Maajɨ Bɛtɔ Twamagɨɨ 28

Bulus A Malta Tǝm Nɨ A Tɨbǝl Wɨmaɨ

1Kwama nǝn bʊʊɨ, nǝngɔ la nǝn nyʊwa gɔ dun tǝm nɨ a tɨbǝl wɨmaɨ jǝ jo gɔ Malta. 2Nǝbɔ a tǝm gɨɨ, ja maa nǝm jǝ nya dangǝn nǝn bɨlǝngǝn. Ja yo nǝn gwam, ja mʊʊ nǝm kǝlagɔ, jʊ a bwɨɨ mwɛmɔ swiyo lɛ, juulɔ maa lɛ.

3Bulus a mʊr tɨyagɔ dǝg lɛ a kǝlaɨ, nǝngɔ shilotǝm kǝlagɔ a jǝg sɔɔ nɨ nǝn twalǝmɨ, nǝngɔ a sabǝl tʌgo a kang Bulusi. 4Nǝb nɨ yǝm a tǝm nɨ a tɨbǝl wɨmaɨ a kuwo sɔɔgɔ a sabǝl tʌgo a kang Bulusi, nǝngɔ ja sʊwaka a bʊtɔ jin gɔ, “Bɨlǝngǝn, balɨ nɨ n nǝ jʌtǝm dul. Jǝ́ kuwo a bʊʊ a wɨmaɨ, kʊlɨ nǝbɨɨ bwang gǝm lɛ, bʊla bʊla.”

5Bulus a warǝm kang gǝnɔ a mal sɔɔgɔ a mʊgɔ kǝla, a nyʊwa bɔ twɨla. 6Jǝ nyǝma lɛ gɔ fi sǝ a yal a bʊla tʌgo a kang. A kʊta ja kuwo bɔ kaa jǝl a bwɨ nǝn gɨɨ, nǝngɔ ja fʌto bʊʊlalɨ jinɔ ja sʊwa gɔ, n kaa kwaama.

7Nǝn dɔɔm kaam talɨ wo, na a nǝ dʊʊ tǝm nɨ a tɨbǝl wɨmaɨ, dunɔ nǝn Babiliyas. Nǝngɔ a yo nǝnɨ, a nǝ nǝn daa shigtǝm nyan kumɔ taalɨ. 8Tɛtɛ Babiliyasɨ daam gʌ lɛ nǝn bɛsheni jǝbɔ kʊntǝm. Nǝngɔ Bulus a dɔ a daa gǝ woi, a maa gǝm keli, a ya gǝm kang a dul, nǝngɔ a guni. 9Jʊ nɨ a bwɨ nyɨɨ, nǝngɔ tangǝn nǝb nɨ mɨ kwamɨgǝnɨ a tǝm nɨ a tɨbǝl wɨmaɨ jǝ bɛ lɛɨ, gung ji lɛɨ. 10Ja nǝ nǝn lǝmagɔ a lada nyɔ. Ya nǝn gun nɛ a tɨyamwɛngɨ, nǝngɔ ja mʊr nǝm jʊ nǝn saa lɛ gwamɨ.

Bulus A La Roma

11Bwaala taal a shui, nǝngɔ nǝn gun a kaa tɨyamwɛng nɨ a jel a Iskandariyaɨ, wʊnɨ a maa shenagɔ a tǝm nɨ a tɨbǝl wɨmaɨ. A kǝga tɨyamwɛng nɨ, ja fɛ kaa kwaama nǝn jelkalǝng bɛtɨ nɨ ja maa ji yoi.

12Nǝn bɛ a Sirakusaɨ, nǝn maa kumɔ taal wo. 13A daa gɔ, nǝngɔ nǝn shui, nǝn nya dul nǝnɔ a Rigiyumi. Kumɔ win a shui, yʊwagɔ a gun a gǝlalǝng. Nǝn tǝmsɛlɨ nǝngɔ nǝn la Butiyolii. 14A daa gɔ nǝn nya kaam nǝb bwangtǝmɔ wo. Nǝngɔ ja kela nǝn gɔ nǝn maa kumɔ nʌbʌl jǝbɔ ji. A na nyɔ nǝn la a Romaɨ. 15Nǝb bwangtǝm nɨ a Romaɨ, ja nyʊwa fulon nǝnɨ, nǝngɔ ja bɛ ba ja yo nǝn a gamdʌbo Abiyus, jǝbɔ daa nɨ jǝ jo lɛ gɔ daa Shigtǝm Taal. Bulus a kuwo jii, nǝngɔ a buu Kwaama gǝm kangɨ, nǝngɔ a nya kwaanɨ.

16Nǝn dɔ mʊgɔ Romaɨ, nǝngɔ ja jǝla Bulus gǝm gɔ ya yɨ a lɔ nɨ jǝ ywa lɛ ywaɨ jǝbɔ sʊwajaam nɨ dʌng gǝn nɛɨ.

