इब्रानियां 12

धीरज ची ब़ुलाहट

1ये वजह कनु जबकि ग़वाहा ची इसड़ी बङी भीड़ अम्हानु घेरले आले छै, तां आवा, हर हेक रोकणे आली चीज ते उलझाणे आले पापा नु दूर करती कर, वा द्रोड़ जिसे मां अम्हानु द्रोड़ने छै, धीरज लारे उग़ते बधते जऊं, 2ते विश्‍वास चे कर्ता ते सेद्ध करने आले ईशु ची तरफ तकते रिहुं, जेह्णे ओ आनन्द वास्ते जको ओचे वास्ते पला हुता, लाज़ ची कुई चिन्ता ना करते हुले क्रूस चे ङोख सेहले, ते नरीकारा चे सिंहासन चे सज़्ज़े पासु जती ब़ेहला। 3ऐवास्ते ओचे उपर विचार करा, जेह्णे आपणे विरोध मां पापीया चा इतना घौर कष्ट सेहती गेला कि तम्ही निराश हुती कर हिम्मत ना छोड़ती ङिया।

ब़ा चा अनुशासन

4पाप चे खिलाप आपणे संघर्ष मां तम्ही हमा तक वे हद्दी तक प्रतिरोध कोनी करला कि तम्हानु लुहीं बाहवणे पड़ो। 5तम्ही ओ उपदेश नु जको तम्हानु पूता आलीकर ङिला जाये, भूलती गेले,

“हे माया पूत, प्रभु चे अनुशासन नु हल्के ना समझ,

ते ओची ताड़ना लारे हिम्मत ना छोड़।

6कांकि प्रभु अनुशासित वानु करे, जाये लारे ओनु प्रेम छै,

ते हर-हेक नु, जानु ओणे पूता चे रूपा मां स्वीकार करले, ङण्ड वी ङिये।”

7सतावट नु अनुशासन समझती कर सेहती गिहा। नरीकारा चा तम्चे लारे उसड़ा ही बर्ताव छै जिसड़ा ब़ा चा आपणी ऊलाद्धी लारे हुवे। भला कुई ऊलाद्ध इसड़ी वी हुवे, जानु ब़ा अनुशासित ना करता हो? 8अनुशासित तां सारे करले जई, पर अगर तम्ही अनुशासित कोनी करले गेले, तां तम्ही ओची आपणी ना, नाजायज ऊलाद्ध छिवा। 9बल्ति जब अम्चे शरीरिक ब़ा वी अम्हानु अनुशासित करे जाया अम्ही आदर करु, पर का ईं ज्यादा सही कोनी कि अम्ही आत्मा चे ब़ा चे अधीन रेहती कर जीते रिहुं? 10वे तां आपणी समझ चे अनुसार थोड़े ङिहां वास्ते अनुशासित करी, पर नरीकार अम्ची भलाई वास्ते अम्हानु अनुशासित करे कि अम्ही ओची पवित्रता चे भईवाल हुती जऊं। 11किसी वी तरह चा अनुशासन ओ समय तां आनन्द भरला कोनी, पर ङोख भरला ही ङिसे। तां वी जको ओनु सेहते-सेहते पक्‍के हुती गेले, बादा मां वानु चैन लारे धार्मिकता चा प्रतिफल मिले।

12ऐवास्ते आपणे ढिले हाथ ते कमजोर गोङा नु मजबूत बणावा। 13ते आपणे पग़्ग़ा वास्ते सिधे मार्ग़ बणावा, कि लंगड़ा, अपंग ना हुती जाओ, पर भला चंगा हुती जाओ।

