Matiu 12
12
Ẹmwẹ Edẹ Ikẹtin
(Mak 2:23-28; Luk 6:1-5)
1Ọ ma ghi he kpee vbe iyeke ọnii, Jesu keghi fian ugbo ọka irhuarhua rra vbe Ẹdẹ Ikẹtin. Ohanmwẹ keghi gha gbe avbe erhuanegbe ẹre, iran kegha yobọ silo ọmọ ọka ni re. 2Avbe Farisi ghi miẹn ọna, iran tama Jesu wẹẹ, “Uhi ima wua emwi ne avbe erhuanegbe ruẹ ru na vbe Ẹdẹ Ikẹtin!”
3Jesu keghi wanniẹn, “Wa ma he tie emwi ne Devid ru ẹghẹ ni vbe ohanmwẹ gbẹe ke irẹn kevbe avbe ikpayẹ ọre? 4Ọ keghi la uwu owa Osanobua, rẹn kevbe ikpayẹ ọre keghi ya rri ebrẹd ne a ya mu ohan gie Osanobua, vberriọ, Uhi ma kha wẹ ne iran rriọe, rhunmwuda, avbe ohẹn ọkpa ọre a giee gha rriọe. 5Wa ma he vbe tiẹ ẹre vbe Uhi e Mosis wẹẹ, Ẹdẹ Ikẹtin hia ọre avbe ohẹn ni rre Ọgua Osa ya rra uhi Ẹdẹ Ikẹtin, sevba ai kae ya iran urhu? 6Ne I tama uwa nian wẹ emwi ne ọ kpọlọ sẹ Ọgua Osa rre emwa na. 7Akpawẹ wa rẹn emwi ne a ya ebe na gbẹn na kha wẹẹ, ‘I i mwẹ emwi ne I ya aranmwẹ ne a ya zọ ese ruẹ itohan ọre I ho’ wa ghẹ i gha bu abe gbe ọmwa ne ọ ma rra uhi. 8Rhunmwuda Ovbi Ọmwa ọre ọ yan Ẹdẹ Ikẹtin.”
Okpia Ne O Mwẹ Obọ Ne Ọ Luẹluẹe
(Mak 3:1-6; Luk 6:6-11)
9Jesu ghi kpa vbe evba, ọ keghi la ọkpa vbe uwu avbe Ọgua ediọn iran. 10Okpia ọkpa ne obọ ẹre luẹluẹe keghi rre evba. Emwa eso ni gualọ Jesu ẹmwẹ ne unu keghi vbe rre evba. Iran nọ rẹn wẹẹ, “Uhi ma sighe wẹ ne a ghẹ mu ọmwa egbe rran vbe Ẹdẹ Ikẹtin ra?”
11Jesu wanniẹn iran ẹmwẹ wẹẹ, “Deghẹ ọkpa vbe uwu uwa mwẹ ohuan ighe ọ de fi uhae vbe Ẹdẹ Ikẹtin vbo? U i de obọ yọ ne u siẹe ladian? 12A i ra ya ọmwa vbe ohuan gie egbe. Rhunmwuda ọnii, Uhi ima ma kha wẹ ne a ghẹ ya ọmwa ọvbehe obọ vbe Ẹdẹ Ikẹtin.” 13Rẹn keghi tama okpia ni wẹẹ, “Niẹn obọ ruẹ ladian.” Ọ ghi siẹe ladian, obọ ẹre keghi do gha maa vbene nọkpa ye. 14Avbe Farisi keghi ya si uma vbene iran gha ya gbe Jesu ua hẹẹ.
Eguọmwadia Ne Osanobua Hannọ Zẹ
15Jesu ghi miẹn ighe erriọ nọ, ọ keghi kpao vbe evba ni rre, emwa ni bun kevbe lelẹe. Ọ keghi sinmwi enikhuọnmwi hia. 16Sokpan ọ tama iran wẹ ne iran ghẹ gie emwa ọvbehe rẹn, 17ne ẹmwẹ akhasẹ Aizaia miẹn ehe na sẹ wẹẹ:
18“Osanobua khare wẹẹ,
ọguọmwadia mwẹ ne I mẹ zẹẹ ọre ọna khin.
Ne I ho ẹmwẹ ọnrẹn, ne ọyẹnmwẹ ọnrẹn sẹ mwẹ.
