Matiu 15
15
Iruemwi Avbe Enikaro
(Mak 7:1-13)
1Eso vbe uwu avbe Farisi kevbe iran ni ma emwa Uhi keghi ke Jerusalẹm bu Jesu gha dee do nọ rẹn wẹẹ, 2“Vbọzẹ ne avbe erhuanegbe ruẹ i na lele igiodẹ avbe enikaro ru emwi yi? Iran i lele ọbakpe obọ iran ke gha rri evbare.”
3Jesu wanniẹn iran ẹmwẹ wẹẹ, “Vbe uwa na mu uhi Osanobua fua hẹ vbe uwa gba ilele uwa ginna obọ? 4Rhunmwuda Osanobua khare wẹẹ, ‘Ya ọghọ ne erha a kevbe iyuẹ’ kevbe wẹẹ, ‘Ọmwaikọmwa ne ọ kpa unu ghe erha e ra iye ẹe, te a gha gbẹe rua.’ 5Sokpan, wa ghi ra kha, wa wẹẹ, ‘Deghẹ ọmwa mwẹ emwi ne ọ gha sẹtin ya ga erha e ra iye ẹe,’ ọ na ghi kẹ ọre ya kha nẹ wẹẹ, ‘I ya ẹe fi ohan ne Osanobua,’ 6ohan i ghi gi ẹe dọlegbe ya ẹe mu ọghọ ye erha e ra iye ẹe egbe. Erriọ ọre uwa ya zẹ uhi Osanobua kọ, ne uwa miẹn ehe na mu ọghe uwa sẹ. 7Wa ni zẹ imamase, te Aizaia wa ta uwa umian ẹkpo ne ọ na kha wẹẹ,
8“ ‘Osanobua khare wẹẹ,
Ukpunu iran na ya rho mwẹ
sokpan ekhọe iran khian rrei mẹ ẹsẹse.
9Vbe iran ghi ya uhunmwu rhanmwẹ otọ mẹ ba a,
vbe iran mu ẹmwẹ uhi emwa kẹkan
vbe na miẹn we uhi Osanobua nọ!’ ”
Emwi Ni Ya Ọmwa Khian Ne Ọ Ma Huan
(Mak 7:14-23)
10Jesu keghi si emwa hia koko, ọ khama iran wẹẹ, “Wa danmwehọ, wa gie ẹmwẹ na la uwa ekhọe. 11Ẹ i re emwi ne ọ la ọmwa uwu unu ọre ọ ya ẹe khian ne ọ ma huan, sokpan emwi ne ọ ke uwu ẹre ladian ọre ọ ya ẹe khian ne ọ ma huan.”
12Avbe erhuanegbe ẹre khama rẹn wẹẹ, “U rẹnrẹn ighẹ ẹmwẹ ne u tae wan wa kakabọ fian avbe Farisi egbe rhie?” 13Jesu wanniẹn tama iran wẹẹ, “Erhankerhan ne erha mwẹ ne ọ rre ẹrinmwi ma kọ, te a ra vbọlọ ehia kua. 14Ghẹ zẹ ye iran re. Arọndẹ ni rhu aro iran khin. Arhuaro gha rhie arhuaro la odẹ uye iran eva ra kharha yi.”
15Pita tama rẹn wẹẹ, “Rhan otọ itan na ma ima.”
16Jesu wanniẹn tama iran wẹẹ, “Wa ma he ye rẹn emwi sẹ emwa ọvbehe. 17Wa ma rẹn otọ ẹre? Emwi gha la unu, ọ ghi ke evba la ẹko, ọ ghi vbe la evba la hin egbe rre. 18Sokpan, emwi ne ọ ke uwu unu ladian, uwu ekhọe ọre ọ ke rre, ọ ghi ya ọmwa khian ne ọ ma huan. 19Uwu ekhọe ọre iro nọ ya ọmwa ru emwi hia ke rre: izigha, oghẹ, uyinmwẹ ohọhọ hia, oyi, ohoghe, ọtakhọ. 20Ena ọre ọ ya ọmwa khian ne ọ ma huan, sokpan, ne a ya obọ ne a ma lele a ba kpe rri evbare i sẹtin ya ọmwa khian ne ọ ma huan.”