14सारा लारे शान्ति बणाली राखा ते वे पवित्रता ची खोज मां रिहा, जाये बिना कुई वी प्रभु नु ङेख ना सग़ी। 15ध्यान राखा कि कुई वी नरीकारा चे अनुग्रह कनु वंचित ना रेहती जाओ, जा तम्चे मां कुई फूट ना पड़ती जाओ जको तम्हानु कष्ट ङियो ते ब़ोहता चे अशुद्ध हुवणे ची वजह बणो। 16चौकस रिहा कि तम्चे बीच ना तां कुई व्यभिचारी इन्सान हो, ते ना ही एसाव चे जिसड़ा अधर्मी हो, जेह्णे पलेठी चा पूत हुवणे चे आपणे अधिकारा नु सेर्फ हेको खाणे वास्ते बेचती ङिला। 17तम्हानु पता ही छै कि ओचे बाद जब ओणे वा आशीष दुबारा गेहणी चाह्‍ली, ओनु नालायक समझले गेले। बल्ति ओणे हींजवे बाहती कर वे आशीष नु गेहणे चाह्‍ले, पर पश्‍चयाताप करने चा मौका नी मिड़ला। 18तम्ही ओ पहाड़ा चे गोढु कोनी पुज़ले, जिंवे इस्राएली लौक सीनै पहाड़ा गोढु पुज़ले हुते। वे जग़हा पे जाखते धदके पलते, काली घटा, अन्धारी, ते अन्धारे, 19ते तुरही ची तेज अवाज, ते नरीकारा चे ब़ोलणे चे इसड़े शब्द हुते, वानु सुणले आला ने बिनती करली कि हमा अम्चे लारे होर बाता ना करलीया जाओ। 20वांचे वास्ते हा आज्ञा सेहणे कनु ब़ाहर हुती, कांकि यूं केहले गेले, “अगर कुई ढौरे वी पहाड़ा चे गोढु जाओ तां वे पत्थरा लारे मारती नाखली जाओ।” 21ते ओ दर्शन इसड़ा ङरावणा हुता कि मूसे ने केहले, “मैं ब़ोहत ङरे ते कांपे पला।”

22पर तम्ही सिय्योन पहाड़ा चे गोढु, जीते नरीकारा चे शहर, स्वर्ग़ीय यरुशलेम चे गोढु आती गेले ते अणगिणत स्वर्ग़दूता ची खौश करने आली सभा चे गोढु आती गेले, 23तम्ही नरीकारा ची वां पलेठी आला ची कलीसिया चे गोढु आती गेले, जाये नां स्वर्ग़ा मां लिखले गेले छै। तम्ही नरीकारा चे गोढु आती गेले जको सब चा न्यांयी छै, ते वां धर्मीया ची आत्मा चे गोढु आती गेले जको सेद्ध बणले हुते। 24तम्ही ईशु चे गोढु जको नवीं वाचा चा बिचोला छै ते छिड़काव चे लुहींया चे गोढु जको हाबिल चे लुहींया कनु उत्तम साफ बाता करे, आती पुज़ले।

25ऐचा ध्यान रिहो कि तम्ही ओची आज्ञा ना टाला, जको तम्चे लारे बाता करे पला। जब वे, ङण्ड कनु नी बच सग़ले, जेह्णे ओची आज्ञा नी मनली, जेह्णे वानु धरती उपर चितावनी ङिली हुती, तब अम्ही ङण्ड कनु किवें बच सग़ु, अगर अम्ही ओची ना सुणु, जको स्वर्ग़ा कनु अम्हानु चितावनी ङिये? 26ओ बेले तां ओची अवाजी ने धरती नु हलाती नाखले हुते पर हमा ओणे ईं केहते हुले वायदा करला छै, “हेक वारी बल्ति मैं ना सेर्फ धरती, पर स्वर्ग़ा नु वी हलाती ङी।” 27ये शब्द “हेक वारी बल्ति” वां चीजा नु हटाले जाणे ची ओर इशारा छै, जको टलती जई यानि सृजलीया आलीया चीजा छी, कि जको चीजा हलालीया ना जई वे अटल बणलीया रिहो।

28जिंवे अम्ही अविनाशी राज़ गेहला जको हली ना, ऐवास्ते आवा अम्ही नरीकारा चा भय मनते हुले, ओनु खौश करने आली भग़ती लारे अराधना करु। 29कांकि अम्चा नरीकार भसम करने आले जाखते छै।

Currently Selected:

इब्रानियां 12: ODR

Highlight

Copy

Compare