इब्रानियां 3

ईशु मूसा कनु वी महान छै

1ऐवास्ते, हे माये विश्‍वासी भऊ, तम्ही जको स्वर्ग़ीय ब़ुलावे मां भईवाल छिवा, ईशु उपर ध्यान ङिया, जको अम्चे वास्ते नरीकारा चा प्रेरित ते महायाजक छै। 2ओ आपणे चुणने आले चे प्रति यूं करती विश्‍वासयोग बणला रेहला, जिंवे करती नरीकारा चे सारे घरा मां मूसा हुता। 3ईशु मूसा कनु इतना बढ़ती कर महिमा चे योग समझला गेला, जितने कि घरा कनु, घर बणावणे आला आदर राखे। 4कांकि हर हेक घरा चा कुई ना कुई बणावणे आला हुवे, पर जेह्णे सब कोच्छ बणाले ओ नरीकार छै। 5मूसा तां नरीकारा चे सारे घरा मां सेवका आलीकर विश्‍वासयोग रेहला, कि जको बाता भविष्य मां हुवणे आलीया हुतीया, वांची ग़वाही ङियो। 6पर मसीह पूता आलीकर नरीकारा चे घरा चा अधिकारी छै। अगर अम्ही मजबूत विश्‍वासा उपर ते आपणी आस चे गर्व उपर अन्त तक मजबूती लारे बणले रिहुं, तां अम्ही ओचे घराणे छिऊं।

अविश्‍वास चे प्रति चितावनी

7तां जिंवे पवित्र आत्मा किहे पला,

“अगर आज़ तम्ही ओची अवाज सुणा,

8तां आपणे मना नु कठोर ना करा,

जिंवे कि क्रोध ङिवाणे चे समय

ते परीक्षा चे ङिओ बरब्याना मां करले हुते।

9जिठे तम्चे ङाङा-ब़ा ने चालीस साला तक माये महान कामा नु ङेखणे चे बाद वी,

चुनौती ङिते हुले मनु परखले हुते।

10ऐवास्ते मैं वे पीढ़ी लारे गुस्से रेहला, मैं वानु केहले,

‘हमेशा ही वांचे मन, माये कनु दूर हुती जाये,

वानु माये आदेशा चा कुई अहसास कोनी।’

11तब मैं क्रोध मां आती कर कसम खाली,

‘वांचे माये विश्राम मां आणे नी हुवी।’ ”

12हे माये भऊ, चौकस रिहा, कि तम्चे मां इसड़े बुरे ते अविश्‍वासी मन ना हो जको जीते नरीकारा कनु दूर हुती जाये। 13पर जब तक ओ ङिओ, जानु “आज़” केहला जाये, अम्चे सामणे छै, हर हेक ङिओ हेके ङुजे ची हिम्मत ब़न्धाते रिहा, इसड़े ना हो कि तम्चे महु कुई वी पाप चे छल मां कठोर बणती जाओ। 14अगर अम्ही आपणे पेहले भरोसे नु अन्त तक बणाली रिहुं, तां अम्ही मसीह चे भईवाल बणले रिहुं। 15जिंवे केहले गेले,

“अगर आज़ तम्ही ओची अवाज सुणा

तां आपणे मना नु कठोर ना करा, जिंवे कि क्रोध ङिवाणे चे समय करले हुते।”

16भला किसे लौका ने सुणती कर गुस्सा ङिवाला हुता? का वां सारा ने कोनी, जानु मूसा मिस्र देशा महु ब़हार काढ़ती आला हुता? 17ते नरीकार चालीस साला तक किसे लौका लारे गुस्से रेहला? का वांचे लारे कोनी जेह्णे पाप करला, ते वांचीया लाशा बरब्याना मां पलीया रेहलीया? 18ते नरीकारा ने काये बारे मां कसम खाली कि तम्चे माये विश्राम मां आणे नी हुवी? का सेर्फ वांचे लारे कोनी जेह्णे आज्ञा कोनी मनली ? 19तां अम्ही ङेखु कि वे अविश्‍वास ची वजह वांचे जाणे ना हो सग़ले।

Currently Selected:

इब्रानियां 3: ODR

Highlight

Copy

Compare