Roma 4
4
Nʊngtǝm Nǝn Kɛl Ibrahimi
1N wɛ bǝ sʊwa lɛ a dul Ibrahimi, tʊga tʊgalam bǝnɨ a mʊgɔ bʊtɔɨ? 2Na na Ibrahim a yǝlam nǝ dǝngdǝng a makajǝng gǝnɔ gǝmɨ, na nǝngǝn nǝn jʊ nɨ maam lɨyal lɛɨ, ke bɔ a kǝga Kwaamaɨ. 3N wɛ mʊlalɨgɔ a sʊwaɨ? “Ibrahim a nǝ bɨlǝngkɛl a daa Kwaama woi, nǝtǝm bɨlǝngkɛl gǝnɔ nǝn gɔ a dǝg ja kiyo gǝn n nǝ dǝngdǝng a daagɔ Kwaama woi.” 4Nʊ nɨ maa maajɨ lɛɨ, ywatǝm gǝnɔ ke bɔ nǝtǝm nǝn kwan, a yo a dul maajɨ gǝnɔ a maaɨ. 5Nʊ nɨ a ya bɔ nǝl gǝnɔ a maajɨ nyatǝmɨ, a ya nǝl gǝnɔ a daa Kwaama woi, Kwaama nɨ dǝg nǝb bwɨlangkɛlɔ lɛ a yǝlam nǝb dǝngdǝngɨ, a kiyo nǝtǝm bɨlǝngkɛl gǝnɔ n dǝngdǝng. 6Dauda a sʊwa nyɔ tag a kɛl bwili wʊnɨ ja maa nǝfitʌm nɨ gǝm Kwaama a kiyo ji dǝngdǝngɨ, n ke bɔ a gola maajɨ jin. A sʊwa gɔ,
7“Bwiligɔ na a nǝb nɨ
Kwaama a kǝlǝm jim bwɨlangkɛltɨn jini,
a sɔm bwɨlangkɛltɨn jini.
8Bwiligɔ na a nʊ nɨ
Tɛlalɔ mɨsɔ kiyo bwɨlangkɛl
gǝnɔ lɛ a dul gǝnɨ.”
9Bwili nɨ Kwaama a maam nǝbɔ a biyo mwɛnɨ kwaaji ka? A maa nǝb nɨ gǝm wo a biyo bɔ mwɛnɨ tʌji ka? Jʊ bǝ sʊwa lɛɨ nǝn gɔ, “Kwaama a kiyo nǝtǝm bɨlǝngkɛl Ibrahimi n dǝngdǝng a daa gǝ woi.” 10A dul wɛ a kiyo gǝm jʊ nɨ? Na lǝga bɔ ja biyo gǝm mwɛnɔ ka? A gul biyotǝm mwɛn ka? Ke bɔ a gul biyotǝm mwɛn. A maa nǝn tɨkǝga. 11Biyotǝm mwɛn nɨ ja maa gǝmɨ, gǝ nʊng dǝgtǝm kang gǝ ga yǝlam dǝngdǝng a gola nǝtǝm bɨlǝngkɛl nɨ gǝ nǝngǝn na lǝga bɔ ja biyo gǝm mwɛnɨ. N jʊ nɨ a dǝg gǝn ga yǝlam tɛ bwɛ a nʊ nɨ gwam a nǝ bɨlǝngkɛlɨ, ja biyo bɔ mwɛn, ja kiyo ji a mʊgɔ nǝb dǝngdǝng. 12Nǝn gɔ tag a yǝlam tɛtɛ nǝb biyotǝm mwɛnɨ, nǝb nɨ ke bɔ biyotǝm mwɛn kwaagɔ jǝ nǝngǝnɨ. Jǝ bwangtǝn gola nǝtǝm bɨlǝngkɛl tʊga bǝn Ibrahimi, wʊnɨ tǝgǝn a bwangtǝn na lǝga bɔ ja biyo gǝm mwɛnɨ.
