Roma 15

Bɛ Ń Dǝg Kɨla Mɔ Fulotǝm Nǝl Ke Bɔ Dul Mʊn

1Bǝn nɨ bǝ kwam a nǝtǝm bɨlǝngkɛlɨ, bɛ bǝ do tuulogɔ, bǝ tɨka nǝb nɨ a kwam bɔ a nǝtǝm bɨlǝngkɛlɨ. Bǝ maa nyɔ sǝ bǝ fulo jim nǝl, ke bɔ dul bǝn. 2Bɛ bǝ maa fatǝm yɨm bǝnɔ gǝm jǝ nyan. Bɛ bǝ maa jʊ nɨ tɨka ji lɛɨ, sǝ ja dʊʊl a mʊgɔ nǝtǝm bɨlǝngkɛl jinɔ gǝm. 3Kiristi nǝn kang gǝn a maa bɔ swɨtǝm dul, kanga a mʊla mʊlaɨ gɔ, “Tuwol nɨ jǝ maa mʊn nɛɨ, gǝ tǝla a dul mɨ.” 4Pʌd jʊ nɨ a mʊla mʊlaɨ galɨgǝnɨ, ja mʊla sǝ a mɛla bǝm, sǝ a nǝ bǝn yatǝm nǝl a gola bwatǝm nǝl jǝbɔ kʊʊtǝm nǝl wʊnɨ kɛl Kwaamaɨ a nǝ bǝnɨ. 5Kwaama nɨ nǝ kʊʊtǝm nǝl lɛ jǝbɔ bwatǝm nǝlɨ, bɛ a nǝ jen yɨm nyan jǝbɔ kambɔ a bwangtǝm Yesu Kiristii, 6dɨsɔ jǝ́ dʊʊl Kwaama, wʊnɨ nǝn Tɛtɛ Tɛlalɔ bǝn Yesu Kiristii, bʊʊlalɨ jenɔ win, nyiyogɔ win.

Fulon Kɛl Lǝmɨ A Bʌtʌbɔ Gǝm

7Jǝ́ yobka kangɔ yo yo, kanga Yesu Kiristi a yo jen kangɔ yoi, sǝ ja bǝlá Kwaama. 8Mǝ sʊwa jen nɛ, Kiristi a yǝlam bwɛ jwaalɛ a daagɔ Yahudawagɔ woi, sǝ a nʊng bɨlǝngkɛl Kwaamaɨ, sǝ a yii swatǝm yaa Kwaamaɨ wʊnɨ a maa tʊgalam jinɔ gǝmɨ. 9Sǝ Bʌtʌbɔ a dʊʊl Kwaama a kɛl bʊnatǝm gǝnɔ gǝm. Kanga a mʊla mʊlaɨ gɔ,

“Mǝ bǝlá ń bǝlá ń a kʊm Bʌtʌbi,

n ma nafɨ bǝlátǝm dun mʊnɔ.”

10Nǝn gɔ a sʊwa tag gɔ,

“Jen jǝ́ Bʌtʌbɔ,

ya jǝ́ maa fulotǝm nǝl lɛ

dakini jǝbɔ nǝbam gǝnɔ.”

11A sʊwa tag gɔ,

“Jǝ́ bǝlá Tɛlalɔ,

jǝ́ Bʌtʌbɔ gwam,

jǝ́ mala nafɨ bǝlátǝm gǝnɔ,

jǝ́ nǝbɔ pʌd.”

12Ishaya a sʊwa tag gɔ,

“Kaa nʌl jel jel a dʊʊm Yessei,

nʊ nɨ gun nɛ sǝ a maa

fɔlɔn a dul Bʌtʌbi,

N daa gǝ woi Bʌtʌbɔ ya nǝl lɛɨ.”

13Bɛ Kwaama nɨ gǝ bɛ lɛ nǝn yatǝm nǝlɨ, a yii nǝl jenɔ nǝn fulotǝm nǝl gwam jǝbɔ yɨm kwamɨgǝn a kɛl dul bɨlǝngkɛl jenɔ gǝm, sǝ jǝ́ yii nǝn yatǝm nǝl a kwaan Yʊwa Kwaamaɨ.

Maajɨ Bulusi A Daa Bʌtʌbɔ Woi

14Kambɔ, n jǝla nǝn jen, mǝʊ jǝ́ nǝb nyan dangǝn, nǝb nyǝmtǝm nyangǝn, nǝb nɨ a la kanga mɛla kambɔ gǝm lɛɨ. 15Kaam kanjǝl nɨ mǝ mʊla jemi, n jel a talɨ nyangnyang, sǝ n bʊʊla jem a dul lǝma nɨ Kwaama a maa mɨɨ. 16A jǝg ɨ n yǝlam bwɛ jwaalɛ Yesu Kiristii a daagɔ Bʌtʌbɔ woi. A dǝg ɨ n yǝlam nǝkǝla sǝ n kiyo fulon kɛl lǝmɨ Kwaamaɨ a daagɔ Bʌtʌbɔ woi. A maa nyɔ sǝ ja yǝlam na twɨtǝm yulʌn wʊnɨ Kwaama yo lɛɨ, sǝ ja yǝlam sagsag a gola Yʊwa Kwaamaɨ.

