghi mudia, ọ ke tie iran, ọ nọ iran wẹẹ, “Vbe uwa ho ne I ru ne uwa?”
33Iran wanniẹn wẹẹ, “Ma ho ne u rhan ima aro.”
34Jesu keghi tohan iran, ọ keghi ya obọ kan iran aro, ọwarọkpa, iran keghi suẹn gha bẹghe, iran keghi lele Jesu.
Currently Selected:
Matiu 20: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