Jǝlatǝm Nǝn Swatǝm Yaa A Gola Nǝtǝm Bɨlǝngkɛl
13Swatǝm yaa nɨ ja maa Ibrahim gǝm jǝbɔ dʊʊm gǝnɨ, sʊwa lɛ gɔ ja ja kʊla yooligɨɨ, a bɛ bɔ a gola diil. N gola dǝngdǝng nɨ jǝ nya lɛ a gola nǝtǝm bɨlǝngkɛlɨ. 14Na na nǝb bwangtǝm diilɔ nǝji jǝ ja kʊlagɔ lɛɨ, na nǝtǝm bɨlǝngkɛlɔ n jǝl nǝn kwan. Swatǝm yaagɔ tag n jǝl nǝn kwan. 15Jʊ a bwɨɨ, diilɔ gǝ gʊ gʊ nabwɨl Kwaamaɨ. Daa nɨ mɨ diil woi, mɨ kǝltǝm diil wo.
16N kɛl dul jʊ nɨ, Kwaama a nǝ kanjǝl nɨ ga maa swatǝm yaaɨ a nǝb nɨ a nǝ bɨlǝngkɛlɨ. Jʊ nɨ nǝn gɔ a yǝlam lǝma Kwaamaɨ, a yɔ nǝn a dʊʊm Ibrahimi. Ke bɔ a dul nǝb nɨ bwangtǝn diil lɛɨ kwaaji. A yɔ nǝn a nǝb nɨ a nǝ bɨlǝngkɛlɨ kanga Ibrahim a maamɨ. Nǝn gɔ nǝn Tɛtɛ bǝn pʌdi. 17Kanga a mʊla mʊlaɨ gɔ, “N dǝg ń ń yǝlam tɛ a bǝlǝntǝmɔ gǝm a lada.” Nǝn gɔ nǝn tɛtɛ bǝn a kǝga Kwaamaɨ, wʊnɨ ga nǝ bɨlǝngkɛl a daa gǝ woi. Nǝn gɔ nǝ kʊlɨ lɛ a bʌlʌntɨnɨ. Nǝn gɔ nǝn kwaan jotǝm jʊtǝb nɨ mɨ woi a yǝlam woi.
18A ya bɔ nǝl a dul gǝn nǝn kang gǝn. A ya nǝl a daa Kwaama woi. A nǝ bɨlǝngkɛl gɔ gǝ yǝlam yǝlam “Tɛtɛ bǝlǝntǝmɨ a lada.” Kanga Kwaama a sʊwa gǝn gɔ, “Bɨlǝngǝn dʊʊm mʊnɔ yǝlam yǝlam a lada.” 19Nǝtǝm bɨlǝngkɛl gǝnɔ a yʌb bɔ. A dʌng bɔ kwaan bʊtɔ gǝnɔ nɨ a maa na bʌlʌni, jʊ a bwɨɨ jol gǝnɔ a la fʊlkʊb win a kwama gɔ. A dʌng bɔ gɔ Saratu a shu kwaan bʌtʌm bwɛ.
20A kɨɨ bɔ nǝl a dul swatǝm yaa Kwaamaɨ, a bǝla bɔ nǝtǝm bɨlǝngkɛlɔ. A sʊtǝn kwaan a nǝtǝm bɨlǝngkɛl gǝnɔ ga maaɨ, a dʊʊl Kwaama. 21A jǝla nǝn sʊwa lɛ gɔ, Kwaama nǝn kwaan yiitǝm swatǝm yaa gǝnɔ. 22N jʊ a bwɨ “Kwaama a kiyo nǝtǝm bɨlǝngkɛl gǝnɔ n dǝngdǝngɨ.” 23Ja mʊla gɔ, “Ja kiyo gǝn n nǝ dǝngdǝng,” ja mʊlam bɔ gɔ kwaagɔ. 24A yɔ nǝn a kɛl dul bǝn tag. Kwaama kiyo bǝn kiyo bǝ dǝngdǝng bǝn nɨ bǝ nǝ bɨlǝngkɛl a daa nʊ nɨ a gung Yesu Tɛlalɔ bǝn a bwaaɨ. 25Wʊnɨ ja jʌ a kɛl dul bwɨlangkɛl bǝnɨ, Kwaama a gung gǝn sǝ bǝ yǝlam dǝngdǝng a daa gǝ woi.
Currently Selected:
Roma 4: DBD
Highlight
Share
Compare
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
