Ezikiẹl 43
43
E Nọyaẹnmwa Hinmwian Rrie Ọgua Osa
1Ọmwa nii keghi rhie mwẹ gha rrie onurho ne ọ mu aro da odẹ ahọ. 2I keghi ya bẹghe uwanmwẹ ne wainwain ne a ya rẹn ighe Osanobua Izrẹl rre evba vbe ọ ke odẹ ahọ dee. Urhu e Nọyaẹnmwa keghi ye vbe uvannọmwẹ okun, uwanmwẹ ne wainwain nii keghi wan mu otọ hia. 3Umian na keghi yevbe ne i miẹn vbe ẹghẹ ne Nọyaẹnmwa na do fuẹn e Jerusalẹm, kevbe egbe ne I miẹn vbe ọkpẹn Ẹzẹ e Kiẹba. I keghi de mu aro rhuotọ. 4Uwanmwẹ ne wainwain ni keghi la onurho odẹ ahọ la uwu Ọgua Osa.
5Orhiọn e Nọyaẹnmwa keghi tọn mwẹ mu, ọ keghi mu mwẹ la ẹkpotọ ne ọ ke uwu ẹre, ehe ne I na miẹn wẹ uyi e Nọyaẹnmwa wa vuọn Ọgua Osa. 6Ọmwa nii keghi mudia ke mwẹ, I keghi họn vbe e Nọyaẹnmwa ke uwu Ọgua Osa gun mwẹ guan wẹẹ: 7“Ovbi ọmwa, ghe ẹkete mwẹ vbe emwa na. I gha gu ivbi Izrẹl yin emwa na, I ghi vbe gha khaemwisẹ yan iran ẹdẹdẹmwẹdẹ. Ke ivbi Izrẹl kevbe avbe ọba iran, ne ọ gha ye dọlegbe fa eni mwẹ nọ huanrẹn uan, ẹ i ghi rrọọ, ogha re vbekpa ne a na gho ẹbọ ọvbehe nọ, ra vbekpa ne a na re ikun avbe ọba iran sikẹ emwa na nọ, ẹ i ghi dọlegbe sunu. 8Avbe ọba keghi zẹlẹ urho ladian ke urho Ọgua Osa mwẹ dandaandan sẹrriọ ne a na miẹn wẹ ekẹn ọkpa kẹkan ọre ọ wannọ mẹ vbe iran. Iran keghi ya emwi osọnnọ ne iran ru hia gha fa eni mwẹ uan, rhunmwuda ọnii, I keghi fuẹn iran vbe ohu mu mwẹ. 9Banbanna nian, te iran gha dobọ ẹbọ ne iran gho yi, iran ghi vbe viọ avbe ikun ọba iran ladian hin evba rre. Iran gha ru vberriọ, I gha gu iran yin kugbe ẹdẹdẹmwẹdẹ.”
10E Nọyaẹnmwa keghi ye rhie te ẹe wẹẹ, “Ovbi ọmwa, gu ivbi Izrẹl guan vbekpa Ọgua Osa na, ne u gie iran ghe vbene a mwa rẹn bọ hẹ. Ruẹe ne ekhue emwi dan ne iran ru gha mu iran. 11Adeghẹ ekhue emwi ne iran ru mu iran, u ghi rhan otọ vbene a mwamwa Ọgua Osa na bọ hẹ ma iran vbene a mwaa rẹn hẹ, avbe ehe ne a la la rọ kevbe ehe ne a la ladian, vbene ọ khọe, vbene a mwamwa avbe emwi hia hẹ deba emwamwa kevbe ilele ni rrọọ. Gbẹnnẹ avbe emwi na hia yotọ ne iran miẹn ehe na miẹn vbene a mwamwa emwi hia hẹ, ne iran sẹtin gha ru vbene a kha re. 12Ọnọna ọrọre uhi Ọgua Osa: Ehe hia fẹẹrẹ ne ọ lẹga ẹre vbe uhunmwu oke, ne a i halọ lao ke nọhuanrẹn ọ re nọ.”
