Roma 9

Kwaama A Jǝgǝm Israila

1N bɨlǝngkɛl mǝ sʊwa lɛɨ, ke bɔ gabakɛl, jʊ a bwɨɨ mǝ na a Kiristi Yesui. Nǝl mɨ nǝn gɔ nɨ ɨ bwatǝm guu lɛɨ a gola Yʊwa Kwaamaɨ gɔ 2mǝ nǝn fitǝm nǝl jǝbɔ komʌn nɨ mɨsɔ dɨ lɛ woi a mʊgɔ nǝl mɨ. 3Na na maa maa nyɨɨ, bɛ ja lag ɨ, ja wʊlaka ɨ jǝbɔ Kiristi a kɛl dul kɛtǝlam mɨɨ, nǝbam nyiyo mǝndɨ. 4Jǝ nǝbɔ Israilaɨ, n nǝbɔ Kwaama a dǝg ji ja yǝlam bɛtɔ lɔ gɨɨ, a nʊng ji dʊʊlǝn gǝnɨ, a maa jim swatǝm yaa gǝnɨ, a nǝ ji diil gǝnɨ, a nʊng ji gola bǝlátǝm gǝnɨ, a maa jim tangǝn swatǝm yaatɨnɔ, pʌd na a ji. 5Ibrahim, jǝbɔ Ishaku, jǝbɔ Yakubu n tʊgalam ji, Kiristi tǝgǝn a jel wo a dʊʊm jin a mʊgɔ bʊtɔ. Bɛ dʊʊlǝnɔ a ta tʌgo gwanggwang a daagɔ Kwaama woi mɨ dɨtǝm wo, gǝ nɨ a dul kanjǝlɔ gǝm gwamɨ. A daa nyɔ.

6Ke bɔ gɔ kɛl Kwaamaɨ a yal nǝn kwan a dul nǝbam gǝnɨ. Jʊ a bwɨɨ ke bɔ pʌd nǝb nɨ a jel a dʊʊm Israilaɨ, n nǝbɔ Israilaɨ dangǝnɨ. 7Ke bɔ dʊʊm Ibrahimi gwam n bɛtɔ lɔ gɨɨ, Kwaama a sʊwa gɔ, “N daagɔ Ishaku woi, jǝ kiyo dʊʊm mʊnɔ lɛɨ.”

8Jʊ nɨ gǝ nʊng gɔ, yǝlamtǝm bɛtɔ lɔ Kwaamaɨ n ke bɔ yǝlamtǝm guu Ibrahimi a bʊtɔ, n guu swatǝm yaa nɨ jǝ kiyo lɛ gɔ n guu Ibrahimi dangǝnɨ. 9Swatǝm yaa nɨ nǝn gɔ, “Jol nɨ bɛ lɛɨ, nǝn kwama nɨ mǝ yǝla yǝla n bɛ, Saratu bʌ bʌ bwɛ.”

10A tɨ bɔ nyɔ, bɛtɨ yo nɨ, nɛnɛ bǝn Rifkatu a do fʌlɔ jǝbɔ tɛtɛ bǝn Ishaku. 11-12Nǝn kwama a lǝga bɔ a bʌ bɛtɨ yo nɨɨ, nǝn kwama ja lǝga bɔ ja maa jʊ nɨ a bʊmɨ jǝbɔ jʊ nɨ a bʊm bɨɨ, Kwaama a sʊwa gǝn gɔ, “Bwɛ dʊʊnɔ nǝ nǝ bwɛ dwalɨgɔ dʊʊn.” Kwaama a sʊwa nyɔ sǝ a nʊng nʊ nɨ gǝ jǝgǝmɨ, a jǝg gǝn a gola jǝlatǝm gǝn, ke bɔ a dul makajǝng nyantɨn, n jotǝm gǝn. 13Kanga a mʊla mʊlaɨ gɔ, “Yakubu mǝ swɨ lɛ. Isuwa mǝ kɔ lɛ.” 14N wɛ tag bǝ sʊwa lɛɨ? Kwaama mɨ dǝngdǝng ka? A fee, mɨ nyɔ! 15Kwaama a sʊwa Musa gɔ, “Mǝ ji ji bʊnǝn nʊ nɨ mǝ swɨ lɛ n ji bʊnǝn gǝnɨ, mǝ maa maa jǝ nya a nʊ nɨ mǝ swɨ lɛ n maa gǝm jǝ nyaɨ.” 16Nʊ nɨ Kwaama a jǝgǝmɨ, a na bɔ a dul jʊ nɨ nǝfili swɨ lɛɨ, ke bɔ kwaan gǝn, n bʊnatǝm Kwaamaɨ kwaagɔ.

17Mʊlalɨgɔ kɛl Kwaamaɨ a sʊwa Firauna gɔ, “N dǝg ń ń yǝlam fɔlɔ sǝ n nʊng kwaan mǝndɨ a gola mʊn, sǝ ja sʊwa dun mǝndɨ a yooligɔ gǝm gwam.”

