इब्रानियां 1
1
नरीकार आपणे पूता चे जरिये बाता करे
1पेहले युगा मां नरीकारा ने अम्चे ङाङा-ब़ा लारे थोड़े-थोड़े करती ते हर-प्रकार चीया भविष्यवक्ता चे जरिये बाता करलीया। 2पर यां ङिहां चे अन्त मां अम्चे लारे आपणे पूता चे जरिये बाता करलीया, जानु ओणे सारीया चीजा चा वारिस ठहराले ते ओचे जरिये ओणे सारी सृष्टि वी रचली छै। 3ओ नरीकारा ची महिमा चे सोज़ले, ते ओचे सुभाव ची छाप छै, ते सारीया चीजा नु आपणी सामर्थ चे वचना लारे, सम्भाले। ओ अम्चे पापा नु धोती कर, स्वर्ग़ा मां सर्वशक्तिमान नरीकारा चे सज़्ज़े पासु जती ब़ेहला।
पूत स्वर्ग़दूता कनु उत्तम
4ऐवास्ते ओ स्वर्ग़दूता कनु उतना ही उत्तम बणला, जितना वांचे नांवा कनु ऊं नां उत्तम छै जको ओनु वारिस चे रुप मां मिड़ले। 5कांकि स्वर्ग़दूता महु नरीकारा ने कङण कानु इसड़े केहले,
“तु माया पूत छी,
आज़ मैं ही तनु पैदा करले।”
ते बल्ति ईं,
“मैं ओचा ब़ा हुती जई
ते ओ माया पूत हुवी।”
6ते जब, नरीकार आपणे पलेठी चे पूता नु संसारा चे सामणे आणे, तां ओ किहे,
“नरीकारा चे सारे स्वर्ग़दूत ओचे पूता ची वन्दना करो।”
7ते स्वर्ग़दूता चे बारे मां ईं किहे,
“ओ आपणे स्वर्ग़दूता नु हवा बणाले,
ते आपणे सेवका नु धधकते जाखते ची लपटा बणाले।”
8पर आपणे पूता चे बारे मां किहे,
“हे नरीकार, दुधा सिंहासन युगा युगा चा छै,
तु आपणे राज़ चा शासन न्यां लारे करे।
9तु धार्मिकता चा पक्ष गेहला ते अधर्म कनु नफरत करली।
ये वजह कनु नरीकार, दुधे नरीकारा ने दुधे साथीया महु बढ़ती कर आनन्द रूपी तेला लारे दुधा अभिषेक करला।”
10नरीकार ईं वी किहे,
“हे प्रभु, शुरु मां तु धरती ची नीम मेहली,
ते स्वर्ग़ दुधे हाथा ची कारीगरी छै।
11वे तां नाश हुती जाये, पर तु बणला रिहे,
ते वे सब ओढ़णा आलीकर पुराणे हुती जाये।
12ते तु वानु चादरी आलीकर बलेठती नाखे,
वानु ओढ़णा आलीकर बदलती ङिले जई,
पर तु यूंही रिहे,
दुधे जीवनकाल चा अन्त कङी नी हुवी।”
13कांकि स्वर्ग़दूता महु नरीकारा ने कङी कानु इसड़े कोनी केहले,
“माये सज़्ज़े पासु ब़ेसती रेह,
जब तक कि मैं दुधे बैरीया नु दुधे पग़्ग़ा चे तले ची चौकी ना करती ङिये।”
14का सारे स्वर्ग़दूत सेवा वास्ते चुणले आलीया आत्मा कोनी छी कि वे वांची सेवा करो, जको उद्धार गेहणे आले छी?
Currently Selected:
इब्रानियां 1: ODR
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0
