इब्रानियां 8
8
ईशु अम्चा महायाजक
1हमा जको बाता अम्ही किहुं पले, वांचे महु सबकनु बङी बात हा छै, कि अम्चा इसड़ा महायाजक छै, जको स्वर्ग़ा चे उपर महिमामय नरीकारा चे सिंहासना चे सज़्ज़े पासु जती ब़ेहला। 2ओ अति पवित्र स्थान यानि सच्चे तम्बू चा सेवक हुला, जानु कुई इन्साना ने कोनी बल्कि प्रभु ने खड़े करले हुते।
3कांकि हर हेक महायाजक भेंट ते बलिदान चढ़ाणे वास्ते चुणला जता ऐवास्ते जरुरी छै कि ऐ महायाजका कनु वी कोच्छ चढ़ाणे वास्ते हो। 4अगर मसीह ईशु धरती उपर हुवीया तां ओ याजक हो ही ना सग़ीया। कांकि इठे व्यवस्था चे अनुसार भेंट चढ़ाणे वास्ते याजक छी। 5ये वे याजक छी जको स्वर्ग़ीय चीजा चे प्रतिरुप ते प्रतिबिम्ब ची सेवा करी जिंवे कि जिसे बेले मूसा तम्बू बणावणे उपर हुता तां ओनु ईं चिताले गेले, “ङेख जको नमुना तनु पहाड़ा उपर ङिखाणला गेला हुता, ओचे अनुसार सब कोच्छ बणाओ।” 6पर वां याजका कनु बधती कर सेवा मसीह ईशु नु मिड़ली कांकि ओ होर वी उत्तम वाचा चा बिचोला बणला जको होर वी खरे वायदे चे सहारे ब़ांहला गेला।
नवीं वाचा
7अगर वा पेहली वाचा मां कुई खौट ना हुवीया तां ङुजी वाचा ची जरुरत ही ना हुवीया। 8पर खौद्द नरीकारा ने वे पीढ़ी नु दोषी ङेखती कर केहले,
“प्रभु किहे, वे ङिहें आवी पली,
जिसे बेले मैं इस्राएल ते यहूदा चे घराणे लारे हेक नवीं वाचा ब़ांधी।
9हा वे वाचा आलीकर कोनी, जको मैं वांचे पुरखा लारे ओ समय ब़ांहली हुती,
जिसे बेले मैं वांचा हाथ पकड़ती कर वानु मिस्र देशा महु काढ़ती आला हुता।
कांकि वे माई वाचा मां अटल कोनी रेहले,
ऐवास्ते मैं वाकनु दूर हुती गेला, ईं प्रभु चे केहणे छै।
10बल्ति प्रभु किहे, कि जको वाचा मैं वां ङिहां चे बाद,
इस्राएल चे घराणे लारे ब़ांधी, वा हा छै कि,
मैं आपणी व्यवस्था नु वांचे मना मां नाखी,
ते विनु वांचे दिला उपर लिखी,
ते मैं वांचा नरीकार हुवी,
ते वे माये लौक हुवे।
11ते हर हेक आपणे देशा आले नु ते आपणे भावां नु हा शिक्षा नी ङिही,
कि तु प्रभु नु जाण कांकि छोटे कनु बङे तक मनु जाणती गिहे।
12कांकि मैं वांचे अधर्म चे बारे मां दयावन्त हुवीं,
ते वांचे पापा नु बल्ति याद नी करी।”
13नवीं वाचा ची स्थापना लारे ओणे पेहली वाचा नु पुराणी ठहराली ते जको चीज पुराणी ते जर्रती जाये विचे मिटती जाणे लाजमी छै।
Currently Selected:
इब्रानियां 8: ODR
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0
