Matiu 14
14
Uwu Ọghe Jọn Ne Ọsamẹ
(Mak 6:14-29; Luk 9:7-9)
1Uwu ẹghẹ na ọre Hẹrọd ne ọ kha yan Galili na họn ẹmwẹ Jesu. Rẹn keghi tama avbe ekhaẹmwẹ ọnrẹn wẹẹ, 2“E Jọn ne Ọsamẹ nọ, te ọ rhiọrre vbe idin, ọre ọ zẹe ne ọ na sẹtin winna iwinna ọyunnuan vbenian.” 3Rhunmwuda, Hẹrọd gie ne a mu e Jọn khui ye uwu eghan ba ẹmwẹ Hẹrodias ne amwẹ Filip ọtẹn e Hẹrọd. 4Jọn ne Ọsamẹ tua unu muẹn ma Hẹrọd wẹ ọ ma kei ne ọ rhie ẹre rọnmwẹ. 5Hẹrọd gha te wa gbe ẹe rua, sokpan ohan avbe Ju kegha muẹn rhunmwuda iran hia wa ka e Jọn ye akhasẹ ẹmwata.
6Vbe ẹdẹ ne Hẹrọd ru ayere ẹdẹ ubiẹmwẹ ọnrẹn, ovbi e Hẹrodias ne okhuo keghi la iku gha gbee, iku ẹre keghi wa rhiẹnrhiẹn Hẹrọd sẹrriọ 7ne ọ na ya ihen yan ma rẹn wẹẹ, “Nọ emwi ne u rhirhi gha ho vbe obọ mwẹ, I gha rhie ẹre nuẹn.”
8Zẹ vbe iro ne iye ẹe gu ẹe zẹ, ọmọ ni keghi ya nọ e Hẹrọd wẹẹ, “Ya mu uhunmwu e Jọn ne Ọsamẹ ye ọkpan gunmwẹ vbe emwa na.”
9Emwi na keghi da ọba ẹsẹse sokpan rhunmwuda ighe sirra emwa ni rre evba hia ọre ọ na vẹn ihẹn, ọ na wẹ ne iran ya mu gi ẹe vbene ọ nọ rẹn. 10Rhunmwuda ọnii ọre iran na ya fian e Jọn uhunmwu vbe uwu eghan.
11Iran keghi mu uhunmwu ni ye ọkpan mu gie ọmọ okhuo ni, rẹn keghi vbe mu gie iye ẹe. 12Avbe erhuanegbe Jọn keghi ya mu ikun e Jọn, iran ghi re ẹre nẹ, iran na ya tama Jesu.
Jesu Koko Arhunmwu Arriaisẹn Vbe Ihe Isen
(Mak 6:30-44; Luk 9:10-17; Jọn 6:1-14)
13Ugbẹn vbe Jesu ghi họn ẹmwẹ na, ọ la okọ kpao vbe evba rre, rẹn ọkpa kegha rrie ehe ne ọmwa rhọkpa i ye. Emwa nii hia ghi họn ẹn iran keghi kpao vbe ẹvbo iran la otọ bu ẹre gha khian. 14Jesu keghi kpao hin uwu okọ rre, ugbẹn vbe ọ ghi miẹn avbe emwa na, ohan iran to ẹe ẹsẹse, ọ keghi sinmwi ne egbe ma rran vbe uwu iran.
15Ugbẹn vbe ọ ghi sẹ ota, avbe erhuanegbe do tama rẹn wẹẹ, “Te ẹdẹ ghi ra mu, ẹ i re adesẹ ẹvbo ọre a ye vbe emwa, zẹ iran urrie ne iran ya tobọ iran gualọ evbare dẹlẹ vbe ore ẹvbo.” 16Jesu tama iran wẹẹ, “Vbe iran ghi kpao hẹẹ, wa rhie evbare ne iran re.” 17Iran wanniẹn tama rẹn wẹẹ, “Ma i mwẹ gberra eka isẹn kevbe ehẹn eva vbe emwa na.”
