2 कुरिन्थियां 9

विश्‍वासीया ची सहायता करा

1हमा वे सेवा चे बारे जको यहूदी प्रदेस मां नरीकारा चे लौका वास्ते करली जाये, मनु तम्चे वास्ते लिखणे जरुरी कोनी। 2कांकि मैं तम्चे मना ची तियारी नु जाणे, जाई वजह कनु मैं तम्चे बारे मां मकिदुनिया चे सामणे घमण्ड ङिखाणे, कि अखाया इलाके चे लौक हेक साला कनु तियार छी, ते तम्चे जोश ने घणा नु उभारले वी। 3पर मैं भावां नु ऐवास्ते भेज़ले, कि अम्ही जको घमण्ड तम्चे बारे मां ङिखाणला, ओ ये बाते मां बेकार ना हो, पर जिसड़े मैं वानु केहता आला, यूंही तम्ही तियार वी रेहजा। 4इसड़े ना हो कि, मकिदुनिया चे रेहणे आले माये लारे आओ, ते तम्हानु तियार ना ङेखो, ते का जाणे, ऐ भरोसे ची वजह कनु अम्हानु शर्मिन्दे हुवणे पड़ी, तम्हानु तां होर वी ज्यादा शर्मिन्दा हुवणे पड़ी। 5ऐवास्ते मैं भावां कनु हा विनती करने जरुरी समझले कि वे पेहले ही तम्चे गोढु जाओ, ते ओ उदारता चा फल जाये बारे मां पेहले कनु ही वचन ङिला गेलता ला, तियार करती कर राखो, कि हा काये दब़ाव चे वजह कोनी पर उदारता चे फला आलीकर तियार हो।

आच्छे दान दाता

6पर बात तां हा छै कि, जको थोड़े राहवे ऊं थोड़े ही बाढी, ते जको घणे राहवे, ऊं घणे बाढी। 7हर हेक जन जिसड़े मना मां सोचे उसड़ा ही दान करो, ते ना ही काये दब़ाव मां, कांकि नरीकार खुशी लारे ङेणा आला लारे प्रेम राखे। 8नरीकार हर तरह ची दया तम्हानु घणी सारी ङियो। जाये कनु हर बाते मां ते हर समय, सब कोच्छ, जको तम्हानु जरुरी हो, तम्चे कनु रिहो, ते हर हेक भले कामा वास्ते तम्चे कनु ब़ोहत कोच्छ हो। 9जिसड़े कि पवित्रशास्त्र मां लिखले पले,

“ओणे खुले मना लारे कंगाला नु दान करला,

ओची धार्मिकता सदा बणली रिही।”

10ओ नरीकार जको राहवणे आले नु बीज, ते खाणे वास्ते रोटी ङिये, ओही तम्हानु बीज वी ङिही, ते ओनु फलवन्त करी, ते तम्चे धार्मिकता चे फला नु बधावी। 11तम्ही हर बाते मां हर-तरहा ची उदारता चे वास्ते जको अम्चे जरिये नरीकारा चा धन्यवाद करवावे, धनवान करले जावा।

12कांकि ऐ दान ची सेवा नु पुरे करने लारे, ना सेर्फ नरीकारा चे लौका चा कमीया पुरीया हुवी, पर लौका ची ओर कनु नरीकारा चा ब़ोहत धन्यवाद हुवे। 13तम्ची ये सेवा नु सबूत मनती कर वे नरीकारा ची महिमा करे, कांकि तम्ही मसीह चे सुसमाचार ची आज्ञा मनते हुले स्वीकार करले ते तम्ही नरीकारा चे लौका वास्ते ते सब ची सहायता करने मां उदारता ङिखाणली। 14ते वे तम्चे वास्ते प्राथना करते रिही, ते कांकि तम्चे उपर नरीकारा ची बङी ही दया हुली, तम्ची लालसा करते रिही। 15नरीकारा चा, ओचे ओ वरदाना वास्ते जको वर्णन कनु ब़ाहर छै, धन्यवाद हो।

Currently Selected:

2 कुरिन्थियां 9: ODR

Highlight

Copy

Compare