Ogiukpo
13Omwa ọghe ogiukpo ọ re ọna khin, avbe emwi ne a ya mwa Ọgua Osa ọ re a vbe ya mwa ẹnrẹn. Wa lẹga ototọ ogiukpo nii, a keghi fian uvun ne ọ re akhuẹn ikpihianbọ ugie vbe uvbẹmwẹ kevbe ugie vbe udinmwimwẹ lẹga ẹre a keghi ma okhiẹ ọre ne a mu ladian ne ọ re akhuẹn ikpinhianbọ igbe vbe uyomwẹ. 14A gha ke otọ mwa rẹn, ehe ne ọ laghe otọ sẹ vbe ogiukpo nii kegha re ibata enẹ. Ne ọ ghi vbe lele ẹe keghi re akhuẹn ikpinhianbọ ugie ghe uwu ẹre, ọ kegha re ibata ihinrọn vbe uyomwẹ. Ne ọ ghi vbe lele ẹe ọnii keghi vbe re akhuẹn ikpinhianobọ ekigbesiyeha ghe uwu ẹre vbe igienenẹ. 15Ne ọ ke okhunmwu na, ne ọ vbe re ehe ne a na gien emwi izọese keghi vbe re emita eva vbe uyomwẹ, ehe ne ọ na si ukpẹ ladian vbe obọ enenẹ keghi vbe yo sẹ ehe ne ọ ke odukhunmwu vbọ nii. 16Odukhunmwu ogiukpo na keghi gha re umwọmwẹ vbe igienenẹ ibata ugie vbe ehe hia. 17Adesẹneva re kevbe gha re umwọmwẹ vbe igienenẹ ibata enẹyan ugie vbe egbe hia, ọ keghi vbe mwẹ ehọ, ne a ma lẹga ẹre, ọ na kegha re akhuẹn obọ igbe vbe uyomwẹ (Uvun ne ọ lẹga ẹre kegha re akhuẹn ikpinhianbọ ugie vbe uvbẹmwẹ.) Ikpawẹ ne a nana hin nene ogiukpo kegha rre obọ ne ọ laghe odẹ ahọ.
A Ya Fi ohan Ọghe Nene Ogiukpo
18E Nọyaẹnmwa ne Udazi keghi tama mwẹ wẹẹ, “Ovbi ọmwa, danmwehọ ẹmwẹ ne I ra tama ruẹn na, a ghẹ ghi bọ nene ogiukpo nẹ, u ghi gien emwi izọese vbọ, ne u ya ọnii ya ẹe fi ohan, u ghi miẹn esagiẹn emwi ne a ya zọ ese yan rẹn. 19Avbe ohẹn ni re ẹwae Livai, ni vbe re ivbi uniẹn Zadọk, iran ni ọkpa ọ re ọ gha rrie odaro mwẹ do gha ga mwẹ. Mẹ ne Nọyaẹnmwa ne Udazi ọ re ọ yi iyi na. U ghi mu ovbi ẹkhuia ẹmila ne iran ya zọ ese ye orukhọ. 20U ghi rhie vbe esagiẹn ọnrẹn, u ghi sa ẹe yan ehe ne ọ yuo ladian vbe odukhunmwu ogiukpo vbe dọmwadẹ ehọ ẹre, u ghi vbe sa ye adesẹneva ogiukpo, kevbe lẹga ehọ ẹre hia. Odẹ vberriọ, u gha ya ogiukpo khian nọhuanrẹn, u ghi vbe ya ẹe fi ohan. 21U ghi mu ẹkhuia ẹmila ne a ya zọ ese ye orukhọ, u ghi gien ọnrẹn uan vbe ehe ne a mwamwa yọ ne a na gha ru ẹe vbe a gha lahin iwewe Ọgua Osa rre nẹ. 22Ẹdẹ ne ọ lele ẹe, u ghi mu ovbukhọ ne ẹ i mwẹ okan, u ghi ya ẹe zọ ese ye orukhọ. U ghi ya esagiẹn ọnrẹn sa afọ ye ogiukpo zẹ vbene u vbe ya ọghe ẹkhuia ẹmila ru ẹe. 23U ghẹ ghi ru ọnii nẹ, u ghi mu ovbi ẹkhuia ẹmila, kevbe ovbi ogho, iran eveva ghi gha re ne ẹ i mwẹ okan. 24U ghi viọ iran bu mwẹ gha dee. Avbe ohẹn ghi zẹ umwẹ ku iran, iran ghi gien iran an zẹ vbe emwi ne a ya zọọ ese ghe mwẹ. 25U ghi gha ya ẹwe ọkpa, ẹkhuia ẹmila ọkpa, kevbe ogho ọkpa zọ ese orukhọ ẹdẹgbegbe la ikpẹdẹ ihinrọn. Ehia ghi wa gha re ne ẹ i mwẹ okan. 26Avbe ohẹn ghi ya ikpẹdẹ ihinrọn họnmwẹ ogiukpo, ne iran ya mu ẹre egbe yotọ khẹ ẹghẹ ne a gha ya lo ẹre. 27Uzọla ọkpa ghẹ ghi gberra nẹ, avbe ohẹn ghi suẹn gha zọ ese vbe ogiukpo nii, ese ne a gien uan kevbe ọghe isara ọghe emwa nii. Ẹghẹ nii, ẹko uwa hia ghi do gha rhiẹnrhiẹn mwẹ. Mẹ ne Nọyaẹnmwa ne Udazi ọ re ọ tae.”
Currently Selected:
Ezikiẹl 43: EDO96
Highlight
Copy
Compare
Share
Want to have your highlights saved across all your devices? Sign up or sign in
@ The Bible Society of Nigeria, 1996
