Matiu 11
11
Emwa Ne A Gie Ẹre Uhunmwu Ke Ọghe Jọn Rre
(Luk 7:18-35)
1Ugbẹn vbe Jesu ghi gu avbe erhuanegbe ẹre ne iweva guan avbe ẹmwẹ na hia fo nẹ, ọ keghi vbe kpao ya gha ma emwa emwi vbe ẹvbo ni lẹga enii.
2Jọn ghi họn vbe uwu eghan vbene Jesu winna hẹẹ, ọ gie eso vbe uwu avbe erhuanegbe ẹre. 3Iran nọ Jesu wẹẹ, “Tama ima, wẹ ọrọre ọmwa ne Jọn wẹẹ ọ dee ra ne ima gha khẹ ọmwa ọvbehe?”
4Jesu wanniẹn tama iran wẹẹ, “Wa ya tama e Jọn ẹmwẹ ne uwa họn ẹn kevbe emwi ne aro uwa sẹe na. 5Avbe arhu aro bẹghe odẹ, avbe uke khiaẹn, a khue avbe ekhọnmwoti huan, avbe ayin ehọ họn ẹmwẹ, a huẹn avbe ni wulo kpaegbe, a kporhu Iyẹn Ne ọ maa ma avbe ivbiogue. 6Afiangbe ọre ọghe ọmwa ne ọ ma gbe ọkhọnmwẹ ọkhọnmwẹ vbekpa mwẹ.”
7Erhuanegbe Jọn ghi kpao nẹ, Jesu keghi suẹn gha ta ẹmwẹ Jọn ma iran ni gbe ẹbu ye ehe ne ọ ye wẹẹ, “Ẹghẹ ne uwa na bu Jọn gha rrie uwu ato, de egbe ọmwa ne uwa te ro ighe ọ khin? Ebe erhan ne ẹhoho biyo birre? 8De emwi ne uwa ladian ya ghee? Ọmwa ne ọ ye ukpọn haan nọ ra? Ẹguae ọre a na miẹn egbe ọmwa vberriọ. 9Wa tama mwẹ, vbe uwa te ya ghe? Akhasẹ nọ ra? Ẹmwata ọ ni khin, sokpan ne I tama uwa, ọ kpọlọ sẹ akhasẹ. 10Jọn ọrọre ọmwa ne a gbẹn ebe ẹre wẹẹ, ‘Osanobua khare wẹẹ, Ọguọmwadia mwẹ ne I gha gie ne ọ do zẹ odẹ ye otọ khẹ ruẹ ọre ọna khin.’ 11Ne I khama uwa, emwa ni he rrie agbọn na hia, Jọn ne Ọsamẹ ọrọre ne ọ kpọlọ sẹ vbe uwu ehia. Sokpan, ọmwa ne ọ vbe kanmwa sẹ vbe Arriọba ẹrinmwi kpọlọ sẹ ọre. 12Ke ẹghẹ ne jọn ya suẹn gha kporhu do sẹ banbanna, Arriọba ẹrinmwi ke khian ne a ya ẹkiudu dekun, emwa ni wegbe vbe hia ne iran ya ẹtin yae khian ọghe iran. 13Ọ te do sẹ ẹghẹ e Jọn, avbe akhasẹ kevbe Uhi e Mosis, ẹmwẹ Arriọba ni ọre iran gha ta. 14Adeghẹ wa gha ya ẹmwẹ iran yi, e Jọn ọrọre Elaija ne iran khare ighẹ ọ dee. 15Ne ọ mwẹ ehọ gie ẹ họn.
