Maajɨ Bɛtɔ Twamagɨɨ 27
27
Bulus A Dɔ Tɨyamwɛngɔ A Shu A Roma
1Ja fɛka kanga nǝ gun nɛ a tɨyamwɛng nǝn shu a Italiyaɨ, nǝngɔ ja dǝg Bulus jǝbɔ kaam nǝb golmanɔ a kang kaa dʊʊ sʊwajaam dunɔ nǝn Yuliyas, a nya Kaisarɨ. 2Nǝn dɔ kaa tɨyamwɛng a Adaramitiya, wʊnɨ a fɛka guntǝm sǝ a shu a kaam tuulɔtɨn nɨ a kʌng wɨma Asiyaɨ. Nǝn tǝl yɔmɔ nǝbɔ Aristarkus, kaa bwɛ Tasalonika a tǝm Makidoniya. 3Nǝn tǝmsɛlɨɨ, nǝn bɛ a Sidon. Yuliyas dʊʊ sʊwajaam nɨ a maa Bulus gǝm jǝ nya. A bǝla gǝn sǝ a yɔ ya kuwo fatǝlam gǝnɔ, sǝ ja tɨka gǝn. 4Nǝn gun wo nǝn tɨyamwɛngɨ, yʊwagɔ kom nǝn nɛ. Nǝngɔ nǝn kɛla a gul Sayifurusi, tǝm nɨ a tɨbǝl wɨmaɨ. 5Nǝn yab wɨma nɨ a kɔtʌgo a gwanga tǝm Kilikiya jǝbɔ Bamfiliyaɨ, nǝngɔ nǝn la Mira nɨ a tǝm Likiyaɨ. 6A daa gɔ nǝngɔ dʊʊ sʊwajaam nɨ a nya kaa tɨyamwɛng Iskandariyaɨ, wʊnɨ shu lɛ a tǝm Italiyaɨ, nǝngɔ a dǝg nǝn woi.
7Nǝn maa kum jǝbɔ kumtɨn nǝn yɔ lɛ nǝn lǝma nyɔ. Nǝn dɔta nǝn yɔ nǝn dɔɔm jǝbɔ Kinidasɨ. Yʊwagɔ a kaa nǝn jatǝm kǝgaɨ, nǝngɔ nǝn kɛla a gwanga nɨ mɨ yʊwa woi, a gul Karita a tǝm nɨ a tɨbǝl wɨmaɨ, wʊnɨ a kɔtʌgo a Salmonii. 8Nǝn shu nǝn gaalan. Nǝngɔ ya nǝn la kaa daa nɨ jǝ jo lɛ gɔ Tɨm Nyaɨ, wʊnɨ a kɔtʌgo a tuulɔ Lasiyaɨ.
9Nǝn ta bʊtɔ a daagɔ. Jolɔ a kwɛl a kʊta. Kum Dikulom Jǝgtǝmɔ a bwɨlangkɛlɨ a shu. Na nǝ ja kǝga nǝn yɔm nɨɨ, nǝn nyʊwa nyʊwa gaalan. Nǝngɔ Bulus a sʊ jim yʊlanɨ. 10A sʊwa ji gɔ, “Nǝfitʌm, n kuwo yɔm nɨ nya nya komtǝm. Bǝ lɛ lɛ kanjǝlɔ a lada. Ke bɔ tɨyamwɛng jǝbɔ kanjǝl nɨ kwaaji, bǝ lɛ lɛ kʊlɨ bǝnɔ tag.” 11A dʊʊ sʊwajaamɨ a jǝla bɔ nǝn jʊ Bulus a sʊwaɨ. A ya nǝl gǝnɔ a daa nǝ mǝgtǝm tɨyamwɛngɔ woi jǝbɔ nǝ tɨyamwɛngɔ. 12Ja kuwo daa tɨm tɨyamwɛngɔ a Likiya a bʊm bɔ tɨyamwɛngɔ a ja shenagɔ woi, nǝngɔ kɔrɔ jinɔ a jǝla gɔ jǝ sʊtǝn yɔmɔ, kɛna jǝ la Finikiya lɛɨ, sǝ jǝ maa shenagɔ wo. Finikiyagɔ na kaa daa tɨm tɨyamwɛng a Karita, tǝm nɨ a tɨbǝl wɨmaɨ, wʊnɨ dʌng gǝlalǝng diyengɔ lɛɨ jǝbɔ gwilʌng diyengi.
