गलातियां 4

1मैं हा किहे कि वारिस जब तक ब़ाल छै, हालांकि ओ सारीया चीजा चा मालिक छै, बल्ति वी ओचे मां ते दासा मां कई फर्क कोनी। 2ब़ाल ते रखवाले ते सेवका चा तब तक वशा मां रिहे, जब तक ओचा समय ना आती जई जको ओचे ब़ा ने ठहराला। 3अम्ची वी उसड़ी दशा हुती अम्ही वी जिसे बेले ब़ाला चे समान हुते तां दुनिया ची व्यवस्था गुलामी मां हुते। 4पर जिसे बेले समय पूरा हुला तां नरीकारा ने आपणे पूता नु भेज़ले, ओ हेक असतरी महु जमला ते व्यवस्था चे अधीन पैदा हुला। 5#रोमि 8:15–17ताकि व्यवस्था चे अधीन हुले आला नु मोल गेहती छुड़ाती गिहो ते अम्ही गोद गेहले आले ब़ाले छिऊं।

6ऐवास्ते तम्ही ओचे पूत छिवा नरीकारा ने आपणे पूता ची आत्मा नु तम्चे दिला मां भेज़े ते वा “हे पिताजी, हे ब़ा केहती साङ मारे।” 7ऐवास्ते हमा तम्ही दास कोनी पर पूत छिवा, जिसे बेले पूत जुड़ती गेला तां नरीकारा चे जरिये ओचा वारिस वी जुड़ला।

गलाति शहरा चे बन्दा चे वास्ते पौलुस ची चिंता

8पेहले तां तम्ही नरीकारा ना जाणती कर तां वांचे दास हुते, जको सुभाव मां नरीकार कोनी हुते? 9पर हमा जको तम्ही नरीकारा नु पिछाणती गेले बल्कि नरीकारा ने तम्हानु पिछाणले, तां वा कमजोर ते संसारा ची बेकार जिसड़ी शिक्षा चीया बाता ची ओर कां मुड़ा? का वांचे तम्ही दोबारा गुलाम हुवणे चाहवा? 10तम्ही ङिहें, मेहने, साल ते मौसमा नु मना। 11मैं तम्चे बारे मां ङरे कि कहीं इसड़े ना हुती जाये जको मेहनत मैं तम्चे वास्ते करली वा खराब ना हुती जाओ।

12हे भऊ मैं तम्हा कनु विनती करे कि तम्ही वी माये जिसड़े हुती जावा कांकि मैं वी तम्चे जिसड़ा हुती गेला, तम्ही माये कहीं कोनी बिगाड़ले। 13तम्ही जाणा कि मैं पेहले शरीरा ची बिमारी चे वजह पेहली वारी तम्हानु ही सुसमाचार सुणाला। 14ते माई बिमारी तम्ची परीक्षा ची घड़ी हुती, बल्ति वी तम्ही माई शरीरा ची दशा नु तोच्छ कोनी जाणले ना ओकनु सूग़ करली बल्कि नरीकारा चे दूत ते खौद्द ईशु मसीह चे समान मनु ग्रहण करले 15ते वा तम्चे खुशी मनावणे ची मर्जी चे का हुले? मैं तम्ची ये बाते वा ग़वाह छै, अगर हो सग़े तां तम्ही आपणीया आंखी काढ़ती वी ङिती ङिया। 16ते का मैं तम्चे लारे सच्‍च ब़ोलणे लारे तम्चा दुश्मन बणती गेला?

17वे मूसा चे व्यवस्था उपर चलाणे आले लौक अम्चे सज़्ज़ण तां बणने चाहवी, पर आच्छे मकसद लारे कोनी वे तम्हानु माये कनु अलग़ करने चाहवी, कि वानु ही तम्ही आपणा सज़्ज़ण बणाती गिहा। 18पर हा वी आच्छी बात छै कि तम्ही हर आच्छी बाते मां हर समय मां सज़्ज़ण जोड़ने चा यतन करले करा, ना खाली ओ समय कि जिसे बेले मैं तम्चे लारे रिहे। 19हे माई ब़ाले जब तक तम्चे मां मसीह चा रुप ना जुड़ती जाये ओ बेले तक मैं तम्चे वास्ते जाप्पे जिसड़ा दर्द सीहें। 20इच्छा तां हा किहे कि हमा तम्चे गोढु आती ते नेरे ही प्रकारा लारे ब़ोले कांकि तम्चे बारे मां मैं समझे कोनी पला तम्चे वास्ते का करे।

सारा ते हाजिरा ची मिसाल

21तम्ही जको मूसा चे व्यवस्था ची अधीन हुवणा चाहवा मनु बावड़ा का तम्ही व्यवस्था ची ना सुणा ईं लिखले पले। 22मूसा ने हा लिखले कि अब्राहम चे ङोन पूत हुले। हेक दासी हाजिरा महु ते हेक घराआली आजाद असतरी सारा महु पर। 23जको गुलाम असतरी महु पैदा हुला ओ शरीरा ची रीति लारे जमला, ते जको घराआली आजाद असतरी महु जमला ते ओ नरीकारा ची तरफा कनु करले गेले वायदे चा नतीजा हुता।

24ये बाता मिसाल चे समान छी, ये ङोन असतरीया ङोन वाचा छी हेक वाचा जको नरीकारा ने इस्राएली लौका लारे सीनै पहाड़ा उपर करली हाजिरा चे समान छै, हाजिरा ने वा लौका नु पैदा करले जको गुलामी वास्ते हुते हा वाचा हाजिरा लारे वास्ता राखे। 25हाजिरा मनाकि वा अरब देश चा सीनै पहाड़ छै, जको आज़ चा यरुशलेम शहर विचे आलीकर छै, कांकि वा आपणे ब़ाला लारे गुलामी मां छै। 26पर स्वर्ग़ चा यरुशलेम शहर आजाद असतरी सारा चे समान छै जको गुलाम कोनी वा ही अम्चे विश्‍वास करले आले ची आई छै। 27कांकि पवित्रशास्त्र मां ओचे बारे इसड़े लिखले पले

“कि हे ओत्री तु जको ना जणी खौश रेह।

तनु जको जाप्पे चा दर्द ना हुवी।

तु गेला खोलती ओ नरीकारा ची जय-जयकार कर

कांकि छोड़ली आली ची ऊलाद्ध परनीली आली ची ऊलाद्धी कनु वी ज्यादा छै।”

28हे भऊ ब़ेहण हमा अब्राहम चे पूत इसहाक चे समान नरीकारा ची वाचा ची ऊलाद्ध छिवा। 29ते जिंवे ओ समय मां शरीरा चे लारे पैदा हुला आला, पवित्र आत्मा चे वायदे लारे पैदा हुले आले नु सताता यूंही हमा वी हुवे। 30पर पवित्रशास्त्र मां इसड़े लिखले पले, “गुलाम ते विचे पूता नु काढ़ती छोड़। कांकि गुलाम चा पूत आजाद असतरी चे पूता लारे उत्तराधिकारी कोनी हुवी।” 31हे भऊ ते ब़ेहणी अम्ही गुलाम असतरी ची ऊलाद्ध कोनी, पर परनीली आजाद असतरी ची ऊलाद्ध छिऊं।

Currently Selected:

गलातियां 4: ODR

Highlight

Copy

Compare