Roma 2
2
Borang Kwaamaɨ N Dǝngdǝng
1A dul kɛl nɨɨ, mɨ mʊ nǝn tabatǝm fɨɨ mʊ nǝfili, mʊ nɨ mʊ maa nǝl gǝm borang lɛɨ. Kwama mʊ maa nǝl gǝm borang lɛɨ, mʊ tǝmʊn ń mwatɨ dul mʊnɔ gǝm borang, jʊ a bwɨɨ mʊ nɨ mʊ maa borang lɛɨ mʊ maa nyɔ tǝmʊn. 2Bǝ kwɛl bǝ nyǝm nyǝmɨ borang Kwaamaɨ a dul nǝb nɨ maa lɛ nyɨɨ, n dǝngdǝng. 3Mʊ nǝfili, na mʊ maa nǝb nɨ maa bwɨlangkɛl lɛɨ gǝm borangɨ, na mʊ tǝmʊn mʊ maa lɛ nyɨɨ, mʊ bʊʊla lɛ mɔʊ mʊ bʊʊ bʊʊ borang Kwaamaɨ ka? 4Mʊ soga soga yotǝm lǝma gǝnɔ nɨ a lada nyɨɨ jǝbɔ kʊtǝm nǝl gǝnɔ ka? Mɔ nyǝm bɔ n lǝma Kwaamaɨ a gʊ ń, mʊ yǝla mʊ bǝla bwɨlangkɛl mʊnɨ ka?
5N wɔ bǝngɨ lɔl mʊnɔ jǝbɔ nǝl mʊnɔ nɨ a jǝla bɔ fɛkalɨɨ, mʊ sʊ dul mʊnɔ gǝm nabwɨl Kwaamaɨ lɛ nǝn kɔkɔ nɨ ja nʊng gɔ borang Kwaamaɨ nɨ n dǝngdǝngɨ. 6Kwaama ywa ywa nǝbɔ gwam maajɨgɔ ja maaɨ.#2:6 Dʌng: Zabura 62:12; Mʊsǝn Kɛl 24:12. 7Nǝ nǝ kʊlɨ nɨ mɨ dɨtǝm woi a nǝb nɨ a ja kǝga nǝn maatǝm jǝ nyaɨ, nǝb nɨ saa dʊʊlǝn nɛ jǝbɔ gungtǝmɨ. 8A nǝb nɨ swɨ dul jinɔ lɛ jǝbɔ nǝb nɨ a kɔ bwangtǝm bɨlǝngkɛlɔ jǝ maa bwɨlan nɛɨ, ywa ywa nǝn nabwɨl jǝbɔ kaltǝm nǝl. 9Nǝb nɨ gwam maa bwɨlan nɛɨ, jǝ nɔɔ nɔɔ gaalan jǝbɔ gʌtǝm. Tǝl nǝn Yahudawagɔ, sǝ a la Bʌtʌbɔ. 10Kwaama nǝ nǝ dʊʊlǝn jǝbɔ gungtǝm, jǝbɔ yɨm kwamɨgǝn, a nǝb nɨ gwam a maa jǝ nyaɨ. Tǝl nǝn Yahudawagɔ, sǝla Bʌtʌbɔ. 11Jʊ a bwɨɨ, Kwaama mɨ nǝn swɨtǝm dul.
12Nǝb nɨ a maa bwɨlangkɛl ja nyǝm bɔ diil woi, jǝ kala kala ke bɔ a gola diil. Nǝb nɨ a maa bwɨlangkɛl a mʊgɔ diili, jǝ maa jim maa borang a gola diil. 13Ke bɔ nǝbɔ a nyʊwa diili n nǝbɔ dǝngdǝng a kǝga Kwaamaɨ, n nǝb nɨ bwangtǝn diil gǝnɔ lɛɨ n nǝb dǝngdǝngɨ. 14Na Bʌtʌbɔ, nǝb nɨ mɨ ji nǝn diili, bʊtɔ jinɔ a nʊng ji kanga jǝ bwangtǝn diilɔ lɛɨ, jǝ diil nǝn dul jin, mɨ ji nǝn diil sul. 15Makajǝng jinɔ nʊng ji lɛ gɔ, jʊ nɨ diilɔ a sʊwa ji gɔ ja maaɨ, a mʊla mʊlaɨ a nǝl ji, nǝl jinɔ jǝbɔ bʊʊlalɨ jinɔ tuwo ji lɛ a kaa gola, kʌshi ji lɛ a kaa gola. 16Jʊ nɨ bwɨ nǝn kumɔ Kwaama maa nǝfitʌmɔ gǝm borang lɛ a gola Yesu Kiristii, a jʊ nɨ jǝ maa lɛ daddadɨ, kanga fulon kɛl lǝmɨ nɨ mǝ kiyo lɛɨ a sʊwaɨ.
