2 कुरिन्थियां 10

आत्मिक योद्ध

1मैं पौलुस तम्हानु मसीह ची नरमाई, ते दयालुता चे वजह निवेदन करे पला। पर कोच्छ लौक किहे कि, मैं तम्चे सामणे नरमाई लारे बर्ताव करे, पर तम्चे कनु दूर हुवणे पर सख्ताई लारे बर्ताव करे। 2मैं हा विनती करे पला कि, तम्चे सामणे मनु बेधड़क हुती कर हिम्मत ना करनी पड़ो, जिसड़े मैं कितना उपर जको अम्हानु संसारिक रीति चे अनुसार चलणे आले समझी, मनु कठोरता ङिखाणने चा विचार आवे पला। 3हालांकि अम्ही संसारा मां रिहुं अगर अम्ही योद्ध यूं ना करु जिंवे संसार करे। 4कांकि अम्ची लड़ाई चे हथियार संसारिक कोनी, पर अन्धकार ची शक्‍ति नु ढाती नाखणे वास्ते नरीकारा ची सामर्थ छै। 5ऐवास्ते अम्ही विचारा नु, ते हर हेक ऊंची बाते नु, जको नरीकारा ची पिछाण चे विरोध मां उठे, ढाती नाखु, ते हर हेक भावना नु कैद करती कर मसीह चा आज्ञाकारी बणाती ङिऊं। 6तम्ची आज्ञाकारी ते सच्‍चाई ची भरपूरी साबित हुती जाणे उपर तां अम्ही सब नाफरमानी करने आले नु ङण्ड ङेणे वास्ते तियार छिऊं।

पौलुस चे अधिकार

7तम्ही यां बाता नु ङेखा, जको आंखी चे सामणे छी। अगर कानु आपणे खौद्द चे उपर हा भरोसा छै कि, “मैं मसीह चा छै,” ते ओ ईं वी जाणती गिहो कि, जिंवे ओ मसीह चा छै, यूंही अम्ही वी मसीह चे छिऊं। 8कांकि अगर मैं ओ अधिकार चे बारे मां होर वी घमण्ड ङिखाणे, जको प्रभु ने तम्हानु बिगाड़ने वास्ते कोनी, पर बणावणे वास्ते अम्हानु ङिला, तां शर्मसार नी हुवी। 9हा मैं ऐवास्ते किहे कि, चिठ्ठीया चे जरिये तम्हानु ङरावणे आला ना बणती जाये। 10कांकि कोच्छ लौक तां किही कि, “ओचीया चिठ्ठीया तां कठिन ते असरदार छी, ते जिसे बेले ओ आप आवे तां ओचे शरीर कमजोर लाग़े ते ओची ब़ोलणे ची ताकत ना चे बराबर छै।” 11ऐवास्ते जको इसड़े किहे कि, वे हा याद राखो कि, जिंवे अम्ही दूर रेहती कर चिठ्ठीया मां जको बाता लिखु, यूंही तम्चे सामणे अम्ची कामे वी हुवे।

पौलुस चे अधिकार चीया हद्दा

12कांकि अम्ची हा हिम्मत कोनी कि अम्ही आपणे आप नु वांचे लारे तुलना करु, जको आपणी तारीफ करी, आपणे आप नु आपस मां नापती तोलती कर मूर्ख बणती जई।

13अम्ही तां हद्दी चे ब़ाहर घमण्ड कङी वी ना करु, पर वे हद्दी तक जको नरीकारा ने ठहराती ङिली ओचे मां ही घमण्ड करु ते ओचे मां तम्ही वी आती गेले। 14अम्ही आपणी हद्दी मां रेहती कर तम्चे उपर घमण्ड करु, कांकि मसीह चा सुसमाचार सुणाते हुले तम्चे तक सबकनु पेहले अम्ही पुज़ती गेले हुते। 15ते अम्ही हद्दी चे ब़ाहरु नेरा ची मेहनती पर घमण्ड ना करु। पर अम्हानु आस छै कि जिंवे-जिंवे तम्चा विश्‍वास बधता जई यूं-यूं अम्ही आपणी हद्दी चे अनुसार तम्ची वजह कनु होर वी बधते जऊं, 16ताकि अम्ही तम्ची हद्दी कनु आग़ु बधती कर सुसमाचार सुणाऊं। ते हा कोनी कि, अम्ही नेरा चा हद्दा मां जती कर बणले बणाले कामा उपर घमण्ड करु। 17कि जिंवे पवित्रशास्त्र मां लिखले पले, “जको घमण्ड करो, ऊं प्रभु उपर घमण्ड करो।” 18कांकि जको आपणी बढ़ाई खौद्द करे, वा ना मनीजी, पर जाई बढ़ाई प्रभु करे, वा ही ग्रहण करली जई।

Currently Selected:

2 कुरिन्थियां 10: ODR

Highlight

Copy

Compare