Kiyotǝm Kɛl Bulusi A Roma

17Kumɔ taal a shui, Bulus a jo dʊʊm Yahudawagɔ. Ja mʊrkaɨ, nǝngɔ a sʊwa ji gɔ, “Kambɔ, mǝ maa bɔ nǝbam bǝnɔ gǝm bwɨlangkɛl, mǝ fa bɔ jǝfʊlǝn tʊgalam bǝnɨ sul, ja ta ɨ a Urushalima ja bwa ɨ, ja nǝ nǝbɔ Romaɨ. 18Ja fɨɨ ɨ, jǝ swɨ lɛ ja dem mɨ kang, jʊ a bwɨɨ ja nya ɨ bɔ nǝn bwɨlangkɛl nɨ a la jǝ jʌ i lɛɨ. 19Dʊʊm Yahudawagɔ a kɔ jǝlatǝmɔ, nǝngɔ a yǝlam nyɔ mǝ dem borang mǝndɨ mǝ bɛ nǝn fɔ a daa Kaisar woi. Ke bɔ katǝm kɛl nǝbam bǝnɨ mǝ bɛ nǝnɨ. 20N dul kɛl nɨ mǝ saa sǝ n kuwo jeni, sǝ n kiyo kɛl nǝbɔ jeni. N kɛl dul nʊ nɨ nǝbɔ Israilaɨ ya nǝl bɛtǝm gǝnɔ lɛɨ, ja bwa ɨ nǝn golmanɨ.”

21Nǝngɔ ja sʊwa gǝn gɔ, “Nǝn nya bɔ langǝn bwangǝn a dul mʊn a Yahudiya. Mɨ kaa kɨla nǝn nɨ wo, a bɛ fɔ nǝn katǝm kɛl mʊnɨ, a sʊwa kɛl nɨ a bʊm bɔ a dul mʊnɨ. 22Nǝn swɨ lɛ nǝn nyʊwa a nyiyo mʊn jǝbɔ jʊ mʊ kuwoi. Jʊ nǝn nyǝmɨ nǝn gɔ, n kaam mʊrkalɨ nǝb bwangtǝm fɨ nɨ nǝbɔ gwam sʊwala kɛl bwɨlan nɛ a dul gǝnɨ.”

23Ja ya kumɔ ba jǝ mʊrkam lɛɨ, nǝngɔ ja bɛ a daa nɨ ga shigʌmi, ja bɛ a lada dangǝn. Jʊ a ta a kumsʌl a yɔ nǝn a kwaamɨɨ, fɛta ji kɛlɔ lɛ a dul fɔlɔn lɔ Kwaamaɨ, swɨ lɛ a gʊ ji a daa Yesu woi a gola diil Musaɨ jǝbɔ a langǝn bwangǝn nǝbkuwotǝmkǝgagɨɨ. 24Kaamɨ a jǝla nǝn jʊ a sʊwaɨ. Kaamɨ a nǝ bɔ bɨlǝngkɛl. 25Ja jǝlaka bɔ a dul kɛl. Ja bǝla bɔ daa gɔ, nǝngɔ Bulus a sʊwa kaa kɛl win gɔ, “Yʊwa Kwaamaɨ a sʊwa bɨlǝngkɛl. A sʊwa tʊgalam jenɔ kɛl a nyiyo Ishayaɨ nǝkuwotǝmkǝga gɔ,

26“ ‘Yɔ a daa nǝb nɨ woi

ya sʊwa ji mɔʊ,

“Nyʊwatǝmɔ ya

jǝ́ nyʊwa nyʊwa,

mɨsɔ jǝ́ nyǝm lɛ.

Dʌngtǝmɔ ya jǝ́ dʌng dʌng,

mɨsɔ jǝ́ kuwo lɛ.”

27Jʊ a bwɨɨ nǝl nǝb nɨ a kwam nyɔ,

ja mǝlalam lɔl jinɔ,

ja kʊmam nu jinɔ,

kage jǝ kuwo nǝn nu jin,

jǝ nyʊwa nǝn lɔl jin,

jǝ nyǝm a nǝl jin,

jǝ yǝla a daa mɨ woi n gung ji.’

28“Bɛ jǝ́ nyǝm nyɔ, Kwaama a twam fulon kɛl bʊʊtǝm nɨ a daa Bʌtʌbɔ woi, jǝ nyʊwa nyʊwa.” [29A sʊwa nyɨɨ, nǝngɔ Yahudawagɔ a gun, a kwɨya nǝn bǝngkatǝm nǝn bɨlǝngǝnɨ.]#28:29 Kaam bɛl mʊlalɨ galɨgɔ mɨ nǝn bɛ gola nɨ.

30Bulus a yɨ a lɔ nɨ ga ywa ywaɨ jolɔ yo, yo nǝb nɨ lɛ gwam a bɛ a daa gǝ woi. 31Ja kaa gǝn bɔ a kiyotǝm kɛl a dul fɔlɔn lɔ Kwaamaɨ, mɛla jim kɛl Tɛlalɔ Yesu Kiristii lɛ kǝga jǝbɔ kǝga, mɨ taal wo.

Currently Selected:

Maajɨ Bɛtɔ Twamagɨɨ 28: DBD

Highlight

Compare

Copy