2 तीमुथियुस 2

ईशु मसीही चा सच्‍चा सैनिक

1ऐवास्ते ओ माये पूता चे समान तीमुथियुस। तु ओ अनुग्रह लारे जको ईशु मसीह मां छै, मजबूत हुती जा। 2ते मसीह चे बारे मां जको वी बाता घणा ग़वाह चे सामणे माये कनु सुणलीया, वानु विश्‍वास करने आला बन्दा नु सिखाती ङे, जको नेरा नु सिखावणे चे लायक हो।

3ईशु मसीह चे आच्छे योद्धा ची तरह माये लारे ङोख चा। 4जिसे बेले कुई योद्धा लड़ाई उपर जाये वे, ते ऐवास्ते कि आपणी भरती करने आला नु खौश करो, आपणे आप नु संसारा चे कामा मां ना फसाओ। 5बल्ति अखाड़े मां लड़ने आला अगर नियम ते तरीके लारे ना लड़ी ते इनाम यां ते बल्ति मुग़ट ना पा सग़ी। 6जको कड़ी मेहनत करे, फला चा पेहला भाग़ ओनु मिलणा चाही छै। 7जको मैं किहे पला, ओचे उपर ध्यान ङे ते प्रभु तनु सारीया बाता ची समझ ङिही।

8ईशु मसीह नु याद राख, जको दाऊद चे वंशा कनु पैदा हुला, ते मरला आला महु जीता हुला, ते हाओ माये सुसमाचार चे अनुसार छै। 9जाये वास्ते मैं कुकर्मी जिसड़ा ङोख चवे पला, इठे तक कि कैद वी छै, पर नरीकारा चा वचन कैद कोनी। 10ऐह वजह कनु मैं चुणला आला बन्दा चे वास्ते सारे कोच्छ सहन करे पला, कि वे ओ उद्धार नु जको ईशु मसीह मां छै, हमेशा ची महिमा नु पाओ। 11हा बात सच्‍च छै कि,

अगर अम्ही ओचे लारे मरती गेले

ते ओचे लारे जिऊं वी।

12 # मत्ती 10:33; लूक 12:9 अगर अम्ही ईशु मसीह चे वास्ते तसल्‍ली सहन करते रिहुं,

ते ओचे लारे राज़ वी करु,

अगर अम्ही ओचा इन्कार करु तां

ओ वी अम्चा इन्कार करी।

13अगर अम्ही विश्‍वास चे लायक ना वी रिहुं,

तांवी ओ विश्‍वास चे लायक बणला रिही,

कांकि ओ खौद्द आपणा इन्कार ना कर सग़ी।

आच्छा कारीगर

14यां बाता ची याद वानु ङिवा ते प्रभु चे सामणे चिताती ङे कि अक्षरा उपर बहस-बाजी ना करले करो, जाये कनु कहीं फायदा ना हुवी बल्कि सुणने आले बिगड़ती जई। 15आपणे आप नु नरीकारा चे ग्रहण योग्य ते इसड़े काम करने आला ते हुवणे ची कोशिस कर, जको शर्मसार ना हो सग़ो, ते जको सच्‍चाई चे वचना नु सही तरीके चे लारे कामा मां आणता हो। 16पर संसारा चे गन्दे बकवास कनु बचला रेह, कांकि ये बाता बन्दा नु नरीकारा कनु दूर करी। 17ते वांचा वचन बढ़ले आले घाव चे समान फैलता जई, हुमिनयुस ते फिलेतुस वी वांचे ही महु छी। 18जको ईं केहती कर कि पुनरुत्थान हुती गेला सच्‍चाई कनु भटकती गेले, ते कोच्छ लौका चे विश्‍वास नु उलट-पुलट करती नाखला। 19तां वी नरीकारा ची पक्‍की नीम बणली रिहे, ते ओचे उपर हा छाप लाग़ली पली, “प्रभु आपणा नु पिछाणे,” ते “जको कुई प्रभु चे नां गिहे, ऊं अधर्म कनु बचले रिहो।”

20बङे घरा मां ना हेको सोने चान्दी ची ठांवे रिही, बल्कि लाकड़ी ची ते माटी ची वी रिही, कुई-कुई तां कद्दर चे वास्ते ते कुई-कुई अनादर चे वास्ते। 21अगर कुई आपणे आप नु बुराईया कनु शोद्ध करी, ते ऊं कद्दर चे ठां, ते पवित्र बणले रिही, ते मालिका चे कामे आवी, ते हर भले कामा चे वास्ते तियार हुवी।

22जवानी ची बुरी लालसा कनु दूर रेह वा सारा चे लारे जको शोद्ध मना लारे प्रभु नु हकारी। वांचे लारे धर्म चा जीवन, विश्‍वास, प्रेम ते शान्ति चा पीछा कर। 23पर मूर्खता, ऐ बुरे संसारा ची बहस-बाजी कनु दूर रेह, कांकि तु जाणी, कि याकनु झग़ड़े हुवी। 24ते प्रभु चे दास नु झग़ड़ालु नी हुवणे चाही छै, ते सारा चे लारे मुलायम ते बन्दा नु शिक्षा ङेणे मां समझदार हुवणे चाही छै, ते सहन करने आला हो। 25ते विरोधीया नु नरमाई लारे समझाओ, का पता नरीकार वानु मन फिरावणे चे वास्ते मन ङियो, कि वे सच्‍चाई नु पिछाणो। 26ते ऐचे जरिये ओची इच्छा पुरी करने चे वास्ते सचेत हुती कर शैताना चे फन्दे कनु छुटती जाओ।

Currently Selected:

2 तीमुथियुस 2: ODR

Highlight

Copy

Compare