Roma 11
11
Tangǝn Nǝbɔ Israilaɨ
1Mǝ maa bʌtʌm lɛ, Kwaama a yǝla nǝbam gǝnɔ gǝm gul ka? A fee! Mɨ nyɔ dǝm! Mǝ tǝmɨ nǝn dul mɨ mǝ bwɛ Israila, a guu Ibrahimi, a dʊʊm Biliyaminui. 2Mɨ wo dǝm Kwaama a yǝla bɔ nǝbam gǝnɔ a jǝgam galɨgǝnɨ gǝm gul. Jǝ́ nyǝm bɔ jʊ mʊlalɨ kɛl Kwaamaɨ a sʊwa a dul Iliyaɨ ka? A sʊwa kanga a yɔ nǝn wi gǝnɔ a daagɔ Kwaama woi a dul nǝbɔ Israilaɨ gɔ, 3“Tɛlalɔ, ja jʌbom nǝbkuwotǝmkǝga mʊnɔ. Ja kʌbolam daa twɨtǝm yulʌn mʊnɔ. Nǝmǝ mǝ kwaamɨ win mǝ bǝlaɨ, jǝ saa jʌtǝm mǝndɨ lɛ tǝmɨ.” 4Kwaama a jǝla gǝn gɔ wɛ? A jǝla gǝn gɔ, “N ya dul mɨ gǝm nǝbɔ fʊlkʊblǝn nʌbʌl, nǝb nɨ a jʊng bɔ a nǝ Baal dʊʊn woi.” 5Jʊ nɨ a yǝlam nyɔ kǝngkɔ. Nǝbɔ wo a bǝlaɨ wʊnɨ Kwaama a jǝgǝm a lǝma gǝnɔ gǝmɨ. 6Na Kwaama a jǝgǝm ji a kɛl lǝmaɨ, a jǝg ji bɔ a kɛl maajɨ nyantɨn. Na mɨ nyɨɨ, lǝmagɔ ke bɔ lǝma tag. 7A maa nyǝn? Nǝbɔ Israilaɨ a gaa nyatǝm jʊ jǝ saa lɛɨ. Nǝb nɨ Kwaama a jǝgamɨ, ja yǝlam nǝb dǝngdǝng a daa Kwaama woi, kaamɨ a yǝlam nǝb kwamǝn dul. 8Kanga a mʊla mʊlaɨ gɔ, “Kwaama a dǝg ji ja yǝlam jǝ ke bɔ nǝb nyǝmtǝm. A nǝ ji nu, ke bɔ na kuwotǝm daa, jǝbɔ lɔl, ke bɔ na nyʊwatǝm.” A bɛ nǝn a dwiyeni. 9Dauda a sʊwa tag gɔ,
“Bɛ daa jalǝng jinɔ a yǝlam jim shɛɛ jǝbɔ lan.
Bɛ a yǝlam jim jǝ fǝtǝm naa tag.
Jʊ ja ya a nǝl jini bɛ a yǝlam jim mwɛl.
10Bɛ nu jinɔ a yǝlam duddugi,
kage ja nya kuwotǝm daa.
Bɛ kʊng jinɔ a lʊʊ mɨ dɨtǝm wo.”
Bʊʊtǝm Bʌtʌbi
11Mǝ bʌ kɛl lɛ tag, fǝtǝm naa nɨ a dǝg ji ja yalaɨ, mɨ guntǝm wo ka? Mɨ nyɔ dǝm! Yalatǝm jinɔ a yǝlam bʊʊtǝm Bʌtʌbi, sǝ a dǝg nǝbɔ Israilaɨ a maa nungon nǝn ji. 12Na bwɨlangkɛl jinɔ ja maaɨ nǝn gɔ a bɛ yooli nɨ gǝm nǝn bwilii, na gɨyatǝm jinɔ nǝn gɔ bwili Bʌtʌbi, la ladatǝm bwili Bʌtʌbi na nyǝn na kwama ladatǝm nǝbɔ Israilaɨ yǝlam lɛ a daa Kwaama woi a yii?
13Jǝ́ Bʌtʌbɔ, mǝ sʊwa jen nɛ, mǝ nɨ mǝ bwɛ twama Bʌtʌbi, mǝ maa lɨyal lɛ nǝn maajɨ mǝndɨ. 14Mǝ maa nyɔ sǝ n dǝg nǝb nɨ n nyiyo mɨ nungon, sǝ n dǝg kaam jinɔ a nya bʊʊtǝm. 15Na kɔtǝm jinɔ ja maaɨ a yǝlam gola fɛkalɨ yooligɔ jǝbɔ Kwaamaɨ, na Kwaama a yo ji tagɨ, a yǝlam na fulotǝm nǝn kʊlɨ a mʊgɔ bwaa. 16Na kʊkkʊm nɨ a bɨ nǝn tɨkǝga ja nǝ sagsagɨ, tangǝn kʊkkʊmɔ nyɔ tʌji. Na nʌl tɨyagɔ sagsagɨ, kangtɨn gǝnɔ tʌji sagsag.