I gha gie Orhiọn mwẹ tin yan rẹn,
ọ gha wewe ibuohiẹn mwẹ ma uhunmwu ẹvbo hia,
19rẹn i muan ẹmwẹ, ẹ i soo,
ra ne ovbe gha vannọ okan vbe ada.
20Rẹn i ra bun ovbi erhan ne ọ vbokho nẹ fo,
ra ne ọ dọ ukpa ne ọ ba ruẹ ruẹ yọ.
Rẹn i ra hẹwẹ rhinrin ẹmwata te do khọnmiotọ,
21ehe ne ọ ye ọre emwa hia gha na gha mwẹ idaehọ.”
Jesu Kevbe Bẹlzibọb
(Mak 3:20-30; Luk 11:14-23)
22Iran keghi mu okpia ọkpa ne ọ mwẹ orhiọn esu bu Jesu rre, ọ rhu aro ọ keghi vbe re odin. Jesu keghi mu ẹre egbe rran, ọ kegha bẹghe, ọ keghi vbe gha guan. 23Unu keghi wa yan emwa hia. Iran keghi suẹn gha nọ wẹẹ, “Ovbi e Devid ọna ghi khin ra?” 24Avbe Farisi ghi họn, iran wẹẹ, “E Bẹlzibọb ne ọkaolotu avbe orhiọn esu, ọre ọ rhie ẹtin ne ọ ya khulo orhiọn esu ladian nẹẹn.” 25Jesu rẹn emwi ne ọ rre iran ekhọe, ọ keghi tama iran wẹẹ, “Agbọn ẹvbo ọkpa gha fian egbe ye iheva gha gu egbe khọn nẹ, ẹ i ghi tọ. Igiowa ra okpẹvbo gha fian egbe ye iheva gha gu egbe khọn, te ọ zagha. 26Erriọ vbe nọ, a deghẹ otu ọkpa gu otu nọkpa khọn vbe arriọba Esu, ọ ni rhie ma ighe iwannegbe la rọ nẹ, te ọ ghi ra zagha. 27Wa khare ighe Bẹlzibọb ọre ọ rhie ẹtin ne I ya khu orhiọn esu ladian mẹ. A deghẹ erriọ nọ, gha ọ rhie ẹtin ne ekpayẹ uwa ya gha khulo iran ladian. Avbe ekpayẹ uwa ọre ọ sosẹe gbe uwa ighe uwa ba odẹ ku nẹ. 28Sokpan Orhiọn Osanobua ọre ọ rhie asẹ mẹ ne I ya gha khulo orhiọn esu ladian, ọ ni rhie ma nian ighe Arriọba Osanobua rre ke uwa yi nẹ.
29“Ọmwa ne ọ gha sẹtin gbe urho la owa ọmwẹtin ya viọ ẹre emwi, ẹ i rrọọ vbe ẹ i rre te ọ ka mu ọmwẹtin ni gba nẹ, ọ te ya viọ ẹre emwi.
30“Ọmwa ne ẹ i rre otu mwẹ, te ọ gunmwẹ gbinna. Ọmwa ne ẹ i gunmwẹ si emwi koko, te ọ duẹ ọre rua a. 31Rhunmwuda ọnii nian, gunmwẹ tama uwa wẹ orukhọ hia ne ọmwa rhirhi ru, ra ẹmwẹ dan hia ne ọmwa a rhirhi ta, a gha ya bọ e, sokpan ọmwa ne ọ fi unu ghe Orhiọn Ne Ọ Huanrẹn a i ya bọe. 32Ọmwa gha fi. unu gie ovbi ọmwa, a gha ya bọe, sokpan ọmwa ne ọ fi unu gie Orhiọn Ne Ọ Huanrẹn, a i ya bọe nian ra ẹdẹdẹmwẹdẹ.
Erhan Kevbe Ọmọ Rẹn
(Luk 6:43-45)
33“Erhan esi ọre ọ mọ ọmọ esi. Erhan dan ọre ọ vbe mọ ọmọ dan, rhunmwuda ọmọ erhan ọre a ya rẹn erhan. 34Wa ne ẹyẹn ne emwi dan, vbe ẹmwẹ esi ighi te ra ke uwa unu ladian hẹẹ? rhunmwuda, emwi ne ọ rre ekhọe ọre unu na ta ladian. 35Aza emwi esi ne ọ mwẹ, ọre ọmwa esi ke viọ emwi esi ladian. Aza emwi dan ne ọ mwẹ, ọre ọmwa dan ke viọ emwi dan ladian.
