गलातियां 3

नरीकारा चा वरदान विश्‍वास लारे मिले

1हे गलाति शहरा मां रेहणे आले ब़ुध्दु लौक तम्हानु केहणे मोहति गेले? मैं तां तम्हानु खोलती कर बावड़ती ङिले ते, जिंवे तम्चे सामणे ईशु मसीह नु क्रूसा उपर चढ़ाले गेले, 2मैं ब़स तम्हा कनु इतने ही जाणने चाहवें कि का पवित्र आत्मा तम्हानु व्यवस्था चे कामा लारे, जा विश्‍वास लारे मिड़ला, 3का तम्ही इसड़े ब़ुध्दु छिवा जको पवित्र आत्मा ची रीति पर शुरु करती ते शरीरा ची रीति पर अन्त करा। 4का तम्ही इतने ङोख बेकार मां ही चले? आस छै कि वे बेकार कोनी हुते! 5जको नरीकार तम्हानु पवित्र आत्मा चा दान करे ते सामर्थ चे काम करे का ओ व्यवस्था चे कामा लारे जा सुसमाचार चे विश्‍वास इसड़े करे?

6 # रोमि 4:3 “अब्राहम ने तां नरीकारा चे उपर विश्‍वास करला ते हा ओचे वास्ते धार्मिकता गिणला गेला।” 7#रोमि 4:16तम्ही ईं जाणती गिहा कि भरोसा करने आले ही अब्राहम ची ऊलाद्ध किहवाली, 8पवित्रशास्त्रा ने पेहले ही जाणती कर कि नरीकारा ने नेरीया जातिया नु विश्‍वास लारे ही धर्मी ठहरावी, पेहले कनु अब्राहम नु सुसमाचार सुणाती ङिला कि दुधे मां सारीया जातिया आशीष पावे। 9ऐवास्ते जको विश्‍वास करे ओ विश्‍वास करने आला अब्राहम लारे आशीष पावे।

10ऐवास्ते जितने लौक व्यवस्था चे कामा उपर भरोसा राखी वे श्राप चे गुलाम छी कांकि लिखले आले छै कि “जको कुई व्यवस्था चीया सारीया बाता पुरीया करने मां मजबूत ना रिही ऊं श्रापित छै। ” 11पर हा बात प्रकट छै कि व्यवस्था चे जरिये नरीकारा चे इठे कुई धर्मी ना ठहरी कांकि “धर्मी जन विश्‍वास लारे जीते रिही।”

12पर व्यवस्था चा विश्‍वास लारे सम्बन्ध कोनी, कांकि “जको व्यवस्था चा पालन करी ओ विचे लारे जीता रिही।” 13मसीह अम्चे वास्ते श्रापित बणला, अम्हानु मोल गेहती व्यवस्था चे श्राप कनु छुड़ाले, कांकि लिखले पले, “जको कुई काठ चे उपर लटकाले जाये ओ श्रापित छै।” 14ईं ऐवास्ते हुले कि अब्राहम ची आशीष मसीह ईशु मां नेरीया जातिया तक पुज़ो, ते अम्ही विश्‍वास लारे आत्मा गिहुं जिसी चा वायदा हुला हुता।

नियम ते वाचा

15हे माये भऊ ते ब़ेहणी मैं तम्हानु हेक मिसाल ङिये कि जाये बारे मां तम्ही जाणा जिंवे कि अगर बन्दा ची वाचा वी पक्‍का हुती जाओ तां ओनु वी कुई ना टाल सग़ी ना ही घटा बधा सग़ी। 16यूंही ही अब्राहम ते ओचे आणे आले वंश चे लारे करले गेले वायदे चे बारे मां छै, पवित्रशास्त्र मां ईं कोनी लिखले, “ओचे घणे वंशा वास्ते” अगर इसड़े हुवीया तां घणा ची तरफ इशारा हुवीया, पर पवित्रशास्त्र मां हेक वचन आला, “दुधे वंश वास्ते” जको मसीह छै। 17पर मैं किहे जको वाचा नरीकारा ने पेहले पक्‍की करली तां विनु चार साओ त्रीस साल बाद आणे आले मूसा ची व्यवस्था ना टाल सग़ली ते ना ही वायदा बेकार ठहरा सग़ली।

18 # रोमि 4:14 अगर वसीयत व्यवस्था लारे मिलीहा ते हा वायदा लारे ना मेल सग़ीया पर नरीकारा ने आपणी दया लारे मुफ्त मां अब्राहम नु ऐ वायदे लारे वसीयत मां ङिली, 19तां व्यवस्था कां ङिली गेली? वा तां पापा ची वजह बादा मां ङिली कि ओचे वंशा चे आणे तक रिहो, वायदा हेक बिचोलीये चे रुप मां मूसा ची सहायता लारे स्वर्ग़दूता चे जरिये ङिली। 20बिचोला तां कम से कम ङोन बन्दा चे बीच मां रिहे, पर नरीकार हेक ही छै।

ब़ाल ते गुलाम

21तां कां व्यवस्था नरीकारा चे वायदे चे विरोध मां छै? कङी वी ना हो, कांकि अगर नियम इसड़ा ङिला जईया जको जीवन ङे सग़ीया तां सच्‍चमां धार्मिकता व्यवस्था लारे ही हुवीया, 22पर पवित्रशास्त्र मां लिखले आले छै कि हा पूरा संसार पाप चा गुलाम छै जिंवे ओ वायदा जको विश्‍वास लारे ईशु मसीह मां छै, नरीकारा मां सेर्फ विश्‍वास करने आला नु ङिये।

23ऐ विश्‍वास आणे कनु पेहले, अम्चे व्यवस्था ची ङेखभाल मां जको विश्‍वास आणे करने आली वायदा पुरी हुवणे तक गुलाम चे रूपा मां राखले। 24ऐवास्ते व्यवस्था मसीह चे आणे तक गेहती जेह्णे आला हेक सम्भालणे आला बणती गेला, ताकि अम्ही विश्‍वास लारे धर्मी बणती जहु। 25पर जब विश्‍वास आती गेला तां हमा अम्ही सिखावणे आले चे अधीन कोनी रेहले।

26कांकि तम्ही सारे ओ विश्‍वास लारे जको ईशु मसीह उपर छै, नरीकारा ची ऊलाद्ध छिवा, 27ते तम्चे महु जितना ने मसीह मां बपतिस्मा गेहला, ते वाणे मसीह नु अपनाती गेले। 28हमा ना कुई यहूदी रेहला ना कुई यूनानी, ना कुई गुलाम रेहला ना कुई आजाद, ना मर्द रेहला ना कुई असतरी कांकि तम्ही सारे ईशु मसीह मां हेक छिवा, 29#रोमि 4:13अगर तम्ही मसीह चे छिवा तां तम्ही अब्राहम चे वंशज वी छिवा। जको वायदा नरीकारा ने अब्राहम लारे करला हुता ओह वायदे चे वारिस वी छिवा।

Currently Selected:

गलातियां 3: ODR

Highlight

Copy

Compare