इब्रानियां 7

मेलिकिसिदक याजक

1परमप्रधान नरीकारा चा याजक, शालेम शहरा चा राजा मेलिकिसिदक ने अब्राहम लारे ओस समय भेंट करली ते ओनु आशीष ङिली, जिसे बेले अब्राहम राजा नु हराती कर पुठा आवे पलता, 2ओनु अब्राहम ने योद्ध मां जीतलीया आलीया सब चीजा चा ङसवां हेंस्सा वी ङिला।

मेलिकिसिदक नांवा चा पेहला मतलब छै धार्मिकता चा राजा ते ङुजा मतलब शान्ति चा राजा कांकि ओ शालेम शहरा चा राजा हुता। 3कानु वी मेलिकिसिदक ची आई-ब़ा ते वंशावली चे बारे मां कोच्छ वी मालुम कोनी। ना ओचे ङिहां ची शुरुआत छै ते ना ही जीन्दगी चे अन्त चे बारे मां किठी लिखले पले। नरीकारा चे पूता आलीकर ओ अनन्त काल चा याजक छै।

4हमा सोचा कि किसड़े महान हुते ईं इन्सान, ओनु अम्चे कोल्‍लपत्ति अब्राहम ने योद्ध मां जीतलीया आलीया चीजा चा सबकनु आच्छा ङसवां हेंस्सा भेंट करला। 5मूसा चे जरिये ङिली गेली व्यवस्था मां लेवी चे वंशा महु जको याजक चे पद्द वास्ते चुणले गेले, वानु हा आज्ञा छै, कि वे सारे लौका कनु ङसवां हेंस्सा भेला करो, यानि वाकनु जको वांचे भऊ छी चाहे वे वी अब्राहम चे वंश चे छी। 6पर मेलिकिसिदक लेवी वंश चा ना हुवणे उपर वी अब्राहम कनु ङसवां हेंस्सा गेहला। ते ओनु आशीष वी ङिली जाये कनु नरीकारा चा वायदा हुता। 7ते ऐचे मां शक्‍क कोनी कि छोटा बङे कनु आशीष गिहे। 8ये खास स्थिति मां नाशवान इन्साने ङसवां हेंस्सा गिही, पर इठे ऐनू गेहणे आले मेलिकिसिदक चे बारे मां ईं केहले गेले छै कि ओ जीता छै। 9तां अम्ही ईं वी केह सग़ु कि लेवी वी जको ङसवां हेंस्सा गिही, वाणे वी आपणे पुरखे अब्राहम चे जरिये मेलिकिसिदक नु ङसवां हेंस्सा ङिला। 10कांकि जब मेलिकिसिदक अब्राहम लारे मिड़ला ओ बेले तां लेवीया चा जनम ही कोनी हुला हुता तब वे आपणे पुरखे अब्राहम चे शरीरा मां ही हुते।

हेक नवें याजक ची जरुरत

11अगर लेवीये याजक पद्द चे जरिये सिद्धि प्राप्त हो सग़े, जाये सहारे लौका नु व्यवस्था मिड़ली हुती, तां बल्ति का जरुरत हुती कि ङुजा याजक मेलिकिसिदक ची रीति उपर खड़ा हो, ते हारुन#7:11 हारुन, लेवी वंश महु पेहला महायाजक हुता। ची रीति चे नी किहवावी? 12कांकि जिसे बेले याजक चा पद्द बदड़ला जाओ तां व्यवस्था चा वी बदलाव जरुरी हुती जाये। 13ईं सब अम्ही वांचे बारे मां किहुं पले, जको हेक ङुजे गोत्र चे हुते, वे गोत्र चे कुई वी इन्साना ने वेदी उपर याजक चे रूपा मां सेवा कोनी करली। 14ईं तां उजागर छै कि अम्चा प्रभु यहूदा ची वंश महु हुता ते ये जाति चे बारे मां मूसा ने याजक पद्द ची कुई चर्चा कोनी करली।

15अम्चा दावा होर वी साफ हुती जाये, जब मेलिकिसिदक आलीकर हेक नेरा इसड़ा याजक पैदा हुवणे आला हुता, 16जको शरीरिक जनम चे व्यवस्था चे आधारा उपर कोनी, पर हेक अविनाशी जीन्दगी ची सामर्थ चे आधारा उपर याजक बणला हुता। 17कांकि ओचे बारे पवित्रशास्त्र मां हा ग़वाही ङिली गेली “तु मेलिकिसिदक ची रीति उपर युगानयुग याजक छी।”

18हेक पेहली आज्ञा कमजोर ते निष्फल हुवणे ची वजह कनु अलोफ हुती गेली। 19कांकि व्यवस्था ने कुई बाते ची सिद्धि कोनी करली ते विची जग़हा उपर हेक इसड़ी उत्तम आस मेहली गेली जाये जरिये अम्ही नरीकारा चे गोढु जा सग़ु।

नवें याजक ची महानता

20ऐवास्ते मसीह ची नियुक्‍ति कसम खाले बिना कोनी हुली, वास्तव मां याजका ची नियुक्‍ति बिना कुई कसमी लारे हुती। 21कांकि वे तां बिना कसम याजक ठहराले गेले पर मसीह कसमी लारे नरीकारा ची ओर कनु नियुक्‍त करला गेला जेह्णे ओचे बारे मां केहले,

“प्रभु ने कसम खाली

ते ओ ओकनु बल्ति नी पछतावी कि,

‘तु युगानयुग याजक छी।’ ”

22ये कसमी ची वजह लारे मसीह ईशु हेक उत्तम वाचा चा जामिन बणती गेला।

23पेहले जमाने मां याजका ची गिणती ज्यादा हुती कांकि हर हेक याजक ची मौत लारे-लारे ओची सेवा खत्तम हुती जती। 24पर ङुजे तरफु मसीह ईशु, ऐवास्ते कि ओ अनन्त काल चा छै आपणे याजक पद्द चे उपर अटल छै। 25ऐवास्ते जको ओचे जरिये नरीकारा चे गोढु आवी ओ वांचा पूरा-पूरा उद्धार कर सग़े, कांकि ओ वांचे वास्ते बिनती करने वास्ते सदा जीता छै।

26कांकि इसड़ा ही महायाजक अम्चे लायक हुता, जको पवित्र, ते निष्कपट ते निर्मल ते पापीया कनु अलग़, ते स्वर्ग़ा कनु वी ऊंचा करला आला हो। 27ते वां महायाजका आलीकर ओनु जरुरी कोनी कि हर ङिओ पेहले आपणे पापा वास्ते ते बल्ति लौका चे पापा वास्ते बलि भेंट चढ़ाओ, कांकि ओणे आपणे आप नु बलि चे रूपा मां भेंट चढ़ाती कर विनु हेके वारी निपटाती ङिले। 28कांकि व्यवस्था तां कमजोर इन्साना नु महायाजक चुणती गिहे, पर वे कसमी ची वाचा जको व्यवस्था चे बाद खाली गेली, ओ पूता नु नियुक्‍त करे जको अनन्त काल वास्ते सेद्ध बणाती ङिले।

Currently Selected:

इब्रानियां 7: ODR

Highlight

Copy

Compare