18Jesu khama iran wẹẹ, “Wa viọ gunmwẹ.” 19Ọ keghi tama emwa hia ne iran tota ye otọ vbe uhunmwu irunmwu, ọ keghi viọ eka isẹn kevbe ehẹn eva nii, ọ keghi tọn aro mu ghe odukhunmwu, ọ kpọnmwẹ Osanobua ọ keghi giagia eka ni viọ ne avbe erhuanegbe ẹre, avbe erhuanegbe keghi vbe viọ ne avbe emwa nii. 20Dọmwadẹ ọghọe keghi re vbene ọ sẹtin. Avbe erhuanegbe keghi viọ ni dekẹe vuọn okhuae iweva. 21Emwa ni rri evbare ni keghi re omwa arhin arriaisẹn vbe ihe isẹn vbe ne a i na ka ikhuo kevbe ibiẹka.
Jesu Khiaẹn Vbe Uhunmwu Amẹ
(Mak 6:45-52; Jọn 6:15-21)
22Ugbẹn vbe Jesu ghi ra zẹ avbe emwa ni urrie, ọ khama avbe erhuanegbe ẹre ne iran la okọ ya mudia khẹ irẹn vbe iyeke ẹzẹ nọkpa. 23Ugbẹn vbe ọ ghi zẹ iran urrie nẹ, rẹn ọkpa keghi hin uhunmwu oke ne ọ ya na erhunmwu. Ebi ro nẹ, Jesu ọkpa keghi ye gha rre evba. 24Iran ghi khian buan nẹ vbe uwu odighi, ẹhoho kegha hoho, ọ na gha bi okọ yo bi ẹe rre vbe uwu odighi.
25Ọ ghi rre omwa ẹkpo ẹgogo eha ya sẹ ẹgogo enẹ vbe owiẹ, Jesu keghi nana uhunmwu amẹ bu iran gha dee. 26Ugbẹn vbe avbe erhuanegbe ghi bẹghe ẹre vbe ọ nana uhunmwu amẹ dee, iran keghi wa runran. Iran da tu wẹẹ, “Ghe ẹrinmwi.”
27Vbe ọwarọkpa ni, Jesu tama iran wẹẹ, “Wa ghẹ runran Mẹ nọ. Wa ghẹ gie ohan mu uwa!”
28Pita keghi wanniẹn tama rẹn wẹẹ, “Nọyaẹnmwa, a deghẹ wẹ gele nọ, rhie ẹtin mẹ ne i bu ruẹ gha die uwu amẹ.” 29Jesu tama rẹn wẹẹ, “Gha dee.” Pita keghi ladian vbe okọ, ọ kegha nana uhunmwu amẹ bu Jesu khian. 30Sokpan ugbẹn vbe ọ ghi miẹn ẹhoho, ohan keghi muẹn ọ na suẹn gha dinmwi ye uwu amẹ. Ọwarọkpa nii, ọ keghi datu wẹẹ, “Bu mwẹ rre Nọyaẹnmwa.”
31Vbe ọwarọkpa nii, Jesu keghi si ẹre obọ, ọ tama rẹn wẹẹ, “Iyayi ruẹ kanmwa gbe, vbọzẹ ne u na ziro eva?”
32Iran eva keghi gba la okọ, ẹhoho keghi da obọ yi. 33Avbe, erhuanegbe ni rre uwu okọ keghi ya uhunmwu rhanmwẹ otọ ne Jesu, iran wẹẹ, “Vbe ẹmwata, Ovbi Osanobua ọre u gele khin.”
Jesu Sinmwi Avbe Ọkhọnmwọ Vbe Gẹnẹsarẹt
(Mak 6:53-56)
34Ugbẹn vbe iran ghi fian ẹzẹ rraa, iran keghi ya dunmwu vbe Gẹnẹsarẹt. 35Emwa ẹvbo ni keghi wa rẹn wẹ Jesu nọ, iran keghi ya viọ avbe ọkhọnmwọ hia ni rre iwewe ni lẹga iran bu Jesu gha dee. 36Iran rinmwiaẹn wẹẹ, ọ gha rhe gha re ehọ ẹwu ẹre ọkpa nọ ne ọ gie avbe ọkhọnmwọ ya obọ kan rẹn. Egbe keghi rran iran hia ni ya obọ kan rẹn.
Currently Selected:
Matiu 14: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
