Ezikiẹl 42
42
Owa Eva Ni Diake Ọgua Osa
1Ẹre ọmwa nii na rhie mwẹ gha rrie ẹkpotọ ne ọ ke ore, ọ keghi rhie mwẹ gha rrie owa ne ọ rre odẹ okuọ ọghe Ọgua Osa, ne ọ ma vbe rrei ne owa ne ọ rre odẹ orrie ọghe Ọgua Osa. 2Owa na kegha re ibata erẹnrẹn yan iyerẹnrẹn (168) vbe utanmwẹ, kevbe enẹ yan iyenẹ (84) vbe uvbẹmwẹ. 3Vbe obọkpa vbọ, ọ keghi mu aro da ẹkpotọ ne ọ re ibata enẹyan ọgban ne ọ lele ọkpẹn Ọgua Osa, vbe obọ nọkpa, ọ keghi mu aro da odẹ ne a so ẹre ukpo lele ẹkpotọ ne ọ ke ore. Ọgbagba eha ọ re a bọọ ẹre re, ne ọ ke odọ ghi vbe sikẹ uwu ẹre sẹẹ ne a ka sẹ. 4Ọlẹla keghi rre odẹ okuọ ọghe owa na, uvbẹmwẹ ọnrẹn keghi re ibata enẹirrọ vbugie, utanmwẹ ọnrẹn ibata erẹnrẹn yan iyerẹnrẹn (168) ehe ne a la la rọ keghi rre obọ nii. 5Avbe ughugha ni rre ehe ne ọ yo sẹẹ vbe owa nii, keghi vbe giẹghẹ sẹ ni rre adesẹneva kevbe ni ke otọ, rhunmwuda, ta a silo iran sikẹ uwu ẹre sẹẹ.
6Omuyan ọ re ọ bọlọọ avbe ughugha ni rre eheha na re, a ma vbe ye orre khẹ iran zẹ vbene a ru avbe owa ọvbehe ni rre asẹ nii. 7-8Vbe ehe ne ọ ghi wa ke otọ sẹẹ vbọ ekẹn ore ne ọ rrọ keghi mwẹ imi ne ọ re ibata enẹ yan iyenẹ ne ọ re vbe a fiaẹn ye ihe eva vbe utanmwẹ, ughugha kegha re ibata enẹ yan iyenẹ ne ọ dekẹe. Vbe odukhunmwu vbọ, te ughugha wa gba ẹre sẹ ehe ne ọ sẹe ehe ne ọ rhanmwẹ. 9-10Vbe ototọ avbe ughugha na, vbe obọ ne ọ muda ahọ vbọ, vbe ehe ne a ke suẹn owa nii gha bọ, onurho ne a la fi ẹkpotọ ne ọ rre odẹ ore kegha rrọọ.
Vbe odẹ ekẹn ọghe Ọgua Osa nii, owa ne ọ wa yevbe ọre kegha rrọ, ọ ma vbe rrei ne owa nii vbe odẹ orrie ọghe Ọgua Osa.
11Ọlẹla keghi vbe rre odaro avbe ughugha na, zẹ vbene ọ vbe rrọọ vbe obọ ne ọ mu da okuọ. Obọkpa ọ re a ya mwa ehia, ọkpa ọ re a vbe mwa iran re, egbe onurho ọkpa ọ re ọ vbe rrọọ. 12Onurho ọkpa keghi vbe rre ototọ avbe ughugha ne ọ rre odẹ ekẹn vbe owa nii kevbe odẹ ahọ ne a na suẹn ekẹn ọnrẹn.
13Ọmwa nii keghi tama mwẹ wẹẹ, “Owa nihuanrẹn ọ re eveva na khin. Evba nii ọ re avbe ohẹn ni sẹ ehe ne Nọyaẹnmwa ye na rri avbe emwi izọ ese nihuansẹ ehia. Rhunmwuda ighe te avbe owa nii huanrẹn, evba nii ọ re avbe ohẹn viọ avbe emwi izọese nihuansẹ ehia yi, avbe ọka ne a ya ru imuohan, kevbe avbe ese ne a zọ ye orukhọ, ra ne a ya ha osa werriegbe. 14Avbe ohẹn gha rre uwu Ọgua Osa nẹ, iran na wẹ iran ra ladian, ẹkpotọ ne ọ rre ore, iran ghi bannọ avbe ukpọn nihuanrẹn ne iran yọe vbe iran ga e Nọyaẹnmwa yotọ vbe evba. Iran ghi viọ ukpọn ọvbehe yọ vbe iran a gha rrie ehe ne avbe emwa nii si koko yi.”
Ukpọlọmwẹ Ehe Ne Ọgua Osa Ye
15Ọmwa na ghi mwaa uwu ehe ne Ọgua Osa ye fo nẹ, ọ keghi rhie mwẹ la urho odẹ ahọ ladian, ọ keghi do mwaa evba nii vbe ore ne ọ rrọọ. 16Ọ keghi rhie ọkpọ ne a ya mwa emwi, ọ keghi mwaa odẹ ahọ vbọ ọ kegha re ibata iyeva yan uri enẹ (840). 17-19Ọ keghi ya mwa odẹ okuọ, odẹ ekẹn kevbe odẹ orrie utanmwẹ ọkpa ọ re ehia khin, ibata iyeva yan uri enẹ vbe igienenẹ. 20Ekẹn nii keghi lẹga ehe ne ọ re ibata iyeva yan uri enẹ vbe igienenẹ. Ekẹn ni keghi wannọ ehe ne ọ huanrẹn hin ehe ne ọma huan rre.
Currently Selected:
Ezikiẹl 42: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
