Roma 10
10
1Kambɔ, jʊ mǝ swɨ lɛ a nǝl mɨɨ, jǝbɔ jʊ mǝ kel lɛ a daa Kwaama woi a dul Yahudawagɨɨ nǝn gɔ ja nya bʊʊtǝm. 2N nǝ nyiyo a dul jin, ja nǝ dul jinɔ a bwangtǝm Kwaamaɨ sul, ja nyǝm bɔ gola nyanɔ. 3Ja nyǝm bɔ golagɔ Kwaama gǝ dǝg nǝbɔ lɛ a yɨ yɨm dǝngdǝngɨ. Jǝ swɨ lɛ ja sʊtǝn gola jinɔ a yɨm dǝngdǝng a kǝga Kwaamaɨ, jʊ nɨ a dǝg ji ja dǝg bɔ dul jinɔ a gola nɨ Kwaama swɨ nǝbɔ lɛ a yɨ yɨm dǝngdǝngɨ. 4Kiristi nǝn gɔ a bɛ nǝn dɨltǝm diili, sǝ nʊ nɨ a nǝ bɨlǝngkɛlɨ a nya yɨm dǝngdǝng a kǝga Kwaamaɨ.
Bʊʊtǝmɔ Na A Nǝbɨɨ Gwam
5Musa a mʊla mʊlaɨ a kɛl dul nyatǝm yɨm dǝngdǝng nɨ jǝ nya lɛ a gola bwangtǝm diili gɔ, “Nʊ nɨ a bwangtǝn diil nɨɨ, bʊʊ a gola diil.”
6A kaa gola, yɨm dǝngdǝng nɨ a gola nǝtǝm bɨlǝngkɛlɨ a sʊwa gɔ, “Bɛ ka ń sʊwa lɛ a mʊgɔ nǝl mʊn mɔʊ, ‘Nuwo gwi dʌbʌl kwama lɛɨ?’ ” (Sǝ a shig Kiristi woi). 7“Bɛ ka ń sʊwa lɛ tag mɔʊ, ‘Nuwo gǝla lɛ a nǝl tǝmɨ?’ ” (Sǝ a gung Kiristi a bwaaɨ.) 8N wɛ mʊlalɨ kɛl Kwaamaɨ a sʊwaɨ? A sʊwa gɔ, “Kɛl Kwaamaɨ gǝ na nǝn dɔɔm jǝbɔ mɔ, a nyiyo mʊn jǝbɔ mʊgɔ nǝl mʊn tag.” Kɛl nɨ nǝn gɔ nǝtǝm bɨlǝngkɛlɔ bǝ kiyo nǝbɔ gǝm lɛɨ. 9Na ń sʊwa nǝn nyiyo mʊn mɔʊ Yesu nǝn Tɛlalɔɨ, ń nǝ bɨlǝngkɛl a nǝl mʊn mɔʊ Kwaama a gung gǝn a bwaaɨ, mʊ nya nya bʊʊtǝm.
10N nǝl nǝfili gǝ nǝ bɨlǝngkɛl lɛɨ sǝ a yǝlam nǝ dǝngdǝngɨ. N nyiyo nǝfili gǝ sʊwa bwɨlangkɛl gǝnɔ lɛɨ sǝ a nya bʊʊtǝmɨ.
11Kanga mʊlalɨ kɛl Kwaamaɨ a sʊwaɨ gɔ, “Pʌd nʊ nɨ a nǝ bɨlǝngkɛl a daa gǝ woi, mɨsɔ nyʊwa gunidul lɛ.” 12Mɨ nʊngtǝm wo nǝn dʌmʌn a kʊm Yahudawagɨɨ jǝbɔ Bʌtʌbɔ. Tɛlalɔ nǝn gɔ Tɛlalɔ nɨ win gwamɨ, nǝn gɔ nǝ bwili lɛ a ladaɨ a nǝb nɨ a yɔ nǝn keli jinɔ a daa gǝ woi.
13Pʌd nʊ nɨ a maa keli nǝn dun Tɛlalɔɨ, nya nya bʊʊtǝm.
14Jǝ maa keli nyǝn a daa nʊ nɨ ja nǝ bɔ bɨlǝngkɛl a daa gǝ woi? Jǝ nǝ bɨlǝngkɛlɔ nyǝn a nʊ nɨ ja nyʊwa bɔ woi? Jǝ nyʊwa nyǝn tag na mɨ nʊ nɨ wo a kiyo jimi? 15Maa nyǝn nǝb kiyotǝmɔ kiyo lɛ na ja twam ji bɨɨ? Kanga a mʊla mʊlaɨ gɔ, “N jǝ bʊmǝn a nǝb nɨ a bɛ nǝn fulon kɛl lǝmɨ nɨɨ!”
16Ke bɔ nǝbɔ Israilaɨ gwam a jǝla nǝn fulon kɛl lǝmɨ nɨɨ, kanga Ishaya a sʊwa gɔ, “Tɛlalɔ, nuwo a nǝ bɨlǝngkɛl nǝn kɛl nǝnɨ?” 17A dul kɛl nɨ, nǝtǝm bɨlǝngkɛlɔ a bɛ a nyʊwatǝm twama. Nyʊwatǝm twamagɔ a bɛ a kɛl kiyotǝm a dul Kiristii. 18Mǝ bʌ kɛl lɛ, “Ja nyʊwa bɔ ka?” N bɨlǝngǝn ja nyʊwa. Mʊlalɨgɔ a sʊwa gɔ,
“Diil jinɔ a yiim yooligɔ gwam.
Katɔ jinɔ a la gol yooligɔ.”
19Mǝ bʌ kɛl lɛ tag, “Nǝbɔ Israilaɨ a nyǝm bɔ twamagɔ ka?” A tǝltǝmɔ gǝmɨ Musa gɔ, “Kwaama a sʊwa gɔ, ‘Mǝ dǝg jen dǝg jǝ́ maa nungon jǝbɔ nǝb nɨ mɨ nǝn tuulɔɨ. Mǝ dǝg jen dǝg jǝ́ maa nabwɨl nǝn nǝb nɨ a fʌm fʌmi.’ ”
20Ishaya a jel nyangnyang a sʊwa gɔ, Kwaama a sʊwa gɔ, “Nǝb nɨ a saa ɨ bɨɨ, ja nya ɨ. Nǝb nɨ mǝ nʊng dul mǝndɨ a daa ji woi n nǝbɔ a bʌ i bɨɨ.” 21A dul nǝbɔ Israilaɨ, Kwaama a sʊwa gɔ, “Jʊ a ta nǝn kumsʌl a yɔ nǝn a kwaamɨ, n mal kang mǝndɨ a daagɔ nǝb nɨ mɨ nǝn shigtǝm duli jǝbɔ nǝb nɨ mɨ nyʊwa lɔl lɛɨ.”
Currently Selected:
Roma 10: DBD
Highlight
Share
Compare
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
