Roma 3

1Yahudawagɔ nǝn kaa jǝl wʊnɨ ja laam Bʌtʌbɔ nǝnɨ ka? N wɛ biyotǝm mwɛnɔ gǝ sʊ lɛɨ? 2Gǝ maa maa nyɔ a golantɨnɔ a lada! Nǝn tɨkǝga Yahudawagɔ nǝji Kwaama a jǝla nǝn ji a nǝ ji kɛl gǝnɨ.

3Maa nyǝn na kaamɨ n nǝb jatǝm swatǝm yaaɨ? Jatǝm swatǝm yaa jinɔ kal kal tatǝm swatǝm yaa Kwaamaɨ ka? 4Ɔ ɔ mɨ nyɔ! Bɨlǝngǝn Kwaama n Nǝ dǝngdǝng, mɨ nyǝmatǝm wo. Nǝbɔ gwam n nǝb gabakɛl. Kanga a mʊla mʊlaɨ gɔ,

“Na ń sʊwa kɛlɨ,

jǝ nya n bɨlǝngǝn,

mʊ ja ja kɛl mʊnɔ

na ja yɔ nǝn mɔ

a kan borangɨ.”

5Na maajɨ bwɨla bǝnɔ a nʊng gɔ Kwaama n nǝ dǝngdǝngɨ, n wɛ bǝ sʊwa lɛɨ? Bǝ sʊwa sʊwa bǝngɔ Kwaama a maa jǝ bwɨla a mwɛ bǝnɨ ka? (Mǝ sʊwa kɛl nǝfilii.) 6Mɨ nyɔ! Na gǝ na nyɨɨ, Kwaama la maa yooligɔ gǝm borang nyǝn? 7Na a dul kɛl gabakɛl mǝndɨ, bɨlǝngkɛl Kwaamaɨ sʊ sʊ nʊngtǝmɨ, jǝ sʊ sʊ dʊʊltǝm gǝnɨ, n wɛ a bwɨ kǝngkɔ jǝ maa mɨ borang lɛ gɔ mǝ nǝ bwɨlangkɛlɨ? 8Na gǝ na nyɨɨ, bɛ ya bǝ maa jǝ bwɨla lɛ, sǝ a yǝlam bǝm gola nyatǝm jǝ nya, kanga kaamɨ gǝ kǝl nǝm lɛ gɔ nǝ sʊwa nyɨɨ ka? Biyotǝm borang nɨ jǝ maa nǝb nɨ gǝm lɛɨ n dǝngdǝng.

Mɨ Nǝl Wo Win N Nǝ Dǝngdǝngɨɨ

9A maa nyǝn? Nǝn Yahudawagɔ nǝn laa Bʌtʌbɔ ka? Ɔ ɔ mɨ nyɔ! Jʊ a bwɨɨ galɨgǝn nǝ do Yahudawagɔ jǝbɔ Bʌtʌbɔ nǝngɔ pʌd jinɔ bwɨlangkɛlɔ maa fɔlɔn nɛ a dul jin. 10Kanga a mʊla mʊlaɨ sʊwa lɛ gɔ,

“Mɨ nʊ nɨ wo dǝngdǝngɨ,

mɨ wo win,

11mɨ nǝ nyǝmtǝm wo,

mɨ nʊ nɨ wo saa Kwaama lɛɨ.

12Gwam jinɔ ja yǝla nǝn gul,

ja yǝlam bwɨlang jǝl gwam,

mɨ nʊ nɨ wo maa maajɨ nyan nɛɨ,

mɨ wo win.”

13“Mɨya jinɔ a maa na tuutɨnɔ a wumo wumoi,

bentɨn jinɔ gǝ maa gabakɛl,

kɛltɨn jinɔ a maa

na twalǝm faatɨn.”

14“Nyiyo jinɔ na lagtǝm jǝbɔ tuwolatǝm nǝb.”

15“N nǝb tǝlatǝm tʊʊm dǝbǝr.

16Daa nɨ gwam ja yɔ woi,

n kaltǝm jǝbɔ fitǝm nǝl.

17Ja nyǝm bɔ gola

yɨm kwamɨgǝn.”

18“Mɨ nyʊwatǝm taal Kwaamaɨ wo, a nu jin.”

