Ezikiẹl 41
41
1Vbe iyeke ọnii, ọmwa na keghi rhie mwẹ gha rrie Ọgua ne ọ ke adesẹ, Ehe Nọhuanrẹn ne ọ rrọọ. Ọ keghi mwẹ ọlẹla ne a la sẹ ọe, ọ kegha re ibata igbe vbe udinmwimwẹ. 2Ibata evairrọvbugie vbe uvbẹmwẹ, ekẹn ne umwẹimimwẹ ọnrẹn re ibata erẹnrẹn kegha rre ọre obọ eveva. Ọ keghi vbe mwa nene Ọgua tobọ ẹre, ọ kegha re ibata erẹnrẹn yan iyeha vbe utanmwẹ kevbe ibata enẹ yan ọgban vbe uvbẹmwẹ.
3Ẹre ọ na gha rrie Ọgua ne ọ ke uwu ẹre sẹẹ vbe ehia. Ọ keghi mwaa ọlẹla ne a la sẹ ọe, ọ kegha re ibata eha vbe udinmwimwẹ, kevbe ibata igbe vbe uvbẹmwẹ, ekẹn ne a gbe ye ọre obọ eveva kegha re ibata iweva vbe umwẹimimwẹ. 4Ọ keghi mwaa nene Ọgua tobọ ẹre, ọ kegha re ibata enẹyan-ọgban vbe igienenẹ. Te a gberra Ọgua ne adesẹ a ke ya sẹ ughugha na. Rẹn keghi tama mwẹ wẹẹ, “Emwa na ọrọre Ehe Nọhuansẹ Ehia.”
Avbe Ugha Ne A Bolo Lele Ekẹn Ọgua Osa
5Ọmwa na keghi mwaa vbene ekẹn ne ọ ke uwu ẹre vbe Ọgua Osa mwẹ imi sẹ hẹ, ọ kegha re ibata igbe. A keghi bọlọ ivbi owa ne ọre ibata ihinrọn yọyọ lẹga ekẹn Ọgua Osa na.
6Avbe owa na hia kegha re omuyan egedege eheha vbene ughugha ọgban na rre dọmwadẹ omuyan ọkpọkpa. Ekẹn ne ọ ke ore ọghe Ọgua Osa vbe dọmwadẹ omuyan na, keghi hẹghẹ sẹ ne ọ rre ototọ ẹre vbene a gha na miẹn wẹ ekẹn nii ọ re a mu owa nii yan vbene ẹ i ghi na vbe yakọ Ọgua Osa hiehiere. 7Ọre a na miẹn wẹ a gha ke ore ghe ekẹn Ọgua Osa, ọ ghi yevbe ne a miẹn wẹ, umwẹmimwẹ ọkpa ọ re ọ wa ke otọ ya sẹ ukhunmwu. A kegha mannọ, ikpawẹ eveva ni vbee ye ekẹn ne ọ ke ore ọghe Ọgua Osa vbe odaro vbe ughugha nii, vbene a gha na sẹtin ke owa ne ọ ke otọ nana ya sẹ ne ọ rre adesẹneva kevbe ya sẹ odukhunmwu.
8-11Ekẹn ni ke ore ọghe avbe ughugha na, kegha re ibata erẹnrẹn erẹnrẹn vbe umwẹmimwẹ. Onurho ọkpa ọ re a la la avbe ughugha ni rre odẹ okuọ ọghe Ọgua Osa, kevbe onurho ọkpa vbe ne ọ rre odẹ ekẹn. I keghi vbe miẹn wẹ ehe ne a mu ekẹn yi ne ọ yo ne ọ re ibata erẹnrẹn vbe uvbẹmwẹ keghi wa Iẹga Ọgua Osa. Ibata igbe ọ re nọ ke otọe kpao, a keghi ya ẹe ye umwọmwẹ ba ẹyotọ avbe ughugha ni lẹga ni rre ekẹn Ọgua Osa nii. Ẹkpotọ ne ọ re ibata enẹ yan ọgban vbe uvbẹmwẹ kegha rre ẹkpo ehe ne ọ yo na kevbe avbe owa ne avbe ohẹn lo vbe ọkpẹn Ọgua Osa.