Iyayi Okhuo Ọkpa
(Mak 7:24-30)
21Jesu ghi kpao vbe evba rre, ọ kegha rrie ẹvbo ni rre odẹ Taia kevbe Saidọn. 22Okhuo Keman ọkpa keghi ke ẹvbo ni bu ẹre rre, ọ tama rẹn wẹẹ, “Ovbi e Devid, tohan mwẹ, ovbi mwẹ nokhuo mwẹ orhiọn esu, obọ wa dae ẹsẹse.”
23Jesu ma kue zẹ mwẹ wanniẹn ọẹn. Avbe erhuanegbe ẹre keghi rinmwiaẹn wẹẹ, “Zẹ okhuo na urrie, ghe vbene ọ go lele ima khian hẹ.” 24Jesu keghi wanniẹn wẹẹ, “Ohuan ni wiri ni rre ivbi Izrẹl ọkpa ọre a gie mwẹ bu gha dee.”
25Ugbẹn vbe okhuo nii ghi họn ẹmwẹ na, ọ bu Jesu gha dee, ọ keghi diguẹ nẹẹn, ọ wẹẹ, “Lahọ yọ mwẹ obọ.”
26Jesu wanniẹn tama rẹn wẹẹ, “Ọ ma kei ne a gha viọ evbare ne a wẹẹ ne a ya koko emọ ne ivbiakota.”
27Okhuo nii keghi vbe wanniẹn wẹẹ, “Ẹmwata ọnii wa khin, sokpan, avbe ekita vbe rhọ evbare ne a re kẹe ni ke uhunmwu eteburu arowa iran dele ku otọ re.”
28Jesu wanniẹn tama rẹn wẹẹ, “Okhuo na, ọmwa nọ mwẹ iyayi ẹsẹse ọre u khin, emwi ne u rhirhi gha ho, a gha ruẹe nuẹn.” Egbe ke wa rran ovbi ẹre vbe ọwarọkpa nii.
Jesu Sinmwi Emwa Nibun
29Jesu ghi kpao vbe evba, ọ kegha lele ọkpẹn odighi e Galili khian, ọ keghi hin uhunmwu oke, ọ na tota.
30Emwa ni bun keghi viọ avbe ọkhọnmwọ bu ẹre gha dee, avbe arọe, arhuaro, uke, odin kevbe emianmwẹ ọvbehe ni bun, iran viọ iran ye odaro ẹre, ọ keghi mu iran hia egbe rran. 31Unu keghi yan emwa hia vbe iran miẹn wẹ odin guanrẹn, uke khiaẹn, egbe rran arọe, arhuaro bẹghe. Iran keghi rho Osanobua Izrẹl vbe uyi.
Jesu Koko Arhunmwu Arriaisẹn Vbe Ihe Enẹ
(Mak 8:1-10)
32Jesu keghi tie avbe erhuanegbe ẹre, ọ tama iran wẹẹ, “Ohan avbe emwa na wa to mwẹ rhunmwuda ikpẹdẹ eha gha dee iran kegha gun mwẹ rre emwa, evbare ighi gue iran nian. I ma ho ne I zẹ iran urrie vbe ẹko ohanmwẹ ne iran ghẹ ya sahẹ vbe odẹ.”
33Avbe erhuanegbe ẹre keghi nọ rẹn wẹẹ, “De ehe ne a gha na miẹn evbare ya koko iran na hia vbe uwu ato na?”
34Jesu nọ iran wẹẹ, “Inu eka wa mwẹ?” Iran tama rẹn wẹẹ, “Eka ihinrọn kevbe ehẹn eso giẹẹrẹ.”
35Jesu keghi wẹ ne emwa ni hia tota lele otọ. 36Ọ keghi viọ eka ihinrọn kevbe ehẹn nii, ọ kpọnmwẹ Osanobua, ọ keghi gia ẹre hẹ ne avbe erhuanegbe ẹre, avbe erhuanegbe keghi gha ẹre ne avbe emwa nii.
37Iran hia keghi re ne ẹko vuọn. Avbe erhuanegbe keghi si ne iran re kẹrre koko, okhuae ihinrọn keghi vuọn. 38Emwa ni rriọe keghi re arhunmwu arriaisẹn vbe ihe enẹ, vbe na a ma na ka ikhuo kevbe ibiẹka yọ.
39Iyeke ọnii, Jesu keghi zẹ iran urrie, rẹn keghi la okọ gha rrie isoko Magadan.
Currently Selected:
Matiu 15: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
