Roma 14
14
Bɛ Ka Ń Ya Lɛ Kɨla Mɔ Gǝm Bwɨlangkɛl
1A dul nʊ nɨ nǝtǝm bɨlǝngkɛl gǝnɔ a kwam bɨɨ, bɛ jǝ́ yo gǝn kangɔ yo yo. Ka jǝ́ gʊbka lɛ a dul jʊ nɨ nǝl gǝnɔ swɨ lɛɨ. 2Nǝtǝm bɨlǝngkɛl kaa nǝlɨ a jǝla gǝm gɔ ga ja pʌd jʊ nɨ gǝ swɨ lɛɨ. Nʊ nɨ nǝtǝm bɨlǝngkɛl gǝnɔ a gɨyaɨ, n jǝjalǝn tɔtwam kwaagɔ gǝ ja lɛɨ. 3Bɛ ka nʊ nɨ gǝ ja jǝjalǝn nɨ lɛ gwamɨ, ya soga lɛ nʊ nɨ jǝgam lɛ jǝgamɨ. Bɛ ka nʊ nɨ jǝgam lɛ jǝgamɨ, ya kuwo bwɨlan nʊ nɨ lɛ ja lɛ gwamɨ, jʊ a bwɨɨ Kwaama a kwɛl a yo gǝn yoi kangɔ yo.
4Nǝmɔ mʊ wo mʊ ya bwɨlan nɛ a dul kaa bwɛ jwaalɛ nǝlɨ? Na tɨ tɨɨ, na yal yalɨ, n mwɛ tɛlalɔ gǝnɨ. Jǝ tɨ tɨ nǝn gɔ, jʊ a bwɨɨ Tɛlalɔ nǝn kwaan nɨ tɨ lɛ nǝn gɨɨ. 5Kaa nǝl gǝ kuwo kuwo kaa kum a laa gǝm tangǝn kumtɨnɔ. A kuwotǝm kaa nǝlɨ, pʌd win swar a daa gǝ woi. Bɛ pʌd bǝnɔ bǝ jǝla nǝn jʊ nɨ dǝngdǝngɨ a nǝl bǝn.
6Pʌd nʊ nɨ a kuwo kaa kumɔ a laa gǝm kaa kum a bǝlátǝm Tɛlalɔɨ, gǝ maa nyɔ sǝ a nǝ Tɛlalɔ dʊʊn. Nʊ nɨ ja nam lɛ tagɨ, gǝ maa nyɔ sǝ a nǝ Tɛlalɔ dʊʊn. Nʊ nɨ jǝgam lɛ jǝgamɨ, gǝ maa nyɔ sǝ a nǝ Tɛlalɔ dʊʊn. Gǝ tǝgǝn gǝ maa nyɔ sǝ a buu Kwaama gǝm kang. 7A kʊm bǝn, mɨ nʊ nɨ wo yɨ yɨm lɛ n kɛl dul gǝnɨ, mɨ nʊ nɨ wo bʊla lɛ n kɛl dul gǝnɨ. 8Na bǝ yǝm nǝn kʊlɨɨ, n yɨm Tɛlalɔɨ bǝ maa lɛɨ. Na bǝ bʊlaɨ, bǝ bʊlam Tɛlalɔ. Na bǝ nǝn kʊlɨɨ, na bǝ bʊlaɨ, bǝ maam Tɛlalɔ. 9Mɨ nyǝmatǝm wo Kiristi a bʊla, a gun nǝn kʊlɨ, jʊ a bwɨɨ sǝ a yǝlam Tɛlalɔ nǝb nɨ a bʊla bʊlaɨ jǝbɔ nǝb nɨ nǝn kʊlɨ. 10Mɔ, n wɛ a bwɨ mʊ kuwo kɨla mʊ lɛ nǝn bwɨlanɨ? N wɛ a bwɨ mʊ soga kɨla mɔ lɛɨ? Pʌd bǝnɔ bǝ tɨ tɨ a kǝga Kwaamaɨ, wʊnɨ maa bǝm borang lɛɨ.
