Roma 5
5
Yɨm Kwamɨgǝn Jǝbɔ Yatǝm Nǝl
1Gǝ na nyɔ bǝn nɨ Kwaama a kwɛl a dǝg bǝn bǝ yǝlam dǝngdǝng a kɛl nǝtǝm bɨlǝngkɛlɨ, bǝ nǝngǝn nǝn yɨm kwamɨgǝn jǝbɔ Kwaama, a gola Tɛlalɔ bǝn Yesu Kiristii. 2N daa gǝ woi bǝ nya lǝma nɨ bǝ yǝm woi, a gola nǝtǝm bɨlǝngkɛl. Bǝ maa lɨyal lɛ jǝbɔ yatǝm nǝl a dʊʊlǝn Kwaamaɨ. 3A sʊtǝnɨ, bǝ maa lɨyal lɛ nǝn nɔɔtǝm gaalan bǝnɔ. Bǝ nyǝm nɔɔtǝm gaalanɔ nǝn gɔ gǝ bɛ lɛ nǝn bwatǝm nǝlɨ. 4Bwatǝm nǝlɔ nǝn gɔ gǝ bɛ lɛ nǝn nǝl nyaɨ. Nǝl nyagɔ tag nǝn gɔ bɛ lɛ nǝn yatǝm nǝlɨ. 5Yatǝm nǝlɔ mɨ gǝ bɛ lɛ nǝn gunidul, jʊ a bwɨɨ Kwaama a kwɛl a tal swɨtǝm gǝnɔ a nǝl bǝnɔ gǝm, a gola Yʊwa Kwaamaɨ nɨ ga nǝ bǝnɨ.
6A dǝngdǝng kwama nɨ, kwama lǝga bɔ bǝ kwamɨ, Kiristi a bʊla a kɛl dul nǝb nɨ a nyǝm bɔ Kwaamaɨ. 7Bwa bwa ja nya nʊ nɨ nǝ kʊlɨ gǝnɔ lɛ a kɛl dul nʊ nɨ n nǝ dǝngdǝngɨ, maa maa nyɔ ja nya kaa nʊ nɨ kʊ nǝl lɛ a nǝ kʊlɨ gǝnɔ a kɛl dul nǝ nyaɨ. 8Kwaama a nʊng bǝn swɨtǝmɔ gǝ maa bǝm lɛɨ, nǝn kwama bǝ nǝb bwɨlangkɛlɨ, Kiristi a bʊla a kɛl dul bǝn.
9Kanga kǝngkɔ bǝ yǝlam dǝngdǝng a gola tʊʊm gǝn, laa na nyǝn a bʊʊtǝmɔ bǝ nya lɛ a nabwɨl Kwaamaɨ a gola gǝnɨ. 10Na a kwamagɔ bǝ nǝb kiim Kwaamaɨ, ja dɔ kʊm bǝnɔ ja fɛka bǝn a gola bwaa Bʊla gɨɨ, la na nyǝn, na ja dɔ kʊm bǝnɔ ja fɛka bǝnɨ, bǝ bʊʊ bʊʊ a gola kʊlɨ gǝnɔ gǝm! 11A sʊtǝnɨ, bǝ maa lɨyal lɛ tag nǝn Kwaama a gola Tɛlalɔ bǝn Yesu Kiristii, wʊnɨ n daa gǝ woi ja dɔ kʊm bǝnɔ ja fɛkaɨ.
Adamu Jǝbɔ Kiristi
12Kanga bwɨlangkɛlɔ a dɔ yooligɔ a gola nǝl wini, bwɨlangkɛl nɨ nǝn gɔ a bɛ nǝn bwaaɨ, n jʊ a bwɨ bwaagɔ a yǝlam kʊla nǝbɨɨ gwamɨ, jʊ a bwɨɨ pʌd bǝ maa bwɨlangkɛl. 13Bɨlǝngǝn, bwɨlangkɛlɔ wo a yooli nɨ na lǝga bɔ ja nǝ diilɔ. Daagɔ mɨ diil woi, mɨ jǝ kiyo bwɨlangkɛlɔ lɛ. 14Bwaagɔ a tǝl nǝn Adamu a yɔ nǝn a daagɔ Musa woi. A yɔ nǝn tag a dul nǝb nɨ bwɨlangkɛl jinɔ a maa bɔ na bwɨlangkɛl Adamui, wʊnɨ a jelka nʊ nɨ bɛ lɛɨ.
15Nǝtǝm Yesui nɨ mɨ dǝngdǝng jǝbɔ bwɨlangkɛl Adamui. Bwɨlangkɛl nʊ nɨ wini a gʊ nǝb nɨ a lada nyɨɨ gǝm bwaa. La na nyǝn a lǝma Kwaamaɨ jǝbɔ nǝtǝm nɨ a bɛ a gola nǝfilii win swarɨ, Yesu Kiristi, a sʊ nǝbɔ gǝm a lada nyɨɨ! 16Nǝtǝm lǝma Kwaamaɨ nɨ mɨ nyɔ na bwɨlangkɛl nʊ nɨ wini. Jʊ a bwɨɨ biyotǝm borang nɨ ja maa a dul bwɨlangkɛl nʊ nɨ wini, n jʊ a bɛ nǝn kalatǝmɨ. Nǝtǝm nɨ ja nǝ a bwɨlangkɛltɨn nɨ a lada nyɨɨ, n jʊ dǝg lɛ bǝ yǝlam dǝngdǝngɨ. 17Na n dul bwɨlangkɛl nʊ nɨ win bwaagɔ a wɔɔ nǝbɔ gwamɨ, la na nyǝn a nǝb nɨ a nya lǝma a lada, jǝbɔ nǝtǝm wʊnɨ n dǝngdǝng Kwaamaɨ? Jǝ maa fɔlɔn a mʊgɔ kʊlɨ, a gola nʊ nɨ wini, nǝn gɔ nǝn Yesu Kiristi.
18Kanga bwɨlangkɛl nʊ nɨ wini a gʊ nǝbɔ gǝm gwam kalatǝmɨ, gǝ na nyɔ tag maajɨ dǝngdǝng nʊ nɨ wini a dǝg nǝbɔ gwam a yǝlam dǝngdǝng nǝn kʊlɨ. 19Kanga nǝbɔ a lada a yǝlam nǝb bwɨlangkɛl a gola nʊ nɨ win a kɔ bwangtǝm jʊ ja sʊwa gǝnɨ, na nyɔ nǝbɔ a lada yǝlam yǝlam nǝb dǝngdǝng a gola nʊ nɨ win a bwangtǝn jʊ ja sʊwa gǝnɨ.
20Ja dɔ nǝn diilɔ sǝ bwɨlangkɛlɔ a jel a talɨ. Daagɔ bwɨlangkɛlɔ a sʊtǝnɨ, lǝma Kwaamaɨ gǝ sʊ sʊ a laa nyɔ. 21Kanga bwɨlangkɛlɔ a maa fɔlɔnɔ a gola bwaaɨ, na nyɔ tag lǝma Kwaamaɨ maa fɔlɔnɔ a gola dǝngdǝng, sǝ a nǝ bǝn kʊlɨ nɨ mɨ dɨtǝm woi a gola Yesu Kiristii, Tɛlalɔ bǝn.
Currently Selected:
Roma 5: DBD
Highlight
Share
Compare
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