16“De emwi ne I gha ya ivbiorre na gie? Iran yevbe ibiẹka ni tota vbe ẹki. Otu ọkpa ghi van okan mu nọkpa wẹẹ, 17‘Ma kpe ema irhiọha ne uwa, wa ma ku. Ma so ihuan irorinmwi ne uwa, wa ma viẹ.’ 18Vbe Jọn ne Ọsamẹ rre, ọ kegha yo aguẹ, ẹ i vbe da ayọn. Emwa ghi ra kha, iran wẹ, ‘Te ọ mwẹ orhiọn esu.’ 19Ovbi Ọmwa ghi vbe rre, ọ kegha re, ọ kegha da. Emwa ghi ra vbe kha, iran wẹẹ, ‘U ghe ẹre ighe ọmwẹko, ọdayọn, rẹn vbe iran ni koko igho uhunmwu kevbe avbe ẹwobi emwa ọre ọ gba mu obọ!’ Vbene ọ rhirhi a gha ye hẹ, emwi ne a ya ẹwaẹn Osanobua miẹn, ọre ọ kha ene unu ẹwaẹn Osanobua.”
Okpẹvbo Ni Ma Yayi
(Luk 10:13-15)
20Jesu keghi suẹ gha ta ku avbe okpẹvbo hia ne ọ na winna iwinna ọyunnuan, rhunmwuda iran ma zobọ vbe orukhọ ne a ru. 21“Ọ suẹ Korazin! Ọ suẹ Bẹtsaida! Akpawẹ te a winna iwinna ọyunnuan ne a winnaẹn vbe uwu uwa vbe Taia kevbe Saidọn, ẹ i re eban iran ghẹ ghi viọ osọnmwẹ ukpọn ye egbe, zẹ emuẹn yan uhunmwu ne iran ya rhie ma ighe iran zobọ vbe orukhọ ne iran te ru. 22U ghi vbe rẹn nian wẹ, ọ gha sẹ Ẹdẹ Ibuohiẹn, Osanobua gha tohan Taia kevbe Saidọn sẹ uwa. 23Kevbe uwẹ Kapaniọn! Ẹ i re te u tera tọn egbe ruẹ mu ya sẹ ẹrinmwi? A gha sua ruẹ fi ẹrinmwi nehianmwivin! Rhunmwuda, akpawẹ te a winna iwinna ọyunnuan ne a winnaẹn vbe uwu uwẹ vbe Saidọn, ọ gha ye gha rrọọ do sẹ ẹdẹnẹrẹ na. 24Ne I guẹ rẹn nian wẹẹ, ọ gha sẹ Ẹdẹ Ibuohiẹn, Osanobua gha tohan Sọdom sẹ ruẹ.”
Bu Mwẹ Gha Dee Do Hẹwẹ
(Luk 10:21-22)
25Vbe ẹghẹ ọkpa ni, Jesu keghi kha wẹẹ, “Evbavba Nọyaẹnmwa ẹrinmwi kevbe agbọn, I kpọnmwẹ ọn rhunmwuda, emwi ne uwẹ rhie lẹre ne iran ne umẹwaẹn kevbe ni rẹn emwi, u keghi rhie ẹre ma iran ni ma rẹn emwirhọkpa. 26Erriọ wa nọ, Evba vba, vbene ọ yẹ ruẹ kevbe vbene ọ ke ekhọe ruẹ rre ọre u ru ẹe.
27“Erhamwẹ viọ emwi hia mẹ nẹ. Gberra Evbavba, ọmwa ọvbehe ne ọ rẹn ọmọ ẹ i rrọọ, gberra ọmọ, ọmwa ọvbehe ne ọ vbe rẹn Evbavba, ẹ i rrọọ, vbe ẹ i re iran ne ọmọ ho ne ọ rhie ẹre maa.
28“Wa bu mwẹ gha dee, wa hia ne ihẹ nọkhua ne ọ mu wọ ẹre egbe, I gha rhie ikẹtin ne uwa. 29Wa rhie urọnghọn mwẹ ye urhu uwa, wa do ruẹ emwi vbe ehe ne I ye rhunmwuda, ọmwa ne ọ fu kevbe ne ọ mu egberriotọ ọre imẹ khin, wa gha miotọ na hẹwẹ. 30Urọnghọn ne I gha rhie ne uwa ye rọkhọọ, ihẹ ne I gha mu ne uwa ye hogha aa.”
Currently Selected:
Matiu 11: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