11A mʊlalɨgɔ gǝm Tɛlalɔ a sʊwa gɔ, “N wɛɛl nǝn dul mǝndɨ, dunɔ gwam jʊng jʊng a kǝga mɨ. Benɔ gwam bǝlá bǝlá Kwaamagɔ.”
12Pʌd bǝnɔ bǝ kiyo kiyo jʊ bǝ maaɨ nǝn nyiyo bǝn a kǝga Kwaamaɨ.
Bɛ Ka Ń Dǝg Lɛ Kɨla Mɔ Fǝtǝm Naa
13Bɛ bǝ bǝla kuwotǝm bwɨlan a kʊm bǝn. Na a bʊm nyɔ ń do a nǝl mʊn, mɨsɔ yǝlam jǝ fǝtǝm naa lɛ jǝbɔ yaltǝm kɨla mʊɨ. 14Mɨ nyǝmatǝm wo a kʊm mɨ nǝbɔ Tɛlalɔ Yesu gɔ, mɨ jʊ nɨ wo mɨ sagsag a tǝltǝm gǝnɔ gǝmɨ. Nʊ nɨ a do gǝn gɔ mɨ sagsag a daa gǝ woi, mɨ sagsag. 15Na jʊ mʊ ja lɛɨ a dǝg kɨla mɔ komʌni, ke bɔ yɨm swɨkan mʊ maa lɛɨ. Ka jatǝm mʊnɔ ya yǝlam lɛ gola kalatǝm kɨla mʊɨ, wʊnɨ Kiristi a bʊla a kɛl dul gǝnɨ. 16Bɛ ka jʊ nɨ mʊ do n dǝngdǝng a kuwotǝm mʊnɨ a yǝlam jǝ tuwol a daa kaamɨ woi. 17Fɔlɔn lɔ Kwaamaɨ n ke bɔ jatǝm jǝbɔ nɔɔtǝm. N kɛl yɨm dǝngdǝng, jǝbɔ yɨm kwamɨgǝn, jǝbɔ fulotǝm nǝl a mʊgɔ Yʊwa Kwaamaɨ.
18Pʌd nʊ nɨ maa Kiristi gǝm maajɨ lɛ a gola nɨɨ, n jǝ yotǝm a daagɔ Kwaama woi. N nǝ jǝlatǝm a daagɔ nǝbɔ woi tag.
19Bɛ bǝ sʊtǝn kwaan sǝ bǝ maa jʊ nɨ bɛ lɛ nǝn yɨm kwamɨgǝn jǝbɔ sʊbkatǝm kwaanɨ. 20Bɛ ka ń kʌb lɛ maajɨ Kwaamaɨ a kɛl dul jǝjalǝn. Bɨlǝngǝn, jǝjalǝnɔ gwam sagsag, a kaa gola n bwɨlang jǝl na jǝjalǝn nɨ nǝfili ja lɛɨ yǝlam yǝlam jǝ fǝtǝm naa a daa kaa nǝl woi. 21A bʊm nyɔ ka ń wo lɛ nam, ka ń nɔɔ lɛ bʊgɛ, ka ń maa lɛ jʊ nɨ gwam dǝg kɨla mɔ lɛ a fǝ naaɨ. 22Nǝtǝm bɨlǝngkɛlɔ mʊ nǝn a dul kanjǝl nɨɨ, bɛ ń ta gǝn a tɨbǝl mʊn jǝbɔ Kwaama. Bwiligɔ na a nʊ nɨ nǝl gǝnɔ a nǝ gǝn bɔ bwɨlangkɛl a dul jʊ bʊʊlalɨ gǝnɔ a do n dǝngdǝngɨ.
23Nʊ nɨ a kɨɨ nǝl, a jaɨ, a gʊ dul gǝnɔ gǝm mwɛl dangǝn, jʊ a bwɨɨ a ja bɔ a gola nǝtǝm bɨlǝngkɛl. Pʌd jʊ nɨ ja maa bɔ a gola nǝtǝm bɨlǝngkɛlɨ, n bwɨlangkɛl.
Currently Selected:
Roma 14: DBD
Highlight
Share
Compare
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
