इब्रानियां 13

ग्रहणयोग सेवा

1विश्‍वासी भावां आलीकर हेके ङुजे लारे प्रेम राखा। 2अतिथि-सत्कार करने ना भूलजा, कांकि इसड़े करने लारे कोच्छ लौका ने अणजाणे मां स्वर्ग़दूता चा अतिथि-सत्कार करला। 3कैदीया ची इसड़ी सुधि गिहा मनती गिहा वांचे लारे तम्ही वी कैद मां छिवा, सताले जाणे आला नू भूलजा कांकि तम्ही सारे हेक शरीरा चे अंग छिवा।

4बीहा ची बात सम्मानित रिहो ते बीहा चे बीछाणे निष्कलंक रिहो, कांकि नरीकार व्यभिचारीया ते परअसतरी गामीया चा न्यां करी।

5आपणे जीवन नु धन चे लालच कनु दूर राखा, ते जको तम्चे गोढु छै, ओचे उपर संतुष्टी करा, कांकि नरीकारा ने आप केहले,

“मैं तनु कङी ना छोड़ी,

ते ना कङी तनु त्याग़ी।”

6ऐवास्ते अम्ही बेधड़क हुती कर किहुं,

“प्रभु माया सहायक छै,

मैं नी ङरी।

इन्सान माये का बिगाड़ सग़े?”

7जको तम्चे अग़ुवे हुते, ते जेह्णे तम्हानु नरीकारा चा वचन सुणाला हुता, वानु याद राखा ते ध्यानारीत वांचे चाल-चलन चा अन्त ङेखती कर वांचे विश्‍वास चा अनुसरण करा। 8मसीह ईशु, काल ते आज़ ते युग-युग हेक जिसड़ा छै।

9बदड़ली आली विचित्र प्रकार ते अणजाण शिक्षा चे बहकावे मां ना बहकजा। दिला वास्ते सही छै कि ऊं अनुग्रह चे जरिये मजबूत करले जाओ, ना कि खाणे चे चीजा जरिये, खान-पान चे सम्बन्धी प्रथा चे जरिये काये भले कोनी हुले।

10अम्ची मसीह मां हेक इसड़ी वेदी छै, जाये उपर कनु खाणे चा अधिकार वां याजका नु कोनी जको तम्बू मां सेवा करी। 11कांकि जिसे ढौरा चे लुहीं महायाजक पाप-बलि वास्ते अति पवित्र स्थान मां गेहती जाये, वांची देह छावणी चे ब़ाहर ब़ालती ङिली जाये। 12ऐवास्ते ईशु ने वी शहरा चे ब़ाहर ङोख सेहले कि ओ खौद्द आपणे लुहींया लारे लौका नु शोद्ध करो। 13ऐवास्ते अम्ही वी ओचे लारे भेंट करु छावणी चे ब़ाहर उसड़ी ही निन्दा चवणे वास्ते चालु, जिंवे ओणे चली। 14कांकि इठे अम्चा कुई स्थाई रेहणे आला शहर कोनी, बल्कि अम्ही ओ शहरा ची बाट ङेखु पले जको आणे आला अनन्तकाल चा छै। 15ऐवास्ते अम्ही ईशु चे जरिये नरीकारा नु लगातार अराधना चे बलिदान भेंट करु यानि वां होठा ची स्तुति, जको ओचे नांवा चे प्रति धन्यवाद प्रकट करी। 16भलाई करने ते चीजा चा आपस मां मिलती कर बाटणे ना छोड़ा कांकि ये इसड़े बलिदान छै, जको नरीकारा नु खौश करे।

प्राथना चा निवेदन

17आपणे अग़ुवा ची आज्ञापालन करा, वांचे अधीन रिहा, वे तम्ची आत्मा चे पाहरेदार छी, वानु तम्चे बारे मां हिसाब ङेणा, वांचे वास्ते ईं काम खुशी चा विषय बणला रिहो। अगर हेक कष्ट भरला बोझ बणा, तां ईं तम्चे वास्ते फायदेमन्द नी हुवी।

18अम्चे वास्ते लगातार प्राथना करते रिहा कांकि अम्हानु भरोसा छै कि अम्चा विवेक शोद्ध छै, ते अम्ही सारीया बाता मां आच्छी चाल चलणे चाहु। 19तम्चे कनु माई खास बिनती छै कि प्राथना करा कि मैं तम्चे लारे मिलणे वास्ते जल्दी आ सग़े।

आशीर्वाद

20शान्ति चा नरीकार, जेह्णे भेङा चे महान आजड़ी यानि मसीह ईशु, अम्चे प्रभु ईशु नु अनन्त वाचा चे लुहींया चे जरिये मरले आला महु जीते करले, 21तम्हानु हर हेक भली बाते मां सेद्ध करो, जाये कनु तम्ही ओची इच्छा पुरी करा, ते जको कोच्छ ओनु भावे ऊं ईशु मसीह चे जरिये अम्चे मां पुरे करो, ओची महिमा युगानयुग हुती रिहो। आमीन।

22हे माये भऊ, मैं तम्चे कनु बिनती करे पला कि ऐ हिम्मत चे उपदेश चीया बाता नु मनती गिहा, कांकि मैं तम्हानु ईं ब़ोहत थोड़े शब्दा मां लिखले छै।

23मैं चाहवे कि तम्ही ईं जाणती गिहा अम्चे भावा तीमुथियुस नु कैदखाने महु रिहा करती ङिले गेले, अगर ओ इठे जल्दी आओ तां ओचे लारे आती कर मैं तम्चे लारे मुलाकात करी।

24तम्चे सारे अग़ुवा ते सारे नरीकारा चे लौका नु माया नमस्कार केहजा, इटली वासीया चा तम्हानु नमस्कार।

25तम्चे सब उपर नरीकारा चा अनुग्रह बणला रिहो। आमीन।

Currently Selected:

इब्रानियां 13: ODR

Highlight

Copy

Compare