गलातियां 1

1पौलुस नु प्रेरित चा अधिकार, ना इन्साना ची ओर कनु ते ना ही इन्साना चे तरफु, बल्कि ईशु मसीह ते नरीकार ब़ा चे जरिये, जेह्णे ईशु मसीह नु मरले आला महु जिवाले, मिड़ला। 2ते माये लारे रेहणे आले सारे,

भावां चे तरफु, गलाति शहरा ची कलीसिया चे लौका नु नमस्कार,

3नरीकार ब़ा ते अम्चे प्रभु ईशु मसीह ची ओर कनु तम्हानु अनुग्रह ते शान्ति मिलती रिहो। 4प्रभु ईशु मसीह ने आपणे आप नु अम्चे पापा चे वास्ते ङिती ङिले, ताकि अम्चे नरीकार ते ब़ा ची इच्छा चे अनुसार अम्हानु ऐ वर्तमान बुरे संसारा कनु छुड़ाओ। 5ओची स्तुति बढ़ाई युगानयुग हुती रिहो। आमीन।

सच्‍चा सुसमाचार हेको ही छै

6मनु अचम्भा हुवे पला कि जेह्णे तम्हानु ईशु मसीह चे अनुग्रह मां हकारले, ओकनु तम्ही इतनी जल्दी भूलती कर नेरे ही तरह चे सुसमाचार सनु झुकु लाग़ती गेले। 7पर ओ ङुजा सुसमाचार छै ही कोनी, पर बात हा छै कि कितने इसड़े छी जको तम्हानु भरमाती नाखी, ते ईशु मसीह चे सुसमाचार नु बिगाड़ना चाहवी। 8अगर अम्चे महु जा स्वर्ग़ा महु कुई दूत उतरती, ते ऐ सुसमाचार कनु अलावा जको अम्ही तम्हानु सुणाला, कुई नेरा सुसमाचार तम्हानु सुणावे, तां श्रापित हो। 9जको मैं पेहले केहती ङिले यूंही मैं हमा बल्ति किहे पला, ओ सुसमाचार नु छोड़ती जानु तम्ही ग्रहण करला, अगर कुई नेरा सुसमाचार सुणावे तां श्रापित हो।

10हमा मैं का बन्दा नु मने जा नरीकारा नु का मैं बन्दा नु खौश करना चाहवे? अगर मैं बन्दा नु खौश करने चाहवें तां ईशु मसीह चा दास ना हुवीया।

पौलुस चा सुसमाचार नरीकारा कनु मिड़ला

11हे माये भऊ, ते ब़ेहणी मैं तम्हानु बावड़ती ङिये कि जको सुसमाचार मैं सुणाला, ओ कुई बन्दा कनु कोनी मनु मिड़ला। 12कांकि ना तां कुई बन्दे कनु गेहला, ना ही कुई बन्दे मनु सिखाला, पर हा ईशु मसीह चे अगुवाई लारे मनु मिड़ला।

13 # प्रेरि 8:3; 22:4,5; 26:9–11 यहूदिया चे पन्था मां जको माया पेहले चाल-चलन हुता ओचे बारे तम्ही सुणती चुकले छिवा कि मैं नरीकारा ची कलीसिया नु ब़ोहत ही सताता ते नाश करता। 14#प्रेरि 22:3आपणे घणे जाति आला नु जको माये उम्री चे हुते, यहूदी पन्था मां ज्यादा बधाता ते आपणे ङाङा-ब़ा ची रिति-रिवाजा वास्ते मैं घणा ही होंसला बढाता।

15 # प्रेरि 9:3–6; 22:6–10; 26:13–18 पर नरीकारा ने जको मनु जनमा कनु पेहले चुणती गेले ते आपणे अनुग्रह लारे मनु हकारले, नरीकारा नु ईं भाले। 16कि, ओ आपणे पूता चा ज्ञान माये उपर उजागर करे, जको मैं नेरीया जातिया मां वी ईशु मसीह चा सुसमाचार सुणा सग़े। ऐ बारे मैं ओ बेले कुई बन्दे चे लारे सलाह कोनी करली। 17ते ना ही मैं प्रेरितां चे गोढु यरुशलेम शहरा मैं गेला जको माये कनु पेहले प्रेरित हुते, पर मैं ओ बेले अरब देशा मां चाह्‍ला गेला, ते अरब देशा महु दमिश्क शहरा मां आती गेला।

18 # प्रेरि 9:26–30 बल्ति तीन साला कनु बाद मैं कैफा नु मिलणे वास्ते यरुशलेम शहरा मां गेला, ते ओचे गोढु पन्द्रहा ङिहां तक रेहला। 19पर प्रभु चा भऊ याकूब नु छोड़ती कर नेरा प्रेरिता महु कानु कोनी मिड़ला। 20जको बाता मैं तम्हानु लिखे पला, ङेखा, नरीकारा नु ग़वाह मनती कर किहे पला कि वे कूड़ीया कोनी। 21ओचे बाद मैं सीरिया ते किलिकिया देशा मां गेला।

22पर जको यहूदिया देशा ची कलीसिया जको मसीह मां हुती, वाणे माई शकल तक कोनी ङेखली। 23पर वे कलीसिया ने ईं सुणले कि जको पेहले अम्हानु सताता रेहता, ओ हमा ओही विश्‍वास चा सुसमाचार सुणावे, जानु पेहले नाश करता। 24ते वे माई वजह कनु नरीकारा ची स्तुति करते।

Currently Selected:

गलातियां 1: ODR

Highlight

Copy

Compare