Matiu 13
13
Itan Ọkemwiokọ
(Mak 4:1-9; Luk 8:4-8)
1Vbe ẹdẹ ọkpa ni, Jesu keghi kpao vbe owa gha rrie ọkpẹn odighi, ọ keghi tota gha ma emwa emwi. 2Rhunmwuda ighe emwa ni gbe ẹbu ye ehe ne ọ ye bun ẹsẹse, rẹn keghi la uwu okọ, ọ keghi tota ye evba, emwa ni hia kegha rre uhunmwu oke. 3Ọ keghi ya itan ma iran emwi nibun. Ọ wẹẹ, “Okpia ọkpa keghi ladian ya kọ emwiokọ. 4Ẹghẹ ne ọ na gha kọe khian, eso keghi dele ye adesẹ odẹ, avbe ahianmwẹ keghi rhọ ẹre re. 5Eso vbọ dele ye otọ okuta, ehe ne ekẹn i mobọ ye. Rhunmwuda ighẹ ẹ i dinmwi vbe uwu otọ, ọ na rherhe zọọ. 6Ugbẹn vbe ovẹn ghi yunmwu, ọ keghi luẹluẹ, ukhu ẹre ne ọ da zọọ keghi kakaa rhunmwuda inian rẹn ma he la otọ dinmwi. 7Eso kevbe kharha ye uwu igban. Ugbẹn vbe ọ ghi zọọ, igban keghi khuakhua gbua. 8Sokpan eso dele ye otọ ne ọ maa, iran keghi mọ, eso iyisẹn eso iyeha, eso ọgban.” 9Jesu keghi kha wẹ, “Ne ọ mwẹ ehọ, giee họn.”
Emwi Ne Ọ Zẹe Ne Ọ Na Kpa Itan
(Mak 4:10-12; Luk 8:9-10)
10Avbe erhuanegbe keghi bu Jesu rre, iran nọ rẹn wẹẹ, “Vbọzẹ ne u na ye itan gu iran guan yi?”
11Jesu wanniẹn tama iran wẹẹ, “Wa na ọre a ta ẹmwẹ oro Arriọba Osanobua ma ighẹ ẹ i re iran ni. 12Rhunmwuda ọmwa ne ọ ka mwẹ, ọre a gha ye vbe viọ na, ne ọ miẹn ehe na gha mwẹ ọnrẹn ọkpọkua. Sokpan ne ẹ i mwẹ, ekherhe ne ọ te vbe mwẹ, a gha wa miẹn ẹre re. 13Ọna ọ zẹẹ ne I na ya itan gu iran guan. Rhunmwuda, iran rhan aro rua ye otọ gha ghe emwi, sokpan iran i bẹghe ẹre. Iran ghi rhie ehọ ye otọ, sokpan iran i họn ra ne iran rẹn otọ ẹmwẹ nii. 14Rhunmwuda ọnii nian, ẹmwẹ ne Aizaia tae vbekpa ọna sẹe wẹẹ,
“ ‘Wa gha rhie ehọ ye otọ,
sokpan wa i rẹn emwi ne a yae kha.
Wa gha rhan aro rua ye otọ,
sokpan wa i ra ya e dẹghe.
15Rhunmwuda ekhọe iran gbin nẹ,
iran kan emwi khiẹ ehọ,
iran mimi aro gbua.
Ne iran ghẹ ya ye aro iran dẹghe,
ne ọ ghẹ ya la iran ehọ,
ne iran ghẹ ya rẹn otọ ẹre
ne iran ghẹ ya fiwerriẹ
ne imẹ do ya bọ iran
erriọ Osanobua khare.’
16“Sokpan, uhunmwu uwa ọre ọ maa ne aro uwa na sẹ ọe kevbe ne ehọ uwa na vbe họn ẹn. 17Wa yerre ighẹ akhasẹ kevbe emwa Osanobua nibun ọre ọ te gha ho ne iran miẹn emwi ne uwa miẹn na, sokpan iran ma miẹn ọẹn, kevbe ne iran vbe họn emwi ne uwa họn ẹn, sokpan iran ma họn ẹn.
Jesu Rhan Otọ Nene Itan Ọkemwiokọ
(Mak 4:13-20; Luk 8:11-15)
18“Wa danmwehọ emwi ne a ya ne ne itan ọkemwiokọ kha. 19Iran ni kharha ye adesẹ odẹ ọrọre iran ni họn ẹmwẹ Arriọba, sokpan ọ ma la iran ekhọe. Esu keghi do sanmwẹ emwi ne a te kọ yọ rhie. 20Ni dele ye otọ okuta ọrọre iran ni wa ye oghogho rhan obọ miẹn ẹmwẹ ni vbe iran wa họn ẹn. 21Rhunmwuda ighẹ ọ ma dinmwi ye iran ekhọe, ẹ i tọ. Ukpokpo kevbe orueghe ghi rre rhunmwuda ẹmwẹ ni, iran keghi khuọn kua ọwarọkpa. 22Emwiokọ ni kharha ye uwu igban keghi re iran ni họn ne ne ẹmwẹ, iran keghi vbe rhie ẹre. Sokpan orhikhan agbọn kevbe ẹmwẹ ẹfe keghi khuakhua ẹe gbua, ọ ma gie ẹe mọ. 23Emwiokọ ni rre otọ ne ọ maa ọrọre iran ni họn ẹn, ọ keghi vbe la iran ekhọe, iran kevbe mọ ọmọ eso iyisẹn, eso iyeha, eso ọgban.”