17Mǝ nǝn jʊ a bwɨ mǝ maa lɨyal, a mʊgɔ Kiristi Yesui a maajɨ Kwaamaɨ mǝ maaɨ. 18Mɨsɔ mǝ lɛla lɛ n sʊwa kɛl na ke bɔ jʊ Kiristi a maa a gola mɨɨ. A dǝg Bʌtʌbɔ a jǝla a bwangtǝn Kwaama a kɛl mǝndɨ jǝbɔ maajɨ mɨɨ. 19Yʊwa Kwaamaɨ a nɨ ɨ kwaan maatǝm kanjǝl nʊngtǝm jǝbɔ kanjǝl tatǝm kang a nyiyo. Jʊ a ta a Urushalima a yɔ nǝn a Ilirikuni, n dɨɨ kiyotǝm fulon kɛl lǝmɨ Kiristii a daatɨn gɔ gǝm gwam. 20Kwangkwang mǝ swɨ lɛ n kiyo fulon kɛl lǝmɨ a daatɨn nɨ ja nyǝm bɔ Kiristi woi, kage n mɔ tʌgo a fʌlʌm kaa nǝlɨ. 21Kanga a mʊla mʊlaɨ gɔ,

“Nǝb nɨ ja kiyo jim bɔ fulon

kɛl gǝnɔ woi, jǝ nyǝm nyǝm.

Nǝbɔ ja nyʊwa bɔ fulon kɛl

gǝnɔ woi, jǝ fɛta fɛta.”

Bulus A Maa Fɛkalɨ Yɔm A Roma

22Kwangkwang maajɨ mɨɨ kʌshi i bɛtǝmɔ lɛ a daa jen woi.

23A kǝngkǝnɨ mɨ kaa daa nɨ wo a bǝla mɨ a tǝm nɨ mǝ yɔ bɔ woi, jolɔ a gǝlala mǝ ya nǝl yɔm lɛ a daa jen woi. 24Mǝ ya nǝl lɛ n tɨ n kuwo jen, na mǝ shu lɛ a tǝm Asbaniyaɨ. Na n yɨ dǝm n nyʊwa lǝma yɨmɔ a daa jen woi, mǝ ya nǝl lɛ mǝ ya jǝ́ ywa ɨ wo. 25Kǝngkɔ, mǝ yi a Urushalima, sǝ ya n nǝ nǝb sagsagɔ tɨkalɨgɔ ja maa jimi. 26Nǝbɔ Makidoniyaɨ jǝbɔ nǝbɔ Akayaɨ, ja nyʊwa lǝma nǝtǝm tɨkalɨ a dul nǝb bʊnǝnɔ gǝm a mʊgɔ nǝb sagsag nɨ a Urushalimaɨ. 27Ja nyʊwa lǝma maatǝmɔ nyɔ, jʊ a bwɨɨ a yǝlam jim na naan a dul jin. Bʌtʌbɔ a tǝga bwili yʊwagɔ dakini jǝbɔ ji. A yǝlam nyɔ tʌji ja tǝga bwili yooligɔ jǝbɔ ji. 28Na kwama mǝ dɨ maajɨ nɨɨ, mǝ nǝ ji tɨkalɨ nɨ kwamɨgǝnɨ, mǝ tɨ tɨ n yal jen a gola yɔm mɨ a tǝm Asbaniya. 29N nyǝm na n bɛ a daa jen woi, mǝ bɛ bɛ a mʊgɔ yiitǝm bwili Kiristii.

30Kambɔ, mǝ kela jen nɛ a dul Tɛlalɔ Yesu Kiristii, jǝbɔ swɨtǝm Yʊwa Kwaamaɨ, jǝ́ tɨka ɨ a mʊgɔ gaalanɔ mǝ woi, jǝ́ kela mɨ Kwaama. 31Jǝ́ maa mɨ keli sǝ n nya bʊʊtǝm a daa nǝb nɨ a kɔ yotǝm Kwaamaɨ a Yahudiyaɨ. Jǝ́ maa mɨ keli tag sǝ nǝb bwangtǝm nɨ a Urushalimaɨ, ja yo tɨkalɨ nɨ mǝ yilo jim nǝn a kang mɨɨ. 32Jǝ́ maa keli na Kwaama a jǝla, n la a daa jen woi nǝn fulotǝm nǝlɨ, sǝ n fǝb dakini nǝbɔ jen. 33Bɛ Kwaama nɨ nǝ yɨm kwamɨgǝn nɛɨ, a yɨ dakini jǝbɔ jen gwam. A daa nyɔ.

Currently Selected:

Roma 15: DBD

Highlight

Compare

Copy