इब्रानियां 11
11
विश्वास चीया मिसाला
1हमा विश्वास, आस करली आलीया चीजा चा पक्का, ते अणङेखलीया चीजा चा प्रमाण छै। 2कांकि ऐचे बारे मां पुरखा ची आच्छी ग़वाही ङिली गेली।
3 #
यूह 1:3
विश्वासा लारे ही अम्ही जाणती जऊं, कि सारी रचना नरीकारा चे वचना चे जरिये हुली। पर ईं कोनी कि जको कोच्छ ङेखणे मां आवे, ऊं ङेखली आली चीजा लारे बणले हो।
4विश्वासा लारे ही हाबिल ने कैन कनु उत्तम बलिदान नरीकारा नु चढ़ाला, विश्वास ची वजह कनु खौद्द नरीकारा ने प्रशंसा लारे हाबिल नु धर्मी घोषित करले, नरीकारा ने हाबिल चे भेंट ची प्रशंसा करली मतलब ओची मौत हुती चुकली ओचा हाओ विश्वास आज़ वी अम्चे वास्ते ग़वाही छै।
5विश्वासा लारे ही हनोक चवीती गेला कि मौत नु ना ङेखो, ते ओचा पता कोनी मिड़ला कांकि नरीकारा ने ओनु चती गेलते। ओचे चती गेहणे चे पेहले ओची हा ग़वाही ङिली गेलती, कि ओणे नरीकारा नु खौश करले हुते। 6ते बिना विश्वास चे नरीकारा नु खौश करने अनहोणे छै, कांकि नरीकारा चे गोढु आणे आले इन्साना वास्ते ईं जरुरी छै ऊं हा विश्वास करो कि नरीकार छै ते ईं वी कि ओ वानु प्रतिफल ङिये, जको ओची खोज करी।
7विश्वासा लारे ही नूह ने वां बाता चे बारे मां जको ओ बेले कोनी ङिसी पलतीया, चितावनी मिलणे उपर भग़ती लारे आपणे घराणे चे बचाव वास्ते जहाज बणाला। ऐचा नतीजा हा हुला कि संसारा दोषी ठहराला गेला ते नूह धार्मिकता चा वारिस हुला, जको विश्वासा लारे हुवे।
8विश्वासा लारे ही अब्राहम जिसे बेले हकारला गेला तां आज्ञा मनती कर इसड़ी जग़हा निकलती गेला जानु विरासत मां गेहणे आला हुता ते ईं ना जाणता, कि ओ किठे जाये पला, तां वी निकलती गेला। 9विश्वासा लारे ही ओणे वायदा करले आले देशा मां प्रदेसी बणती कर तम्बूआ मां रेहला। यूंही इसहाक ते याकूब वी रेहले जको ओही वायदे चे वारिस हुते। 10कांकि ओची नजर ओ टिकाऊं शहरा उपर हुती, जानु रचने आला ते बणावणे आला नरीकार छै।
11विश्वासा लारे ही सारा ने आप ब़ुढी हुवणे उपर वी ब़ाल जमावणे ची ताकत गेहली, कांकि विणे वायदा करने आले नु विश्वासयोग मनले हुते। 12ऐ वजह कनु हेक ही अब्राहम कनु जको मरले आले जिसड़ा हुता, इतने वंश पैदा हुले, जितने आसमाना मां तारे ते समुन्दरा चे किनारे उपर रेता चे कण छी।
13ये सारे विश्वासा ची दशा मां मरले, ते वाणे वायदा करलीया आलीया चीजा कोनी गेहलीया। पर वानु दूरी कनु ङेखती कर खौश हुले ते मनती गेहले कि अम्ही धरती उपर प्रदेसी ते ब़ाहरले छिऊं। 14जको इसड़ीया बाता किही वे प्रकट करी, कि वे आपणे ही देशा ची खोज मां छी। 15ते जिसे देशा कनु वे निकलती आले हुते, अगर ओनु याद करी हा तां वानु वापिस जाणे चा मौका हुता। 16पर सच्चाई हा छै कि वानु हेक बेहतर देशा ची इच्छा हुती, जको स्वर्ग़ देश छै। ऐवास्ते नरीकार वांचा नरीकार किहवावणे मां ना लज़ावी, कांकि नरीकारा ने ही वांचे वास्ते हेक शहर तियार करला।
17विश्वासा लारे ही अब्राहम ने, परखले जाणे चे बेले इसहाक नु बलि वास्ते भेंट करती ङिले जेह्णे वायदे नु सच्च मनले हुते, 18ते जानु ईं केहले गेलते, “इसहाक कनु दुधा वंश किहवाला जई।” ओही आपणे हिकड़ाते पूता नु बलि चढ़ाहु लाग़ला। 19कांकि ओणे मनती गेलते कि नरीकार सामर्थी छै कि ओनु मरले आला महु जिवाओ। हेक तरह लारे ओणे वी इसहाक नु मरले आला महु बल्ति जीता गेहला।
