Roma 13
13
Shigtǝm Dul A Fɔlɔlɔmɔ Gǝm
1Bɛ pʌd jenɔ jǝ́ shig dul a nǝbɔ maa fɔlɔn nɛɨ. Mɨ kaa fɔlɔn wo na ke bɔ nǝn jǝlatǝm Kwaamaɨ. Pʌd nǝb maatǝm fɔlɔn nɨ bǝ nǝngǝnɨ, nǝn Kwaama a nǝ jii. 2A dul kɛl nɨ, pʌd nʊ nɨ a kɔ shigtǝm dul gǝnɔ a nǝb maatǝm fɔlɔnɨ, a kɔ shigtǝm dul a jʊ Kwaama a yaɨ. Nǝb nɨ maa jʊ nɨ lɛɨ, jǝ maa jim maa borang. 3Fɔlɔlɔmɔ ke bɔ jǝ taal a nǝb nɨ maa jʊ nɨ lɛ dǝngdǝngɨ, na ke bɔ nǝb nɨ maa bwɨlangkɛl lɛɨ. Mʊ swɨ bɔ ń nyʊwa taal nʊ nɨ maa fɔlɔn nɛɨ ka? Bɛ ń maa jǝ nyan, bǝlá ń bǝlá ń. 4N bwɛ jwaalɛ Kwaamaɨ maa mʊn jǝ nyan nɛɨ. Na mʊ nǝ maajɨ shili, bɛ ń nyʊwa taal. Ke bɔ nǝn kwan a ta gulʌni. Gɔ, n bwɛ jwaalɛ Kwaamaɨ, gǝ ywa nǝ bwɨla nǝn nabwɨl. 5A yǝlam nyɔ ń nǝ shigtǝm dul. Ke bɔ mwaltǝm nabwɨl kwaagɔ, sǝ nǝl jenɔ a daa.
6N jʊ a bwɨ jǝ́ ywa kemʌn tǝm lɛɨ, jʊ a bwɨɨ fɔlɔlɔmɔ jǝ maam Kwaama maajɨgɔ. Jǝ maa maajɨ nɨ lɛ kwangkwang. 7Bɛ jǝ́ ywa nǝbɔ jʊ jǝ bwang jem lɛɨ. Nǝb kemʌn tǝmɔ, kemʌn tǝm jinɔ, nǝb kemʌn kanjǝlɔ, kemʌn kanjǝl jinɔ, nǝb nɨ a la nǝtǝm dʊʊnɨ, jǝ́ nǝ ji dʊʊn, nǝb nɨ a la wanatǝmɨ, jǝ́ wana ji.
Swɨkanɔ Nǝn Gɔ A Yii Diili
8Bɛ ka jǝ́ ta lɛ jʊ nɨ a yǝlam a mɨbam nǝlɨ, na ke bɔ a swɨkanɨ. Nʊ nɨ swɨ fwalɨ yɨm gǝnɔ lɛɨ, a yii diilɔ. 9Diiltɨnɔ a sʊwa gɔ, “Bɛ ka ń maa lɛ bulon, bɛ ka ń jʌ lɛ dul, bɛ ka ń kuu lɛ kuul, bɛ ka ń maa lɛ wɛl.” Tangǝn diil nɨ bǝ nǝngǝnɨ, pʌd a nya yiitǝm a mʊgɔ kɛl nɨ sʊwa lɛ gɔ, “Bɛ swɨ fwalɨ yɨm mʊnɔ kanga mʊ swɨm dul mʊnɔ lɛɨ.” 10Na mʊ swɨ fwalɨ yɨm mʊnɔ lɛɨ, mɨsɔ mʊ maa gǝm shil lɛ. Swɨkanɔ nǝn gɔ yiitǝm diili.
11N wɔ tag jǝ́ kwɛl jǝ́ nyǝm nyǝmɨ jol nɨ bǝn a mʊgɔ gǝnɨ, kwamagɔ a kwɛl a la jǝ́ kǝla lɛ a nu dumi. N wɔ kǝngkɔ bǝ kwɛl bǝ la nǝn dɔɔm jǝbɔ nyatǝm bʊʊtǝm nǝn kwama nɨ bǝ tǝlǝm nǝtǝm bɨlǝngkɛlɨ. 12Kumɔ a kwɛl a shu shui, tǝmɔ ya saa sɛltǝm lɛ. A dul kɛl nɨ, bɛ bǝ jǝgǝm maajɨ kumtojiligɔ. Bɛ bǝ dʊʊ kanjǝl tatǝm kun na nyalǝmɔ. 13Bɛ bǝ yɔ yɔm nyan kanga a daa tʌgo nǝn kɔkɔɨ. Ka jǝ́ mʊrka lɛ a daa nɨ jǝ́ maam jǝ bwɨla lɛɨ, ka jǝ́ nɔɔ lɛ bʊgɛ ya maa jen nɛ, ka jǝ́ maa lɛ bulon, jǝbɔ jǝ gunidul, jǝbɔ gʊbkatǝm, jǝbɔ nungon. 14Bɛ jǝ́ do yɨm Tɛlalɔ Yesu Kiristii, ka jǝ́ do lɛ yɨm nǝfilii, ka jǝ́ maa lɛ wɛl kanjǝl bwɨla.
Currently Selected:
Roma 13: DBD
Highlight
Share
Compare
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