Yahudawagɔ Jǝbɔ Diilɔ
17Na ń sʊwa mɔʊ, mʊ bwɛ Yahudaɨ, na mʊ ya nǝl a diili, mʊ maa lɨyal lɛ nǝn Kwaamaɨ, 18na ń kwɛl ń nyǝm jʊ swɨ lɛɨ, mʊ nyǝm kanjǝlɔ lɛ dǝngdǝngɨ, kanga mʊ nyǝm diili, 19na ń jǝla nǝn dul mʊnɔ mɔʊ mʊ nǝ tatǝm dwam kululʌmi, mʊ nyalǝm a kʊm nǝb nɨ a kumtojilii, 20mʊ nʊ nɨ mʊ ga nǝb nɨ lɛ a swɛla swɛlaɨ, mʊ mɛla bɛtɔ dwalǝnɔ gǝm lɛɨ, jʊ a bwɨɨ a mʊgɔ diilɔ mʊ nǝngǝn nǝn nyǝmtǝm jǝbɔ nyǝmtǝm bɨlǝngkɛl nyangǝn.
21Mʊ nʊ nɨ mʊ mɛla kaa nǝl gǝm lɛɨ, mɨ mʊ mɛla dul mʊnɔ gǝm lɛ ka? Mʊ nʊ nɨ mʊ maa mɛlalɨ lɛ mɔʊ ka jǝ́ kuu lɛ kuuli, mɨ mʊ kuu kuul lɛ ka? 22Mʊ nɨ mʊ sʊwa lɛ mɔʊ ka nǝbɔ ya maa lɛ buloni, mɨ mʊ maa lɛ ka? Mʊ nɨ mʊ kɔ shom lɛɨ, mɨ mʊ kuu kuul lɛ a kan shomi ka? 23Mʊ nɨ mʊ maa lɨyal lɛ nǝn diili, ke bɔ sogan mʊ maa Kwaama gǝm lɛɨ ka, na ń kǝl diilii? 24Kanga a mʊla mʊlaɨ gɔ, “N kɛl dul jen Bʌtʌbɔ kal dun Kwaamaɨ lɛɨ.”
25Biyotǝm mwɛnɔ a bʊm, na mʊ bwangtǝn diilɔ lɛɨ. Na mɨ mʊ bwangtǝn lɛɨ, biyotǝm mwɛn mʊnɔ mɨ a nyiyo kaa jǝl. 26Na nʊ nɨ a biyo bɔ mwɛnɨ, bwangtǝn jʊ lɛ Kwaama a sʊwa a mʊgɔ diili, mɨsɔ bʊm lɛ ja kiyo gǝn a kʊm nǝb nɨ a biyo mwɛnɨ ka? 27Nʊ nɨ biyotǝm mwɛnɔ ke bɔ jǝfʊlǝn gǝnɨ, n wɔ bwangtǝn diilɔ lɛ dǝngdǝng, mwatɨ mʊn mwatɨ borang mʊ nʊ nɨ mʊ nǝngǝn nǝn diilɔ a mʊla mʊlaɨ jǝbɔ biyotǝm mwɛnɨ, mɨ mʊ bwangtǝn nɛɨ.
28Bwɛ Yahuda nyanɔ, n ke bɔ nʊ nɨ mʊlalɨ bʊtɔ gǝnɔ a nʊng a talɨ gɔ n bwɛ Yahudaɨ. Biyotǝm mwɛn nyanɔ, n ke bɔ biyotǝm tɛ bʊtɔ a talɨ. 29Nʊ nɨ n bwɛ Yahuda a mʊgɔ nǝlɨ, nǝn gɔ n bwɛ Yahuda nyanɨ. Biyotǝm mwɛn nyanɔ gǝ na a mʊgɔ nǝl, a mʊgɔ yʊwa, ke bɔ biyotǝm tɛ bʊtɔ. N nʊ nɨ Kwaama bǝlá gǝn nɛɨ, ke bɔ nǝfilii.
Currently Selected:
Roma 2: DBD
Highlight
Share
Compare
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
