2 कुरिन्थियां 8
8
अम्चा दान
1 #
रोमि 15:26
हमा हे माये भऊ, अम्ही तम्हानु नरीकारा चे ओ अनुग्रह चा समाचार ङिऊं पले, जको मकिदुनिया चीया कलीसिया चे उपर हुले। 2कि क्लेश ची बङी परीक्षा मां वांची बङी खुशी, ते भारी कंगाली मां हेक हुती कर वांची उदारता ब़ोहत बधती गेली। 3ते वांचे बारे मां माई हा ग़वाही छै, कि वाणे आपणी ताकती चे अनुसार यानिकि ताकती कनु वी ब़ाहर दिला लारे दान ङिला। 4ऐ दाना मां ते नरीकारा चे लौक जको यहूदिया प्रदेस मां छी वांची सेवा मां भईवाल हुवणे चे अनुग्रह चे बारे मां अम्चे कनु बार-बार ब़ोहत विनती करली। 5ते जिसड़ी अम्ही आस करली हुती, वाणे ओकनु बढ़ती कर करले। सबकनु पेहले प्रभु वास्ते, बल्ति नरीकारा ची इच्छा लारे अम्चे वास्ते, आपणे आप नु समर्पित करती ङिले।
6ऐवास्ते अम्ही तीतुस नु समझाले, कि जिंवे ओणे दान चे काम ची शुरु मां करने सहायता करली हुती, यूंही तम्चे बीच मां ओ काम पूरा करने मां सहायता करो। 7पर जिंवे हर बाते मां यानिकि विश्वास, वचन, ज्ञान ते हर-तरहा ची कोशिस मां, ते ओ प्रेम मां, जको अम्चे लारे राखा, बधते जावा पले, यूहीं ऐ दान चे कामा मां वी बधते जावा।
8मैं तम्हानु कुई आज्ञा कोनी ङिये पला, मैं सेर्फ वां लौका चे लगाव नु बावड़ती कर, तम्चे प्रेम ची सच्चाई नु परखे पला। 9कांकि तम्ही अम्चे प्रभु ईशु मसीह चा अनुग्रह जाणा वी, कि ओ धनवान हुती कर वी तम्चे वास्ते कंगाल बणती गेला ताकि ओचे कंगाल हुती जाणे लारे तम्ही धन्नी हुती जावा।
10इठे मैं आपणा विचार किहे पला, जाये मां तम्ची भलाई छै। पिछले साल तम्ही दान ङेणे मां आग़ु रेहले, ते दान ङेणे ची इच्छा मां वी तम्ही आग़ु हुते। 11ऐवास्ते हमा ईं काम पुरे करा, कि जिंवे करती इच्छा करने मां तम्ही तियार हुते, उसड़े ही आपणी-आपणी पूंजी चे अनुसार पुरे वी करा। 12कांकि अगर मना ची तियारी हो, तां दान ओचे अनुसार ग्रहण वी हुवे, जको ओचे कनु छै, ना कि ओचे अनुसार जको ओचे कनु कोनी।
13ईं ना हो कि नेरा नु चैन ते तम्हानु नु कष्ट मिलो, पर बराबर हो। 14अम्ची हा इच्छा छै कि ऐ समय तम्ची बढ़ती वांची घटी मां काम आओ, कि वांची बढ़ती वी तम्ची घटी मां काम आओ, कि बराबरी हुती जाओ। 15जिसड़े कि पवित्रशास्त्रा मां लिखले पले,
“जेह्णे घणी मात्रा मां भेले करले, ओणे कोच्छ वी ज्यादा कोनी गेहले,
ते जेह्णे कम भेले करले ओणे कुई कमी चा अहसास कोनी करला।”
तीतुस ते ओचे साथी
16नरीकारा चा धन्यवाद हो, जेह्णे तम्चे वास्ते वाहो उमंग तीतुस चे मना मां नाखती ङिली जको अम्चे मना छै। 17कि ओणे अम्चे समझाणे मनती कर ना, बल्कि ब़ोहत उत्साहित हुती कर ओ आपणी इच्छा लारे तम्चे गोढु गेला। 18ते अम्ही ओचे लारे ओ भावां नु भेज़ले जाये ना सुसमाचार चे बारे मां सारीया कलीसिया मां सुनाम छै। 19ते इतने ही कोनी, पर ओ कलीसिया चे जरिये ठहराला वी गेला कि ये दान चे कामा वास्ते अम्चे लारे जाओ ते अम्ही हा सेवा ऐवास्ते करु, कि प्रभु ची महिमा ते अम्चे मना ची तियारी प्रकट हुती जाओ।
20अम्ही ये बाते मां चौकस रिहुं कि हा बङा धन्न, जाया अम्ही प्रबन्ध करु पले, कुई अम्चे उपर आंगली ना चाओ। 21कांकि जको बाता सेर्फ प्रभु ची नजरी मां ना, पर इन्साना ची नजरी मां वी भलीया छी, अम्ही ओची फिक्र करु।
22ते अम्ही ओचे लारे आपणे भावां नु भेज़ले, जानु अम्ही हर-वारी परखती कर घणीया बाता मां सच्चे ङेखले। पर हमा तम्चे उपर ओनु बङा भरोसा छै, ये वजह कनु ओ होर वी ज्यादा उत्साहित छै। 23अगर कुई तीतुस चे बारे मां पूछे, तां ओ माया साथी छै, ते तम्चे वास्ते माया भईवाल छै, ते अगर अम्चे भावां चे बारे मां पूछे, ते वे कलीसिया चे भेज़ले हुले ते मसीह ची महिमा छी। 24ऐवास्ते आपणा प्रेम ते अम्चा घमण्ड जको तम्चे बारे मां छै कलीसिया चे सामणे वानु सेद्ध करती ङिखाणा।
Currently Selected:
2 कुरिन्थियां 8: ODR
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0