18Kwaama gǝ ji ji bʊnǝn a nʊ nɨ swɨ lɛ a ji bʊnǝn gǝnɨ, gǝ dǝg kwamǝn dul a nʊ nɨ ga swɨɨ sǝ a kɔ nyʊwatǝmɔ.

Nabwɨl Kwaamaɨ Jǝbɔ Bʊnatǝm Gǝnɔ

19Kaa a kʊm jen sʊwa ɨ sʊwa ɨ gɔ, “N wɛ a bwɨ Kwaama tuwo bǝn nɛ nǝn bwɨlangkɛlɨ? Nuwo dwal lɛ a kʌshi jʊ nɨ Kwaama swɨ lɛɨ?” 20Nǝmɔ mʊ wo mʊ nǝfili mʊ maa gʊbkatǝm lɛ jǝbɔ Kwaamaɨ? Bʊm bʊm nyɔ gobʌl boligɔ ja mɔɨ a sʊwa nʊ nɨ a mɔ gǝnɨ gɔ, “N wɛ a bwɨ mʊ maa ɨ nyɨɨ ka?” 21Nʊ nɨ mɔba gobʌl boli lɛɨ, nǝn kwaan a maa jʊ swɨ lɛ nǝn nya boligɔ kanga a swɨɨ. Swɨtǝm gǝn a do nya boligɔ win a mɔ kaa nǝn a yǝlam na maajɨ nyantɨn, kaa tag a la bɔ na maajɨ nyantɨn.

22Kwaama swɨ lɛ a nʊng nabwɨl gǝnɔ jǝbɔ kwaan gǝnɔ, a dul nǝb nɨ a la jʌtǝmɨ. A na nyɔ a kʊ nǝl jǝbɔ ji. 23N jǝlatǝm gǝn a nǝ shilo dʊʊlǝn gǝnɔ a nǝb nɨ ga ji bʊnǝn jini, nǝb nɨ ga maa jim gola nyatǝm dʊʊlǝn nǝn tɨkǝgaɨ.

24Bǝ nǝb nɨ ga joi, ke bɔ a kʊm Yahudawagɨɨ kwaaji, a jo nǝb nɨ n Bʌtʌbi tʌji. 25Kanga a sʊwa a mʊgɔ Langǝn Bwangǝn Yushaui gɔ,

“Nǝb nɨ ke bɔ nǝbam mɨɨ,

mǝ jo ji jo mǝʊ

n ‘nǝbam mɨ.’

Nǝb nɨ galɨgǝn mǝ swɨ bɨɨ,

kǝngkɔ mǝ jo ji mǝʊ

n ‘nǝbɔ mǝ swɨ lɛɨ.’

26A daa nɨ Kwaama a sʊwa ji gɔ,

‘Jǝ́ ke bɔ nǝbam mɨ.’

N daa nɨ tag a jo ji gɔ jǝ

‘bɛtɔ lɔ Kwaama Nǝ Kʊlɨɨ.’ ”

27N kɛl dul nǝbɔ Israilaɨ Ishaya a gung diil gǝnɔ sʊwa lɛ gɔ,

“Ladatǝm nǝbɔ Israilaɨ

a lada na swiyoti wɨma sul,

a mʊgɔ jin nǝbɔ nǝn dǝm nyɔ na bʊʊ lɛɨ.

28Jʊ a bwɨɨ Tɛlalɔ mwatɨ mwatɨ

borang gǝnɔ a yooligɔ gǝm gwam mɨ tatǝm bʊtɔ wo.”

29Kanga Ishaya a sʊwa gɔ, “Na ke bɔ Tɛlalɔ nǝ kwaan pʌd a bǝla bǝm dʊʊm nɨɨ, na ja jʌm bǝn gwam na Sadumagɔ, jǝ dǝg bǝn tag bǝ yǝlam na Gwamrata.”

Israila Jǝbɔ Fulon Kɛl Lǝmɨgɔ

30N wɛ bǝ sʊwa lɛ tagɨ? Nǝb nɨ n Bʌtʌb ja saa bɔ dǝngdǝng Kwaamaɨ n wɔ ja nya. Ja nya dǝngdǝng nɨ a gola nǝtǝm bɨlǝngkɛl. 31Nǝbɔ Israilaɨ a sɨn saatǝm gola dǝngdǝng Kwaamaɨ a bwangtǝm diili, n wɔ ja nya bɔ. 32N wɛ a bɛ nǝn nyɨɨ? Jʊ a bwɨɨ ja saa bɔ dǝngdǝng nɨ a gola nǝtǝm bɨlǝngkɛl, n saatǝm a gola makajǝng nyatǝm jin. Nǝngɔ ja fǝ naa nǝn tɛl nɨ gǝ dǝg fǝtǝm naa lɛɨ. 33Kanga a mʊla mʊlaɨ sʊwa lɛ gɔ, “N wɔ n ya tɛl fǝtǝm naa a Sihiyona, jǝbɔ sunte nɨ dǝg nǝbɔ lɛ ja yalaɨ. Pʌd nʊ nɨ a nǝ bɨlǝngkɛl a daa gǝ woi, mɨsɔ nyʊwa gunidul lɛ wo.”

Currently Selected:

Roma 9: DBD

Highlight

Compare

Copy