20विश्वासा लारे ही इसहाक ने याकूब ते एसाव नु आणे आले बाता चे बारे मां आशीष ङिली।
21विश्वासा लारे ही याकूब ने आपणे मरते बेले यूसुफ चे ङुंहु पूता नु आशीष ङिली ते गेङी चा सहारा गेहती कर नरीकारा नु ङण्डवत करली।
22विश्वासा लारे ही यूसुफ ने आपणे मरते बेले इस्राएली लौका चे बारे मां मिस्र महु निकलती जाणे ची चर्चा करली हुती ते आज्ञा ङिली हुती “जब तम्ही इठु जावा तां माया हङीया वी चली जजा।”
23विश्वासा लारे ही मूसा चे आई-ब़ा ने ओचे पैदा हुवणे चे बाद तीन मेहने लुकाती कर राखले। कांकि वाणे ङेखले, कि ब़ाल सोणे छै ते वे राजे ची आज्ञा कनु ना ङरली।
24विश्वासा लारे ही मूसे ने सियाणे हुती कर, फिरौन ची धूवे चा पूत किहवावणे कनु इन्कार करला। 25ऐवास्ते कि ओनु पापा मां थोड़ी ङिहें सोख भोग़णे कनु नरीकारा चे लौका लारे ङोख भोग़णे होर वी उत्तम लाग़ले। 26ते मसीह वास्ते निन्दा सेहणी, मिस्र देशा चे भरले आले गोदामा कनु ज्यादा उचित समझले। कांकि ओचीया आँख प्रतिफल मिलणे उपर लाग़लीया भिलतीया। 27विश्वासा लारे ही ओ राजे चे क्रोधा कनु नी ङरला ते ओणे मिस्र देशा नु छोड़ती ङिले, कांकि ओ अणङेखले नरीकारा नु, मनती गेहले ङेखता हुला मजबूत रेहला। 28विश्वासा लारे ही ओणे फसह ते लुहीं छंडकणे ची विधि मनती गेहली, कि नाश करने आला दूत इस्राएलीया चे पलेठी आले पूता नु नाश ना करो।
29विश्वासा लारे ही वे लाल समुन्दरा चे पार हुती गेले जिंवे मनती गिहा वे सूखी भोंये उपरु। ते जब मिस्रीया ने उसड़े ही करने चाह्ले तां सारे ब़ुङती मरले।
30विश्वासा लारे ही, यरीहो ची शहरपनाह जब लौका ने साता ङिहां तक, विचा चक्कर लाती चुकले तां वा ढेती पली।
31विश्वासा लारे ही राहाब नांवा ची वेश्या, आज्ञा ना मनणे आला लारे नाश कोनी हुली, कांकि विणे भेदीया नु सही सलामत राखले हुते।
32हमा मैं नेरे का किहे? कांकि समय कोनी रेहला कि मैं गिदोन ते बाराक ते शिमशोन ते यिफतह ते दाऊद ते शमूएल ते भविष्यवक्ता चा जिक्र करे। 33यांणे विश्वासा लारे राज़ जीतले, धार्मिकता चे काम करले, वायदे करले आलीया चीजा गेहलीया, शेरा चे मुँह बन्द करले, 34जाखते चीया ज्वाला नु ठाडे करले, तलवारी ची धारी कनु बचती निकड़ले, जाई कमजोरी ही ताकत मां बदलती गेली, लड़ाईया मां वीर निकड़ले, विदेशी फौजा नु मारती दुरकाणले। 35असतरीया ने आपणे मरले आला नु बल्ति जीते गेहले,
कितने तां मार खाते-खाते मरती गेले ते छुटकारा कोनी चाह्ला, कांकि वे उत्तम पुनरुत्थान चे भईवाल हो। 36कई नेरे लौक मखोला मां उङारले गेले, ते कोड़े खाले। जबकि कोच्छ लौक ब़ांहले गेले, ते कैदखाने मां नाखले गेले। 37वांचा पत्थराव करला गेला, आरी लारे चीरवाले गेले, तलवारी लारे मारले गेले। वे कंगाली मां ते क्लेशा मां ते बुरे व्यवहारा नु सेहते हुले भेङा ते ब़ाकरीया ची खाला नु ओढ़ले हुले इंगे-ऊंगे भटकते रेहले। 38ते बरब्याना मां ते पहाड़ा ते गुफा मां, ते धरती चे खङा मां भटकते-लुकते फिरले। कांकि संसारा ने विश्वास करने आले यां लौका नु अपनाले कोनी।
39विश्वासा चे जरिये यां सब चे बारे मां आच्छी ग़वाही ङिली गेली, तां वी वानु वायदा करला आलीया चीजा कोनी मिड़लीया। 40कांकि नरीकारा ने अम्चे वास्ते पेहले कनु हेक उत्तम बात ठहराली कि वे अम्चे लारे जुड़ले बिना सेद्ध ना बण सग़ो।
Currently Selected:
इब्रानियां 11: ODR
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0