Fitǝm Mwɛ A Wɨma
13Yʊwagɔ a tǝl fʌl bɛ lɛ a gǝlalǝng dǝm dǝmɨ, nǝngɔ nǝbɔ dʌng lɛ gɔ laa gaalan jinɔ a nya ywatǝm. Nǝngɔ ja gʊ ankagɔ (kemʌn nɨ a tuu tuui), ja bwangtǝn a keli Karitaɨ, tǝm nɨ a tɨbǝl wɨmaɨ. 14A kʊta bɔ, nǝngɔ yʊwa kwamɨgɔ a gun a gwilʌng gwanga twalɨ a tʊng nǝn a wɨmaɨ. 15Yʊwagɔ a ga tɨyamwɛngɨ, tɨyamwɛngɔ a dwal bɔ a shu a kǝga. Nǝngɔ nǝn bǝla wo yʊwagɔ tʊng nǝn nɛɨ. 16Nǝn bwangtǝn a kaa gul tǝm nɨ a tɨbǝl wɨmaɨ, wʊnɨ jǝ jo lɛ gɔ Kaudaɨ, a bwa nǝngɔ nǝn nya kwaan nǝn gʊ bɛ tɨyamwɛngɔ nǝn bɛ nǝn a daa tɨyamwɛng dʊʊnɔ woi. 17Kwama ja gʊm bɛ tɨyamwɛngɔ a mʊgɔ tɨyamwɛng dʊʊnɨ, nǝngɔ ja maa yʊlan ja bwaba bʊtɔ tɨyamwɛng dʊʊnɔ nǝn dwangɨ, kage a wʊlala. Nǝngɔ ja shigalam bɨlǝntɨn gǝnɨ, ja bǝla yʊwagɔ a tʊng tɨyamwɛngɨ, jʊ a bwɨɨ, ja dwal bɔ ja mǝg. Jʊ a bwɨ ja maa nyɨɨ jǝ nyʊwa taal lɛ kage jǝ ywɔ a swiyoti Sirtis.
18Mwɛmɔ maa bwɨya lɛ, mǝg nǝn nɛ dangǝn. N kɛl dul jʊ nɨ, nǝn tǝmsɛlɨɨ, nǝngɔ ja wɔɔ kanjǝlɔ a mʊgɔ tɨyamwɛngɨɨ ja tǝla a mʊgɔ wɨmaɨ. 19A kum na taalɔ, ji nǝn kang jin ja tǝlam kaam kanjǝl mǝgtǝm tɨyamwɛngɔ. 20Nǝn maa kum jǝbɔ kumtɨn nǝn kuwo bɔ kɔkɔ jǝbɔ nyanyamɨtɨn, dalɨ yʊwa mwɛmɔ wɔ babǝl nǝn nɛ, nǝn ya bɔ nǝl nǝn bʊʊ bʊʊ.
21A kʊta ja ja bɔ jǝjalǝn. Nǝngɔ Bulus a gun a tɨ tɨɨ a kǝga jin, a sʊwa gɔ, “Nǝfitʌm, na na jǝ́ nyʊwa ɨ, na na bǝ gun bɔ a Karitaɨ, na bǝ nyʊwa bɔ gaalan jǝbɔ lɛtǝm kanjǝl. 22Mǝ gʊ lɔl jenɔ lɛ kǝngkɔ, jǝ́ kʊ nǝl. Jʊ a bwɨɨ mɨ nʊ nɨ wo lɛ kʊlɨ gǝnɔ lɛ a kʊm jeni, n tɨyamwɛngɔ lɛ lɛ kwaagɨɨ.
23“A kum nɨ dʊgalǝnɨ, bwɛ twama Kwaamaɨ wʊnɨ mǝ na a gɨɨ, wʊnɨ mǝ bǝlá gǝn nɛɨ, a tɨ nǝn dɔɔm a daa mǝ woi. 24A sʊwa gɔ, ‘Ka ń nyʊwa lɛ taal, Bulus. Bɨlǝngǝn mʊ tɨ tɨ a kǝga Kaisarɨ. N wɔ tag n kɛl dul mʊn Kwaama a mʊgɔ bʊnatǝm gǝn bʊʊ lɛ nǝn fatǝm yɔm mʊnɔ gwamɨ.’ 25A dul kɛl nɨ, jǝ́ kʊ nǝl nǝfitʌm, jʊ a bwɨɨ n nǝ bɨlǝngkɛl a daa Kwaama woi kanga a sʊwa ɨɨ, bwɨ bwɨ nyɔ. 26Yʊwagɔ tʊng bǝn tʊng a dʌbʌl swiyoti kaa tǝm nɨ a tɨbǝl wɨmaɨ sǝla bǝ bʊʊ.”
27A kum na kʊb jeli naal yʊwagɔ tʊng nǝn nɛ a wɨma Adariya. Nǝn sangdɨlang nǝngɔ nǝb mǝgtǝm tɨyamwɛngɔ kuwo lɛ gɔ nǝn dwama tǝmɔ. 28Nǝngɔ ja sʊwa tushitǝm mwɛmɨ, ja nya a la naagɔ fʊlkʊb jǝbɔ fʊltiyo. Nǝn ja kǝga nǝn yɔmɔ dǝmɨ, ja yǝla ja sʊwaɨ ja nya tushitǝmɔ a la naagɔ fʊltʊlkʊb. 29Jǝ nyʊwa taal lɛ ka tɨyamwɛngɔ a tǝgaka jǝbɔ sunte, nǝngɔ ja dem kang a ankatɨnɔ naalɨ (kemʌntɨn nɨ a tuu tuui) a gul tɨyamwɛngɨ, kage tɨyamwɛngɔ a shu. Nǝngɔ ja maa keli ja ya Kwaama gǝm nui, sǝ tǝmɔ a sɛl dǝbǝr.