17Na Kwaama a kǝlam kaam kang tɨyantɨnɨ, mɔ mʊ tɨya zaitun kuul nɨ a bwa mʊn naakan jǝbɔ gɨɨ, mʊ nyʊwa lǝma jʌng tɨyang zaitun nɨ lɛ dakini jǝbɔ tangǝn kang tɨyantɨnɨ,#11:17 Yahudawagɔ gǝ jʊng jʊng tɨya tʊʊlɔ. Na ja kuwo tɨya nɨ a tʊʊ bɔ tʊʊl nyaɨ, jǝ mwatɨm mwatɨm kang gǝnɔ sǝ ja mwatɨ kang nʊ nɨ tʊʊ tʊʊl nya lɛɨ, ja bwa tʌgo a nʊ nɨ mɨ tʊʊ tʊʊl nya lɛɨ sǝ a tʊʊ tʊʊl nyan. 18ka ń jǝg lɛ sʊtɔ mɔʊ ń laa tangǝn kang tɨyantɨnɔ. Na ń maa nyɨɨ, bɛ ń bʊʊla ke bɔ mɔ mʊ do jʌngi, jʌngɔ nǝn gɔ a do ńi. 19Mʊ sʊwa sʊwa mɔʊ, “Kwaama a kǝlam kang tɨyangtɨn nɨ sǝ a bwa mɨ naakan nǝn tɨyagɔ.” 20N bɨlǝngǝn dangǝn. Ja nǝ bɔ bɨlǝngkɛl n jʊ a bwɨ ja kǝlam jii. Mɔ n kɛl nǝtǝm bɨlǝngkɛl mʊnɔ ja bǝla ń woi. Bɛ ka ń gung lɛ dul. Bɛ ń nyʊwa taal Kwaamaɨ. 21Na Kwaama a bǝla bɔ kang tɨyantɨn galɨgɨɨ, mʊ tǝmʊn mɨsɔ bǝla ń nɛ.
22Dʌng kanga Kwaama a nʊng bʊnatǝmɔ, a nǝ gaalanɨ. A nǝ gaalanɔ a nǝb nɨ a yala yalaɨ. A ji bʊnǝn mʊnɔ, na ń ja kǝga a mʊgɔ gǝnɨ. Na mɨ nyɨɨ, mʊ tǝmʊn mwatɨ ń mwatɨ ń. 23Na nǝbɔ Israilaɨ a ja bɔ kǝga nǝn kɔtǝm nǝtǝm bɨlǝngkɛlɨ, Kwaama bwa bwa naakan nǝn tɨyagɔ, jʊ a bwɨɨ nǝn kwaan a maa nyɔ. 24Mʊ kang tɨya zaitun kuul nɨ a mwatɨ ń a bwa mʊn naakan jǝbɔ tɨya zaitun lɔngɨ wʊnɨ n ke bɔ tɨya mʊnɨ. N bɨlǝngǝn mɨsɔ bwa lɛ kang tɨyantɨn nɨ na a galɨɨ a bwa jim naakan a bʊtɔ tɨya zaitun nɨ na a galɨɨ.
Nǝbɔ Israilaɨ Gwam Nya Nya Bʊʊtǝm
25Kambɔ, mǝ swɨ lɛ jǝ́ nyǝm kaam kanjǝl nɨ ja yʊ yʊɨ, kage ya jǝ́ gung dul lɛ. Kaam nǝbɔ Israilaɨ n nǝb kwamǝn dul, a yɔ nǝn a kwama nɨ ladatǝm Bʌtʌb nɨ a nyǝm Kiristii a yii. 26Kwama jʊ nɨ a bwɨɨ, nǝbɔ Israilaɨ gwam nya nya bʊʊtǝm, kanga a mʊla mʊlaɨ gɔ,
“Nǝ bʊʊtǝmɔ bɛ bɛ a Sihiyona.
Jǝgǝm jǝgǝm nǝb nɨ a kɔ bwangtǝm Kwaamaɨ a guu Yakubui.
27Wʊnɨ nǝn gɔ n yiitǝm
swatǝm yaa mǝndɨ a daa ji woi, na n dem bwɨlangkɛltɨn jini.”
28A kɛl fulon kɛl lǝmɨ nɨɨ, jǝ nǝb kiim Kwaamaɨ a kɛl dul jen. A kɛl jǝgtǝm Kwaamaɨ, jǝ nǝb swɨtǝm gǝn a kɛl dul tʊgam tʊgalam jini. 29Jʊ a bwɨɨ nǝtǝm lǝma Kwaamaɨ jǝbɔ jotǝm gǝnɔ mɨsɔ gʊm lɛ. 30Kanga galɨgǝn jǝ́ kɔ bwangtǝm Kwaamaɨ, a na nyɔ kǝngkɔ Kwaama a ji bʊnǝn jenɔ a dul kɔtǝm bwangtǝm Kwaamaɨ jinɔ gǝm. 31N golagɔ win ja kɔ bwangtǝm Kwaamaɨ kǝngkɨɨ, sǝ Kwaama a ji bʊnǝn jinɔ kanga a maa jemi. 32Kwaama a kubʌl kubʌli nǝbɔ gwam a kɔtǝm bwangtǝm gǝn sǝ a ji bʊnǝn a dul jin gwam.
Bǝlátǝm Kwaamaɨ
33Dʊʊlǝn Kwaamaɨ, jǝbɔ yʊlan gǝnɔ,
jǝbɔ nyǝmtǝm gǝnɔ, a laa kwaan!
Biyotǝm borang gǝnɔ a laa kwaan dʌngtǝm,
golantɨn gǝnɔ a laa kwaan fɨɨtǝm!
34“Nuwo a nyǝm nǝl Tɛlalɔɨ woi?
Nuwo a sʊ gǝm yʊlan woi?”
35“Nuwo a nǝ Kwaama naan wo
wʊnɨ Kwaama yǝla ywa gǝn nɛɨ?”
36Kanjǝlɔ gwam a bɛ a daa gǝ woi,
n gola gǝn ja fɛ kanjǝlɔ gwamɨ,
n daa gǝ woi jǝ yǝla lɛɨ.
Bɛ nǝtǝm dʊʊlǝnɔ a ta tʌgo
gwanggwang a daa gǝ woi
mɨ dɨtǝm wo.
A daa nyɔ.
Currently Selected:
Roma 11: DBD
Highlight
Share
Compare
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