19Bǝ kwɛl bǝ nyǝm nyǝmɨ jʊ nɨ gwam diilɔ a sʊwaɨ, gɔ a yɔ nǝn nǝb nɨ a mʊgɔ gǝnɨ, jʊ a bwɨɨ sǝ a tɨ nǝn tabatǝm fɨɨ nǝbɨɨ, sǝ yooli nɨ gwam a nyǝm jǝ na a mʊgɔ borang Kwaamaɨ. 20Mɨ nʊ nɨ wo yǝlam lɛ dǝngdǝng a kǝga Kwaamaɨ a gola kɨlatǝm diili, n gola diil bǝ kuwo bwɨlangkɛl bǝnɔ lɛɨ.

Dǝngdǝng A Gola Nǝtǝm Bɨlǝngkɛl

21Kǝngkǝnɨ, kaa gola nyatǝm dǝngdǝng Kwaamaɨ wo, ke bɔ a gola diil, wʊnɨ langǝn bwangǝntɨn Musaɨ jǝbɔ a nǝbkuwotǝmkǝgagɨɨ a nǝ nyiyo a dul gǝnɨ. 22Dǝngdǝng nɨ na a Kwaamaɨ, wʊnɨ nyatǝm gǝnɔ n gola nǝtǝm bɨlǝngkɛl a daa Yesu Kiristi woi a nǝb nɨ gwam a nǝ bɨlǝngkɛlɨ, mɨ nʊngtǝm wo nǝn dʌmʌn.

23Jʊ a bwɨɨ nǝfitʌmɔ gwam a maa bwɨlangkɛl, ja gɨya tag a dʊʊlǝn Kwaamaɨ. 24Kwaama a dǝg ji ja yǝlam dǝngdǝng a mʊgɔ lǝma gǝnɔ gǝm nǝn kwan, ja nya jǝgtǝm dul nɨ a gola Kiristi Yesui. 25Kwaama a tʊng Yesu Kiristi, a yǝlam tǝlatǝm tʊʊm twama na kǝlǝmtǝm bwɨlangkɛl. N gola nǝtǝm bɨlǝngkɛl a daa gǝ woi. Kwaama a maa nyɔ sǝ a nʊng dǝngdǝng gǝnɔ, jʊ a bwɨɨ galɨgǝn n bwatǝm nǝl gǝnɔ a mam nu a bwɨlangkɛltɨn nɨ ja kwɛl ja maaɨ. 26Kwaama a maa nyɔ sǝ a nʊng dǝngdǝng gǝnɔ a kwama nɨ, gǝ nǝn dul gǝn n nǝ dǝngdǝng, nʊ nɨ a dǝg ji ja yǝlam dǝngdǝng a nǝtǝm bɨlǝngkɛl a daa Yesu woi.

27Maatǝm lɨyal bǝnɔ n fee? Mɨ wo! N gola diil won? N gola diil maatǝm maajɨ nyan ka? Ɔ ɔ! N gola diil nɨ bɛ lɛ nǝn nǝtǝm bɨlǝngkɛlɨ. 28Jʊ a bwɨɨ, bǝ do n gola nǝtǝm bɨlǝngkɛl nǝfili a yǝlam dǝngdǝngɨ, n ke bɔ kɨlatǝm diil. 29Kwaamagɔ n Kwaama Yahudawagɨɨ kwaaji ka? Ke bɔ a Bʌtʌbi tʌji ka? N bɨlǝngǝn na a Bʌtʌbi tʌji. 30Kanga nɨ Kwaama win swar, dǝg nǝb biyotǝm mwɛnɔ lɛ a yǝlam dǝngdǝng a dul nǝtǝm bɨlǝngkɛlɨ, n kanga dǝg nǝb nɨ lɛ a biyo bɔ mwɛnɨ ja yǝlam dǝngdǝng a gola nǝtǝm bɨlǝngkɛl tʌjii. 31Bǝ kalǝm diilɔ a gola nǝtǝm bɨlǝngkɛl nɨ ka? Ɔ ɔ, mɨ nyɔ! N jǝlatǝm nǝn bǝ maaɨ.

Currently Selected:

Roma 3: DBD

Highlight

Compare

Copy