30Nǝb nɨ mǝg tɨyamwɛngɔ lɛɨ, jǝ swɨ lɛ ja mwal. Nǝngɔ ja shig bɛ tɨyamwɛngɨ, jǝ maa lɛ maamɔ jǝ shig ankatɨn (kemʌntɨn nɨ a tuu tuui) a tɨyamwɛng dʊʊnɔ gǝm. 31Nǝngɔ Bulus a sʊwa dʊʊ sʊwajaamɔ jǝbɔ sʊwajaamtɨnɔ gɔ, “Na nǝb nɨ a tɨ bɔ a mʊgɔ tɨyamwɛng nɨɨ, mɨsɔ jǝ́ bʊʊ lɛ.” 32Nyʊwatǝmɔ nyɨɨ, nǝngɔ sʊwajaamtɨn nɨ a mwatalam dwang bɛ tɨyamwɛngɨ, ja bǝla gǝn a bwangtǝn mwɛmɨ.
33Tǝmɔ ya sɛl lɛɨ, nǝngɔ Bulus a kela ji sǝ ja ja jǝjalǝnɨ, a sʊwa gɔ, “Dwiyen kumɔ kʊb jeli naal jǝ́ na a mʊgɔ yɨm komʌn, jǝ́ ja bɔ kaa jǝl. 34Mǝ kela jen nɛ, jǝ́ ja jǝjalǝnɔ sǝ a nǝ jen kwaan bʊtɔ. Mɨ kaa nǝl wo a kʊm jen wʊnɨ lɛ yitʌn dul gǝnɔ lɛ wini.”
35A sʊwa nyɨɨ, nǝngɔ a do kʊkkʊmɔ a buu Kwaama gǝm kang a kǝga jin gwamɨ, a tǝgaɨ, nǝngɔ a tǝl jatǝmɨ. 36Nǝngɔ gwam jinɔ ja nya kʊtǝm nǝl ja jaɨ. 37Gwam nǝnɔ a mʊgɔ tɨyamwɛngɨɨ nǝn fʊlkʊb yo jǝbɔ fʊltǝnʌbʌl jeli nukun. 38Ja ja, ja boba kanga jǝ swɨ lɛɨ, nǝngɔ ja shigʌm tɨyamwɛngɔ gǝm tuulogɔ ja tǝlam nuyilagɔ a mʊgɔ wɨmaɨ.
Mʊlalɨ Mwɛmɔ A Wʊlala Tɨyamwɛngɔ
39Tǝmɔ a sɛlɨ, nǝb mǝgtǝm tɨyamwɛngɔ a nyǝm bɔ tǝm nɨ jǝ woi. Ja kuwo kaa gwagɨ a daa nɨ swiyotigɔ woi, nǝngɔ ja fɛka gɔ jǝ yɔ nǝn tɨyamwɛngɔ a dʌbʌl swiyotii, na maa maaɨ. 40Nǝngɔ ja mwatam dwangtɨn nɨ a ta ankatɨnɨ (kemʌntɨn nɨ a tuu tuui), ja bǝla ji a mʊgɔ wɨmaɨ. A dǝngdǝng kwama gɔ nǝngɔ ja kwɨm dwang kwatǝm jǝ yǝlatǝm tɨyamwɛngɨ. Nǝngɔ ja gung bɨlǝntɨn tɨyamwɛngɔ a kǝga tɨyamwɛngɔ gǝmɨ, sǝ yʊwagɔ a tʊng gǝn a kǝga. Nǝngɔ ja dǝg dul sǝ jǝ yɔ a gwanga kʌng wɨmaɨ. 41Nǝngɔ nǝn la swiyotigɨɨ, tɨyamwɛngɔ a ga swiyotigɔ, nǝngɔ dul tɨyamwɛngɔ a ywɔɨ. Tɨyamwɛngɔ a tǝl wʊlalatǝmɔ a gul a mwɛ nɨ mʊla lɛɨ.
42Nǝngɔ sʊwajaamtɨnɔ a fɛka gɔ jǝ jʌbom nǝbɔ jǝ yɔ lɛ nǝn a lɔsomii kage kaa win a yal mwɛmɔ a mwal. 43Dʊʊ sʊwajaamɔ swɨ lɛ a bʊʊ nǝn Bulus. Nǝngɔ a kaa ji woi. A nǝ ji diil gɔ gwam nǝb nɨ a nyǝm mwɛɨ, ja tǝl yaltǝm mwɛmɔ ja yɔ a kʌng wɨma. 44Kaamɨ a gwi kwang nɨ ja tal a mʊgɔ tɨyamwɛngɨ, kaamɨ a gwi fʌtʌlogi kanjǝl tɨyamwɛng nɨ a kǝlalaɨ. Ja maa nyɔ gwam jinɔ ja la kʌng wɨmagɔ kwamɨgǝn.
Currently Selected:
Maajɨ Bɛtɔ Twamagɨɨ 27: DBD
Highlight
Share
Compare
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
