फिलेमोन 1

नमस्कार

1पौलुस चे तरफा कनु जको मसीह ईशु चा सुसमाचार सुणावणे चे वास्ते कैदी छै, ते भऊ तीमुथियुस ची तरफा कनु,

अम्चे लारे काम करने आला प्यारा साथी फिलेमोन,

2 # कुलु 4:17 ते ब़ेहण अफिया, ते अम्चे साथी सैनिक अरखिप्पुस ते फिलेमोन चे घरे आणे आली कलीसिया चे नांवे।

3अम्चे ब़ा नरीकारा ते प्रभु ईशु मसीह ची ओर कनु अनुग्रह ते शान्ति तम्हानु मिलती रिहो।

फिलेमोन चा प्रेम ते विश्‍वास

4मैं सदा आपणे नरीकारा चा धन्यवाद करे, ते आपणी प्राथना मां वी तम्हानु याद करे। 5कांकि मैं पवित्र लौका वास्ते दुधे ओह प्रेम ते ईशु मसीह मां दुधे विश्‍वास चे बारे मां सुणे। 6मैं प्राथना करे पला कि विश्‍वास मां दुधे सहभागी हुवणे, तम्ची सारी भलाई ची पिछाण मां, मसीह चे वास्ते प्रभावशाली हो। 7कांकि हे माये भऊ, मनु दुधे प्रेम लारे बङा आनन्द ते शान्ति मिड़ली, ऐवास्ते कि दुधे जरिये नरीकारा चे पवित्र लौका चे देल हरे भरे हुती गेले।

उनेसिमुस चे वास्ते बिनती

8ऐवास्ते जको ठीक छै ओनु करने वास्ते ते तम्हानु आज्ञा ङेणे वास्ते मसीह मां मनु घणी हिम्मत तां छै। 9तांवी मनु ब़ुढ़े पौलुस नु जको हमा मसीह ईशु चे सुसमाचार वास्ते कैदी छै, ईं होर वी समझी मां आवे कि प्रेम लारे बिनती करे। 10#कुलु 4:9मैं आपणे ब़ाल उनेसिमुस चे वास्ते बिनती करे जको कैदखाने मां पौलुस चे जरिये ईशु मसीह उपर विश्‍वास करने चे जरिये मसीह मां माया धर्मा चा पूत छै। 11हेक समय हुता ओ दुधे कुई कामा चा कोनी हुता, हमा ना कि दुधे बल्कि माये वी कामा चा छै।

12मैं ओनु ही जको माये कालजे चे टुकड़े छै ऊं मैं दुधे सनु भेज़े पला। 13मैं चाहवे ला ओनु आपणे गोढु रिहुं ङिये, कि मनु कैदखाने मां सुसमाचार सुणावणे वास्ते दुधी तरफा कनु माई सेवा कर सग़ो। 14फिलेमोन मैं दुधी मर्जी चे बगैर कहीं ना करना चाहवी कुई आच्छे काम जबरदस्ती लारे ना बल्कि खौद्द आपणी इच्छा लारे ही हो।

15हो सग़े थोड़े समय वास्ते दुधे कनु दूर करने ची वजह हाओ हो कि तु ओनु सदा वास्ते दुधे गोढु रेह सग़े। 16पर ओनु बल्ति सेवक जिसड़ा कोनी पर सेवक कनु वी बढ़ती कर खास करती माये वास्ते ओह प्यारा भऊ जिसड़ा छै, पर दुधे वास्ते काया मैं सेवक ते प्रभु मां भऊ कनु बढ़ती कर छै।

17अगर तु मनु भईवाला आलीकर मनी ते ओनु वी माये आलीकर समझ। 18ते अगर ओणे दुधे कुई नुकसान करले जा कुई तरह ओह दुधा कर्जदार छै ते ओनु माये खाते चे नांवा लिखती गे। 19मैं, पौलुस, खौद्द आपणे हाथा लारे लिखे पला, ओची भरपाई मैं भरी, मनु केहणे ची ईं जरुरत कोनी कि माया कर्जा जको दुधे उपर छै, ओ तु ही छी। 20हे भऊ, हा खुशी मनु प्रभु मां दुधे तरफु मिड़ली। मसीह मां माये देल खौश करती ङी। 21दुधे आज्ञाकारी हुवणे उपर भरोसा राखती कर मैं हा चिठ्ठी तनु लिखे पला मनु पता छै कि जको कोच्छ तनु मैं किहे ओकनु तु ज्यादा करे।

22हा वी कि माये रेहणे ची जग़हा तियार राखजा मनु आस छै कि तम्ची प्राथना चे वजह कनु मैं तम्हानु सही सलामत दुबारा मिली।

आखरी नमस्कार

23 # कुलु 1:7; 4:12 इपफ्रास चा तम्हानु नमस्कार, जको मसीह ईशु मां माया साथी कैदी छै, 24#प्रेरि 12:12,25; 13:13; 15:37–39; कुलु 4:10; प्रेरि 19:29; 27:2; कुलु 4:10; कुलु 4:14; 2 तीमु 4:10; कुलु 4:14; 2 तीमु 4:11माये साथी कार्यकर्ता, मरकुस, अरिस्तर्खुस, देमास, ते लूका चा तम्हानु नमस्कार किही।

25अम्चे प्रभु ईशु मसीह चा अनुग्रह तम्ची आत्मा उपर हुता रिहो। आमीन।

Currently Selected:

फिलेमोन 1: ODR

Highlight

Copy

Compare