Itan Irunmwu
24Jesu keghi vbe kpa itan ọvbehe ma iran wẹẹ, “Arriọba ẹrinmwi yevbe ọkpia ọkpa ne ọ kọ emwiokọ esi ye ugbo ẹre. 25Ẹdẹ ikẹtin ghi rre, vbe emwa hia ghi vbiẹ, oghian rẹn keghi rre do kọ irunmwu yọ, ọ kegha rrie. 26Ugbẹn vbe emwiokọ ghi wan nẹ, vbe ọ ghi suẹn gha gbe ihiagha, irunmwu ni rrọọ keghi rhiegbe ma. 27Avbe eguọmwadia okpia ni keghi do nọ rẹn wẹẹ, ‘Ẹ i re emwiokọ ne ọ maa wẹ kọ ye ugbo ruẹ, de ehe ne avbe irunmwu ke rre do la rọ?’ 28Rẹn wanniẹn tama iran wẹẹ, ‘Eghian ọre ọ ru emwi na.’ Iran vbe nọ Rẹn wẹẹ, ‘Ma ghi ya vbọlọ avbe irunmwu ni kua?’ 29Rẹn tama iran wẹẹ, ‘Ẹn o, na ghẹ miẹn wẹ, ẹghẹ vbe uwa a gha vbọlọ irunmwu, wa ghi vbe vbọlọ emwiokọ ba ẹre. 30Wa gie ọka kevbe ohunhun gba gha wan khian ọ te ya sẹ ẹghẹ emwiorhọ. Mẹ gha tama iran ni rhọ emwiorhọ wẹẹ, wa ka vbọlọ avbe ohunhun ni rrọọ nẹ, ne a gbalọ iran ikun ikun viọ ku erhẹn, iyeke ọnii, wa ke ya si ọka ni rrọọ koko ya aza mwẹ.’ ”
Itan Ikpẹ Mọstad
(Mak 4:30-32; Luk 13:18-19)
31Jesu keghi vbe kpa itan ọvbehe ma iran wẹẹ, “Arriọba ẹrinmwi yevbe ọmọ erhan mọstad ne ọ re ne ọ kanmwa sẹ vbe uwu avbe ọmọ erhan hia. 32Ọkpia ọkpa ke rhie ẹre ọ keghi ya kọe ye ugbo ẹre. Ugbẹn vbe ọ ghi wan nẹ, ọ keghi kpọlọ sẹ ivbi erhan hia. Ọ keghi do khian okperhan, avbe ahianmwẹ keghi gha bọ oko ye abọ ẹre.”
Itan Ọghe Yist
(Luk 13:20-21)
33Jesu keghi vbe kpa itan ọvbehe ma iran wẹẹ, “Arriọba ẹrinmwi yevbe eyist ne okhuo ọkpa rhiere, ọ keghi yae gua ọkpan irhuarhua ọkpa rhinrin irhuarhua ni te ghi do hue.”
Emwi Ne Jesu Rhunmwuda Ẹre Kpa Itan
(Mak 4:33-34)
34Itan ọre Jesu ya gu emwa guan avbe ẹmwẹ na hia, ẹ i vbe ta ẹmwẹ ọkpa ma iran vbe ẹ i re itan ọre ọ kpa ya tae. 35Ọ ru ọna ne ẹmwẹ ne akhasẹ tae miẹn ehe na sẹ wẹẹ,
“Mẹ gha kpa itan ya gu iran guan,
emwi ne a ma he te rẹn,
ke omuhẹn agbọn gha dee,
i gha tae ma iran.”
Jesu Rhan Otọ Itan Irunmwu
36Jesu ghi kpao vbe evba rre, ọ keghi la uwu owa. Avbe erhuanegbe ẹre keghi bu ẹre gha dee, iran tama rẹn wẹẹ, “Rhan otọ itan ohunhun ni rre uwu ọka ma ima.”