36“Ne I tama uwa, ọ gha sẹ ẹdẹ ibuohiẹn, dọmwadẹ ọghọe gha la erhan ẹzọ ba ẹmwẹ oya ne ọ ya unu ẹnrẹn ta. 37Rhunmwuda, ẹmwẹ ne unu ruẹn ọre a ra lele bu ohiẹn ruẹn. Ọ ma ghi bu ase nuẹn, ọ ghi bu abe gbuẹ.”
Iran Nọ Iwinna Ọyunnuan
(Mak 8:11-12; Luk 11:29-32)
38Eso vbe uwu iran ni ma emwa Uhi kevbe avbe Farisi tama rẹn wẹẹ, “Ọmaemwaemwi, winna iwinna ọyunnuan ọkpa ma ima.” 39Jesu wanniẹn wẹẹ, “Emwa dan ni ma rẹn Osanobua ọre orre na wa khin! Ẹ i re iwinna ọyunnuan wa nọ rẹn? Iwinna ọyunnuan ne a gha rhie ma uwa i ghi vbe rrọọ gberra ọghe Jona ne akhasẹ. 40Zẹ vbene Jona ya avan eha kevbe asọn eha vbe uwu ẹko ehẹn nọkhua, erriọ ọre Ovbi Ọmwa gha ya avan eha kevbe asọn eha vbe uwu otọ. 41Ọ gha sẹ Ẹdẹ Ibuohiẹn, emwa Ninevi gha kpaegbe ba uwa ifi ẹzọ rhunmwuda iran fiwerriẹ vbe iran họn ikporhu e Jona. Ne I tama uwa, emwi ne ọ sẹ Jona rre emwa na. 42Vbe Ẹdẹ Ibuohiẹn, ọba okhuo odẹ Ekẹn agbọn gha kpaegbe ba uwa ifi ẹzọ rhunmwuda rẹn ke otọe arriavbehe gha dee do danmwehọ ẹwaẹn Solomọn. Ne I tama uwa, emwi ne ọ sẹ Solomọn rre emwa na.
Ohimwianrre Orhiọn Dan
(Luk 11:24-26)
43“Orhiọn dan gha kpao vbe uwu ọmwa rre, ọ ghi gha zozo lele ehe ne ọ mu ohioro hia khian adeghẹ ọ gha miẹn ehe yakọ yi, adeghẹ ọ ma ghi miẹn, 44ọ ghi kha wẹ, ‘I gha wa werriegbe gha rrie ehe ne I ke si kpao.’ Ọ gha ghi sẹ evba, ighe ọ ghi miẹn wẹ ọmwa rhọkpa i rrọọ, sokpan a kpolo ẹe, a vbe mwamwa emwi hia yi ihe. 45Ẹghẹ ni, ọ ghi ya viọ orhiọn dan ihinrọn. ni rhia sẹ irẹn ba egbe gha dee do gbe ẹkun sotọ. Ẹdẹ agbọn ọmwa ni ghi do kulo sẹ vbene ọ te gha ye. Emwi vberriọ zẹẹ ọre ọra sunu vbe egbe orre dan na.”
Iye Kevbe Etẹn Jesu
(Mak 3:31-35; Luk 8:19-21)
46Te Jesu he ye gu emwa guan vbe iye ẹe kevbe etiọnrẹn rre, iran keghi mudia vbe ore, iran wẹ ne a khama rẹn ighe iran ra guee guan. 47Rhunmwuda ọnii, ọkpa vbe uwu emwa ni mudia vba, tama rẹn wẹẹ, “Iyuẹ kevbe etuẹn mudia khẹ ruẹ vbe ore ne iran guẹ guan.”
48Jesu wanniẹn wẹẹ, “De ọmwa ne ọ re iyemwẹ? De emwa ni re etẹn mwẹ?” 49Ọ keghi nien obọ da avbe erhuanegbe ẹre ọ wẹẹ, “Ya ghe avbe iyemwẹ kevbe etẹn mwẹ. 50Rhunmwuda ọmwa ne ọ rhirhi ru iho Erhamwẹ ne ọ rre ẹrinmwi ọrọre ọtẹn mwẹ nokpia, kevbe ọtẹn mwẹ nokhuo kevbe iye mwẹ.”
Currently Selected:
Matiu 12: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
