गलातियां 2

प्रेरितां ने पौलुस नु प्रेरित मनले

1 # प्रेरि 11:30; 15:2 चौहङा साला चे बाद, मैं बरनबास चे लारे यरुशलेम शहरा मां गेला ते तीतुस नु लारे गेहली गेला। 2माये जाणे इसड़े दर्शन चे तरफु हुले, जको सुसमाचार मां नेरीया जातिया मां प्रचार करे, ओ वानु मैं बावड़ती ङिले, पर एकान्त मां वानु जको बङे समझले जते ताकि इसड़े ना कि माई ऐ समय ची ते भांसली द्रोक भज़ बेकार ना चाह्‍ली जाओ,

3ते तीतुस नु वी जको माये लारे छै, हा यूनानी छै ऐनू खतना कराणे वास्ते मजबूर कोनी करले 4ईं वां कूड़े भावां ची वजह कनु हुले कि जको चोरी लारे घिरती आलते, मसीह ईशु मां आजादी जको अम्हानु मिड़ली विचा भेद गेहती अम्हानु गुलाम बणाओ। 5हेक घड़ी भर वी अम्ही वांचे अधीन हुवणे कोनी मनले ऐवास्ते कि सुसमाचार ची सच्‍चाई तम्चे मां बणली रिहो,

6बल्ति जको मनले आले हुते चाहे जिसड़े वी हुते मनु वांचे लारे का काम, नरीकारा ची नजरी मां सब बराबर छी, वे जको वी कहीं हुते मनु वांचे कनु कुई फायदा कोनी, 7पर वां बङका ने ङेखले कि पतरस नु खतना करले आले लौका मां सुसमाचार सुणावणा सोंपला गेला, पर यूंही बिना खतना करले आले लौका मां सुसमाचार सुणावणा मनु सोंपले गेले। 8नरीकारा ने पतरस नु हेक प्रेरित चे रुप मां काम करने ची ताकत ङिली हुती, पतरस यहूदी लौका वास्ते हेक प्रेरित छै, नरीकारा ने मनु वी हेक प्रेरित चे रुप मां काम करने ची ताकत ङिली, पर मैं वां लौका चा प्रेरित छै जको नेरीया जातिया छी, 9जिसे बेले वाणे ओ अनुग्रह नु जको मनु मिड़ला हुता समझती गेले, तां याकूब, ते यूहन्‍ना, ते पतरस जको कलीसिया चे खम्बे समझले जते, मनु ते बरनबास नु आपणी संगति चा सज़्ज़ा हाथ ङिला, कि अम्ही नेरीया जातिया मां जऊं ते वे खतना करले आले यहूदी लौका मां, 10ब़स ईं केहले कि तम्ही कंगाला ची सुधि करजा, ईं काम करने वास्ते मैं आप वी खौद्द यतन करता रेहता।

पौलुस ने पतरस चा विरोध करला

11जिसे बेले पतरस अन्ताकिया मां आला ते मैं ओचे सामणे ओचा विरोध करला कांकि ओ कसूरवार हुता, 12ऐवास्ते कि याकूब चे तरफु आवणे आले लौक, जको चाहते हुते कि नेरीया जातिया चा खतना हुवणा चाही छै, कांकि पतरस नेरीया जातिया लारे खाता-पीता हुता, पर खतना करले आले लौका चे सामणे ङरु लाग़ला, ते भांसु हटती गेला ते किनारा करु लाग़ला। 13वांचे लारे बाकि यहूदिया ने वी कप्पट करला, ते इठे तक बरनबास वी वांचे कप्पट मां पड़ती गेला। 14पर जब मैं ङेखले कि वे सुसमाचार ची सच्‍चाई उपर सिधी चाल ना चली, तां सारा चे सामणे पतरस नु केहले, “जब तु यहूदी हुती कर नेरीया जातिया आलीकर चली ते यहूदिया चे जिसड़ा ना तां नेरीया जातिया नु कां किही यहूदिया जिसड़े चलणे वास्ते?

यहूदी ते नेरीया जातिया विश्‍वास लारे बचे

15“अम्ही तां जनमा कनु यहूदी छिऊं पापी नेरीया जातिया महु कोनी, 16#रोमि 3:20; रोमि 3:22बल्ति वी ईं जाणु कि कुई बन्दी मूसा चे व्यवस्था चा पालन करने ची वजह कनु धर्मी ना हो सग़ी बल्कि सेर्फ ईशु मसीह पर विश्‍वास करने लारे धर्मी बणाले जाये अम्ही ऐवास्ते ईशु मसीह पर विश्‍वास करला ताकि ऐ विश्‍वास ची वजह कनु अम्ही धर्मी हुती जहु ना कि व्यवस्था चा पालन करने ची वजह कनु। कांकि व्यवस्था चा पालन करने लारे कुई वी बन्दे धर्मी ना बण सग़ी।

17“पर अम्ही जको मसीह मां धर्मी ठहरना चाहु, अगर आप ही पापी निकले तां का मसीह पाप चा सेवक ठहरी? कङी वी ना 18अगर जको अम्ही व्यवस्था छोड़ती ङिले, ते वे बाता बल्ति दोराहुं तां का अम्ही आज्ञा चा उलंघन करने आले दोषी ना ठहरले, हा ठहरले। 19मैं तां व्यवस्था चे लारे व्यवस्था वास्ते मरती गेला, ताकि नरीकारा चे वास्ते जिंवे। 20मैं मसीह चे लारे क्रूसा उपर चढ़ाला गेला, हमा मैं जीता ना रेहला, पर मसीह माये मां जीता छै, मैं शरीरा मां जको हमा जीता छै, तां सेर्फ ओ विश्‍वास लारे जीता छै जको नरीकारा चे पूता उपर छै जेह्णे मनु प्रेम करला, ते आपणे आप नु माये वास्ते ङिती ङिले। 21मैं नरीकारा चे अनुग्रह नु बेकार ना ठहरावी, अगर व्यवस्था लारे धार्मिकता मिलीहा ते मसीह चे मरणे बेकार हुवीया।”

Currently Selected:

गलातियां 2: ODR

Highlight

Copy

Compare