37Jesu keghi wanniẹn wẹẹ, “Ovbi Ọmwa ọrọre ọmwa ne ọ kọ emwiokọ esi. 38Ugbo ne ọ kọ ẹe yi ọrọre agbọn na, emwiokọ ni maa ọrọre emwa ni re ọghe nene Arriọba, ohunhun ọrọre iran ni re ọghe Esu. 39Esu tobọ ẹre ọrọre ọmwa ne ọ do tu ohunhun ye ugbo. Ẹghẹ emwiorhọ ọrọre ufomwẹ agbọn. Avbe odibosa ọrọre iran ni rhọ emwiorhọ. 40Zẹ vbene a gbalọ ohunhun, ne a na vbe ya erhẹn giẹn ọnrẹn uan, erriọ gha ye vbe ẹdẹ okiekie. 41Ovbi Ọmwa gha gie avbe odibo ẹre ladian, iran ghi ya silo emwa ni si emwa fi orukhọ, kevbe avbe emwa dan hia ke uwu Arriọba ẹre ladian. 42A ghi hẹ iran ku uwu ọgẹn erhẹn ne iran ya gha viẹ egbe, kevbe ne iran vbe ya gha rri akọn khuara vbe evba. 43Sokpan ivbi Osanobua ghi gha fi wain wain vbe ughegbe vbe Arriọba Erha iran. Ne ọ mwẹ ehọ nian, gie ẹe họn.
Itan Emwi Ighobioye Nọrhiegbe Lẹre
44“Arriọba ẹrinmwi yevbe emwighobioye ne a rhie lẹre ye uwu oha. Ugbẹn vbe okpia ọkpa ghi domian miẹn ọẹn, ọ keghi hẹko dọlegbe zẹ ekẹn gue ẹre. Vbene ọ ghi ye ọre sẹ, ọ keghi wa ya khiẹn emwi hia ne ọ mwẹ, ọ ke ya dẹ ako oha ni.
Itan Okuta Ẹrọnmwọ
45“Arriọba ẹrinmwi vbe yevbe okpia ọkpa nọ gualọ okuta ẹrọnmwọ khian ne ọ gha dẹ. 46Ugbẹn vbe ọ ghi miẹn ọkpa ne a i miẹn egbọre, ọ keghi ya khiẹn emwi hia ne ọ mwẹ, ọ keghi ya dẹ ọe.
Itan Ọghe Ọga Ọgbehẹn
47“Arriọba Osanobua vbe yevbe ọga ọgbehẹn ne a nien fi uwu ẹzẹ, ọ keghi vbe mu ehẹn ughughan. 48Ọ gha ghi vuọn nẹ, avbe ọgbehẹn ghi si ẹe hin oke. Iran ghi tota gha viọ ehẹn ni rre uwu ẹre ladian, iran ghi viọ ni maa ni rrọọ ye okhuae, iran ghi filo ne ẹ i maa ni rrọọ kua. 49Erriọ zẹ ọre ọ gha ye vbe ẹdẹ okiekie, avbe odibo Osanobua gha ladian ya koko emwa dan hin uwu ẹbu emwa esi rre. 50Iran ghi hẹ iran ku uwu ọgẹn erhẹn. Iran ghi gha viẹ egbe, iran ghi vbe gha rri akọn khuara vbe evba.”
Ẹmwata Ọgbọn Kevbe Ọwiẹyi
51Jesu keghi nọ avbe erhuanegbe ẹre wẹẹ, “Wa rẹn otọ avbe ẹmwẹ na ra?”
Iran wanniẹn tama rẹn wẹẹ, “Ẹn o.” 52Ọ keghi dọlegbe tama iran wẹẹ, “Ọnii rhie ma wẹ deghẹ ọma emwa Uhi ọkpa do khian ọrhuanegbe vbe uwu Arriọba ẹrinmwi, rẹn ghi do yevbe ọdafẹn nọyan owa, ọ ghi vbe gha viọ emwi ọgbọn kevbe emwi ọwiẹyi ke uwu aza ẹre ladian.”
Nazarẹt Ma Rhan Obọ Miẹn Jesu
(Mak 6:1-6; Luk 4:16-30)
53Jesu ghi kpa avbe itan na nẹ, 54ọ keghi kpa vbe evba, ọ na gha rrie ẹvbo irẹn tobọ irẹn, ọ kegha ma emwa emwi vbe Ọgua ediọn iran. unu keghi wa yan emwa hia ni họn ẹmwẹ ọnrẹn. Iran nọ egbe iran ọta wẹẹ, “De ehe ne ọ na ya miẹn ẹwaẹn na hia yi? Wa vbe ghe iwinna ọyunnuan ne ọ winna. 55Ọna i re ovbi owinna, ne Meri biẹe, ọtiẹn Jems, Josẹf Saimọn kevbe Judas. 56Etiọnrẹn nikhuo hia i gu ima rre ẹvbo na ra? Vbe ọ ghi na miẹn ena ghe emwi yi?”
57Rhunmwuda ọnii, iran ma ghi rhan obọ miẹn rẹn, Jesu keghi tama iran wẹẹ, “A i miẹn akhasẹ ne ẹ i mwẹ uyi, sokpan a ma wẹ vbe ẹvbo ẹre kevbe uwu ẹbu emwa rẹn.” 58Ọ ma winna iwinna ọyunnuan ni bun vbe evba rhunmwuda iran ma ya ẹe yi.
Currently Selected:
Matiu 13: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