Owa Ne Ọ Rre Odẹ Orrie
12Vbe odẹ ehe ne ọ wa sẹ zẹẹ ighe ọgbẹlẹzẹ ne ọ rre odẹ orrie Ọgua Osa, iran keghi bọ owa ọkpa ne ọ re ibata igbe yan ikiọkhọe (150) vbe utanmwẹ kevbe ibata igbe yan ikiọkhọe (150) vbe uvbẹmwẹ, ekẹn ne a gbe lẹga ẹre keghi gha re ibata ihinrin vbe umwẹimimwẹ.
Vbene Owa Ni rre Ọgua Osa Sẹ Hẹ
13Ọmwa na keghi mwaa Ọgua Osa vbe ore, ọ kegha re ibata erẹnrẹn yan iyerẹnrẹn (168) vbe utanmwẹ. A gha wa fian Ọgua Osa rra ke odieke ẹre la ọgbẹlẹzẹ ne ọ rrọ gha rrie odẹ ehe ne ọ sẹe vbe odẹ orrie, urremwẹ ọnrẹn kegha re ibata erẹnrẹn yan iyerẹnrẹn (168). 14Ẹkpotọ ne ọ rre vbe a gha fian odaro Ọgua Osa rra, keghi vbe gha re ibata erẹnrẹn yan iyerẹnrẹn. 15Ọ keghi vbe mwaa utanmwẹ owa nii gha rrie odẹ orrie, kẹe kevbe ehe ne a bọe ne ọ suo ladian vbe obọ eveva, ọ keghi vbe gha re ibata erẹnrẹn yan iyerẹnrẹn (168).
Erriẹrriẹ owa Ọgua Osa Ne A Bọe
Ughugha ne a la la Ọgua Osa, Ehe Nọhuanrẹn kevbe Ehe Nọhuansẹ Ehia, 16a keghi ya erhan rhu ẹe ke otọ kpao ya sẹ ewindo. Avbe ewindo na gia khui. 17Ke otọ ya sẹ vbe ọ ya ekherhe gberra uyomwẹ ẹkhu a keghi ya emwi ne a kare rhu ekẹn uwowa hia vbe Ọgua Osa, 18ena kegha re avbe udin kevbe avbe emwi ni zẹẹ ifuẹn. A gha miẹn udin, a ghi vbe miẹn emwi ne ọ zẹ ifuẹn, erriọ iran wa ya lele egbe lẹga ugha nii hia. Ugbaro eveva ọ re ọkpọkpa vbọ mwẹ. 19Ugbaro ọmwa ne ọ mu da udin vbe obọkpa kevbe ugbaro oduma, ne ọ mu da udin vbe obọ nọkpa. Erriọ ọ re ọ wa gha ye lẹga ekẹn nii hia. 20Ke otọ kpao ya sẹ vbe ọ gberra uhunmwu ẹkhu. 21Ikpawẹ onurho ne ọ rre Ehe Nọhuanrẹn nii kegha re umwọmwẹ vbe igienenẹ.
Ogiukpo Ne A Ya Erhan Ru
Vbe odaro onurho ne a la la Ehe Nọhuansẹ Ehia nii, emwi ọkpa ne ọ yevbe Ogiukpo ne a ya erhan ru kegha rrọọ. Ọ kegha re ibata isẹn vbe uyomwẹ, kevbe ibata enẹ vbe uvbẹmwẹ, owẹ ne a ru yọ vbe okhiẹ, ototọ ẹre kevbe ikinnegbe ẹre hia 22erhan ọ re a ya ru ẹe. Ọmwa nii keghi tama mwẹ wẹẹ, “Ọnọna ọrọre eteburu ne a mu ye ehe ne Nọyaẹnmwa ye.”
Avbe Ẹkhu Ẹre
23A keghi yi ẹkhu ye onurho ọlẹla ne a la sẹ Ehe Nọhuanrẹn, ọkpa keghi vbe rre ehe ne a la sẹ Ehe Nọhuansẹ Ehia. 24Iran keghi re ẹkhu obọ eva ne ọ kie la adesẹneva. 25A keghi ka avbe udin kevbe aranmwẹ ni zẹlẹ ifuẹn ye ẹkhu Ehe Nọhuanrẹn nii, zẹ vbene ọ vbe rre egbe ekẹn. A keghi vbe yi ẹkhu erhan ye ọre ehe ne a la la owa nii. 26A keghi giagia avbe ewindo lele ughugha nii, a keghi ya avbe udin munọ ona lele egbekẹn ọnrẹn.
Currently Selected:
Ezikiẹl 41: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
