प्रकाशितवाक्य 7

इस्राएल चे एक लख चैवांलीस हजार लौक

1ऐचे बाद मैं धरती चे चाहरी कूणा उपर चार स्वर्ग़दूत भिले ङेखले, वे धरती चीया चाहरी हवाईया नु झड़ली भिलते कि धरती जा समुन्दर जा कुई दरख्ता उपर हवा ना चलो। 2बल्ति मैं हेक नेरे स्वर्ग़दूता नु जीते नरीकारा ची मौहर चले हुले उभरते कनु उपर आते ङेखले ओणे वां चाहरी स्वर्ग़दूता नु जानु धरती ते समुन्दर चे नुकसान करने चा अधिकार ङिला गेला हुता ऊंची अवाजी मां साङ मारती कर केहले, 3“जब तक अम्ही आपणे नरीकारा चे दासा चे मत्थे उपर मौहर ना लाती गिहुं बल्ति तक धरती ते समुन्दर ते दरख्ता नु नुकसान ना पुचाजा।”

4जाये उपर मौहर लाली गेली, मैं वांची गिणती सुणली यानि इस्राएल ची ऊलाद्धी चे सारे गोत्रा महु हेक लख चवालीस हजारा उपर मौहर लाली गेली।

5यहूदा चे गोत्रा महु ब़ारहा हजारा उपर मौहर ङिली गेली,

रुबेन चे गोत्रा महु ब़ारहा हजारा उपर,

गाद चे गोत्रा महु ब़ारहा हजारा उपर।

6अशोर चे गोत्रा महु ब़ारहा हजारा उपर,

नप्ताली चे गोत्रा महु ब़ारहा हजारा उपर,

मनश्शिह चे गोत्रा महु ब़ारहा हजारा उपर,

7शमौन चे गोत्रा महु ब़ारहा हजारा उपर,

लेवी चे गोत्रा महु ब़ारहा हजारा उपर,

इस्साकार चे गोत्रा महु ब़ारहा हजारा उपर,

8जबूलून चे गोत्रा महु ब़ारहा हजारा उपर,

यूसुफ चे गोत्रा महु ब़ारहा हजार उपर,

ते बिन्यामीन चे गोत्रा महु ब़ारहा हजारा उपर मौहर लाली गेली।

हेक बङी भीड़

9ऐचे बाद मैं नजर करली, ते ङेखा, हर हेक जाति, ते कोल्‍ल, ते लौक ते भाषा महु हेक इसड़ी बङी भीड़, जानु कुई गेण ना सग़ते। चिट्टी ओढ़णी घाली आले ते आपणे हाथा मां खज्जी चा लड़ीया चले हुले सिंहासना चे सामणे ते मैमणे चे सामणे भिली। 10ते बङी अवाजी लारे साङ मारती किहे, “उद्धार वास्ते अम्चे नरीकारा ची जको, सिंहासना उपर ब़ेहला ते मैमणे ची जय-जयकार हो।”

11ते सारे स्वर्ग़दूत, ओ सिंहासन ते प्राचीना ते चाहरी जीते जींया चे चुधारु भिले ले। बल्ति वे सिंहासना चे सामणे मत्थे टेकले ते नरीकारा नु ङण्डवत करती कर केहले, 12“इसड़े ही हो! अम्चे नरीकारा ची स्तुति ते महिमा ते ज्ञान ते धन्यवाद ते आदर ते सामर्थ ते ताकत युगानयुग बणली रिहो। आमीन!”

13ऐचे उपर प्राचीना महु हेके ने मनु केहले “ये चिट्टी ओढ़णी घाली आले कूण छै? ते किठु आले?”

14 # मत्ती 24:21; मरकु 13:19 मैं ओनु केहले, “हे मालिक, तु ही जाणी।”

ओणे मनु केहले, “ये वे छी जको बङे क्लेशा महु निकलती कर आले। यांणे आपणी-आपणी ओढ़णी मैमणे चे लुहींया लारे धोती कर चिट्टी करली। 15येही वजह कनु वे नरीकारा चे सिंहासना चे सामणे छी ते ओचे मन्दरा मां रात-ङिओ ओची सेवा करी ते जको सिंहासना उपर ब़ेहला ओ वांचे उपर आपणा तम्बू तांणी। 16वे बल्ति भुक्‍के ते तरसेले नी रिहे ते ना वांचे उपर चिटका, ना कुई गरमेस पड़ी। 17कांकि मैमणे जको सिंहासना चे आधे मां छै वांची ङेखभाल करी, ते जीवन रूपी पाणीया चे सौत्ते चे गोढु गेहती गेले करी, ते नरीकार वांचीया आँखीया महु सारी हींजवे लूहती नाखी।”

Currently Selected:

प्रकाशितवाक्य 7: ODR

Highlight

Copy

Compare