इब्रानियां 6

भटकणे चा असर

1ऐवास्ते आवा मसीह ची शिक्षा ची शुरु चा बाता छोड़ती कर, अम्ही सिद्धता सनु बधते चालु। जिंवे कि मरले आले कामा कनु मन फिरावणे ते नरीकारा उपर विश्‍वास करना, 2ते बपतिस्मे ची शिक्षा, ठोङा उपर हाथ मेहलणे, मरले आला चे जीते हुवणे ते आखरी न्यां ची शिक्षा, जा शुरुआती शिक्षा ची नीम दोबारा नी नाखणी चाही छै। 3ते अगर नरीकारा ने चाह्‍ले तां अम्ही इसड़े ही करु।

4जेह्णे कुई समय सच्‍च चे ज्ञान चे सोज़ले गेहती गेले हुते, जेह्णे स्वर्ग़ीय वरदान चा स्वाद चाखती गेलता, जको पवित्र आत्मा चे भईवाल हुती गेलते, 5ते जको नरीकारा चे उत्तम वचना चा ते आणे आले युगा ची सामर्थ चा स्वाद चाखती गेहणे चे बाद वी, 6नरीकारा कनु दूर हुती गेले, तां वानु मन फिराव वास्ते बल्ति नवें बणावणे अनहोणे छै। कांकि वे नरीकारा चे पूता नु आपणे वास्ते दुबारा क्रूसा उपर चढ़ावी ते उजागर ही ओचे उपर कलंक लावी।

7जको भोंये बारशी चे पाणीया नु सोखती कर जमींदारा वास्ते काम आणे आली पैदावार पैदा करे वा नरीकारा कनु आशीष गिहे। 8पर वाहो भोंये अगर झाड़ ते ऊंठकटारे उग़ावे तां वा कुई कामा ची कोनी ते श्रापित हुवणे उपर छै। जाखते मां ब़ालती नाखणे विचा अन्त छै।

9पर हे प्यारे, हालांकि अम्ही ये बाता किहुं, तां वी तम्चे बारे मां अम्ही याकनु आच्छीया होर उद्धार आलीया बाता चा भरोसा करु। 10नरीकार अन्यायी कोनी, कांकि तम्चे काम ते ओ प्रेम नु भूलती ना जई, जको तम्ही ओचे नांवा वास्ते ओचे लौका ची सेवा करली ते करा वी पले। 11पर अम्ची हाओ इच्छा छै कि तम्चे महु हर हेक जणे अन्त तक इसड़ा ही यतन करते रिहो, ताकि तम्ही ओनु पक्‍के गे सग़ा जाई तम्हानु आस छै। 12तम्ही आलसी ना बणा, बल्कि वांचे कदमा उपर चला जको विश्‍वास ते सब्रा लारे वायदे चे वारिस छी।

नरीकारा चा अटल वायदा

13नरीकारा ने अब्राहमा लारे वायदा करते बेले जिसे बेले कसम खाणे वास्ते कानु आपणे कनु बङे कोनी ङेखले, तां आपणी ही कसम खाती कर केहले, 14“मैं सच्‍चमां तनु ब़ोहत आशीष ङी, ते दुधे वंशा नु बधाता जई।” 15ऐवास्ते अब्राहम सब्र करती कर इन्तजार करता रेहला ते ओनु ऊं मिड़ले, जाया वायदा करला गेलता।

16इन्सान तां खौद्द कनु बङे ची कसम खाये ते वांचे हर हेक बेहस चा फैंसला कसमी लारे पक्‍का हुवे। 17ऐवास्ते जब नरीकारा ने वायदे चे वारिसा चे उपर होर वी साफ रीति लारे उजागर करने चाह्‍ले कि ओची मनसा बदल ना सग़ी, तां कसमी नु बीच मां आणले। 18इठे कङी ना बदलने आलीया ङोन बाता छी, हेक ओचा वायदा ते हेक ओची कसम जाये बारे मां नरीकार कूड़ा साबित हो ही ना सग़ी। अम्ची मजबूती लारे हिम्मत ब़झती जाओ, जको आसरा गेहणे वास्ते ऐवास्ते द्रोड़ले कि वे आस नु जको सामणे पली आली छै गे सग़ु। 19वा आस अम्चे प्राण वास्ते इसड़ा लंगर#6:19 लंगर लोहे चा हेक भारी कुंडा रिहे जको ब़ेड़ा रोकणे चे काम आवे ते चलावणे आले ऐनू रस्से लारे जोड़ती कर समुन्दरा चे तला मां नाखी ते ब़ेड़ा रोकी। छै जको टिकाऊं ते मजबूत छै, जको पड़दे चे भीतर अति पवित्र स्थान तक पुज़ती जाये, 20जिठे ईशु ने मेलिकिसिदक ची रीति उपर सदा काल चा महायाजक बणती कर, अम्चे वास्ते अग़ुवे चे रुप मां प्रवेश करले।

Currently Selected:

इब्रानियां 6: ODR

Highlight

Copy

Compare