1 यूहन्ना 2
2
ईशु अम्चा मददगार
1हे माये ब़ाले, मैं ये बाता तम्हानु ऐवास्ते लिखे पला कि तम्ही पाप ना करा, ते अगर कुई पाप करे, तां नरीकारा कनु अम्चा हेक सहायक छै, यानिकि धर्मी ईशु मसीह, 2ते ओही अम्चे पापा चे वास्ते बलिदान हुला, ते सेर्फ अम्चे ही कोनी बल्कि सारे संसार चे पापा चे वास्ते वी। 3अगर अम्ही नरीकारा चीया आज्ञा नु मनु, तां ऐचे कनु अम्ही जाणती गिहुं कि अम्ही नरीकारा नु जाणती गेले। 4जको कुई ईं किहे, “मैं नरीकारा नु जाणती गेला” ते ओचे आज्ञा नु ना मनी, ते ऊं बन्दे कूड़े छै, ते ओचे दिला मां सच्चाई कोनी, 5पर जको कुई ओचे वचना उपर चले, ओचे मां सच्चमां नरीकारा चा प्रेम सेद्ध हुला। ऐचे कनु अम्ही जाणु कि अम्ही ओचे मां छिऊं। 6जको हा किहे कि मैं नरीकारा मां बणला रिहे, ओनु ईशु मसीह चे समान जीवन जीणा चाही छै।
नवीं आज्ञा
7 #
यूह 13:34
हे प्यारे, मैं तम्हानु कुई नवीं आज्ञा ना लिखी, पर वाही पुराणी आज्ञा जको शुरु कनु तम्हानु मिड़ली। हा वाहो पुराणी आज्ञा छै जको तम्ही सुणती चुकले। 8बल्ति वी मैं नवीं आज्ञा लिखे पला, ते हा ओचे मां ते तम्चे मां सच्ची ठहरे, कांकि अन्धकार मिटता जाये पला, ते सच्चाई चे सोज़ले हमा चमकु लाग़ती गेले। 9ते जको कुई हा ई किहे कि मैं सोज़ले मां छै, ते आपणे भावां लारे बैर राखे, ओ हमा तक अन्धकार मां ही छै। 10जको कुई आपणे भावां लारे प्रेम राखे ऊं सोज़ले मां टुरे, ओचे जीवन मां इसड़ी कुई गलती कोनी जाकनु कुई ठोकर खा सग़े। 11पर जको कुई आपणे भावां लारे बैर राखे ऊं अन्धकार मां छै, ते अन्धकारा मां टुरे, ते ना जाणी कि मैं किठे जई, कांकि अन्धकारा ने ओचीया आंखीया अन्धीया करती नाखलीया।
12हे ब़ाले, मैं तम्हानु ऐवास्ते लिखे पला कि ईशु मसीह चे नांवा लारे तम्चे पाप माफ हुले। 13हे ब़ाला आले, मैं तम्हानु ऐवास्ते लिखे पला जको शुरु कनु छै, तम्ही ओनु जाणा। हे जवानु, मैं तम्हानु ऐवास्ते लिखे पला कि तम्ही ओ दुष्टा उपर जय पाली। हे माई प्यारी ब़ाले, मैं तम्हानु ऐवास्ते लिखे पला कि तम्ही ब़ा नरीकारा नु जाणती गेले। 14हे ब़ाला आले, मैं तम्हानु ऐवास्ते लिखले कि जको शुरु कनु छै तम्ही ओनु जाणती गेले। हे जवानु, मैं तम्हानु ऐवास्ते लिखले कि तम्ही ताकतवार छिवा, नरीकारा चे वचना उपर तम्ही हमेशा ध्यान ङिला, ते तम्ही ओ दुष्टा उपर जय पाली।
संसारा लारे प्रेम ना करा
15तम्ही ना तां संसारा लारे ते ना संसारा चीया चीजा लारे प्रेम राखा। अगर कुई संसारा लारे प्रेम राखे, तां ओचे मां ब़ा नरीकारा चा प्रेम कोनी। 16कांकि जको कुई संसारा मां छै, यानिकि शरीरा ची इच्छा ते आंखीया लारे ङेखती कर ओनु पाणे ची मना मां इच्छा ते जीविका चे घमण्ड, ओ ब़ा नरीकारा ची ओर कनु कोनी पर संसार ची ओर कनु छै। 17संसार ते ओचीया बुरीया इच्छा ङोनी मिटते जई पले, पर जको कुई नरीकारा ची इच्छा उपर टुरे ऊं सदा बणले रिही।
मसीह चे विरोधी
18हे जवानु, हा आखरी समय छै, ते जिसड़े तम्ही सुणले कि मसीह चा विरोधी आणे आला छै, ओचे अनुसार हमा वी ब़ोहत सारे मसीह-विरोधी उठती खड़े हुले छी, ऐचे कनु अम्ही जाणु कि हा आखरी समय छै। 19तां मसीह चे विरोधी अम्चे महु निकली, पर अम्चे जिसड़े हुते कोनी, कांकि अगर वे सच्चमां अम्चे लारे हुवीया तां, अम्चे लारे रिहा, पर निकलती ऐवास्ते गेले कि हा प्रकट हो कि वे सच्चमां सारे अम्चे कोनी।
20पर तम्चा तां ओ नरीकारा चे जरिये पवित्र आत्मा लारे अभिषेक करवाला, ऐवास्ते तम्ही सारी सच्चाई नु जाणा, 21मैं तम्हानु ऐवास्ते कोनी लिखले कि तम्ही सच्चाई नु ना जाणते, तम्ही सच्चाई नु जाणा, ते हा वी जाणा कि जिठे सच्चाई छै ओठे कूड़ कोनी। 22पर जको कुई किही कि ईशु नरीकारा चे तरफु कनु अभिषेक करला आला संसारा नु बचावणे वास्ते कोनी आला, ओ कूड़ा छै, ते इसड़ी बन्दी मसीह चे विरोधी छी, पर जको ङुहुं चा ब़ा ते पूता चा इन्कार करे। 23जको कुई पूता चा इन्कार करे ओचे गोढु ब़ा वी कोनी। जको पूता नु मनती गिहे, ओचे गोढु ब़ा वी छै।
24जको बात तम्ही शुरु कनु सुणली, वा तम्चे मां हुवणी चाही छै, अगर वा तम्चे मां हुवी, तां तम्ही वी पूता मां ते ब़ा मां बणले रिहा, 25ते ईशु मसीह ने खौद्द अम्हानु अनन्त जीवन ङेणे चे वास्ते वायदा करला।
26मैं ये बाता तम्हानु वांचे बारे मां लिखलीया, जको तम्हानु भरमावी। 27पर तम्चा ओ अभिषेक जको पवित्र आत्मा ची ओर कनु करला गेला, तम्चे मां बणला रिहे, ते तम्हानु ऐची जरुरत कोनी कि कुई तम्हानु सिखाओ, बल्कि जिंवे ओ अभिषेक जको पवित्र आत्मा ची ओर कनु करला गेला तम्हानु सारीया बाता सिखावे, ते हा सच्चा छै ते कूड़ा कोनी, ते जिसड़े ओणे तम्हानु सिखाले यूंही तम्ही ईशु मसीह मां बणले रिहा।
नरीकारा ची ब़ाले
28हे माई प्यारी ब़ाले, ईशु मां बणले रिहा कि जिसे बेले ओ प्रकट हो, तां अम्हानु हिम्मत हो। ते अम्ही ओचे आणे उपर ओचे सामणे आणे कनु शर्माऊं ना। 29अगर तम्ही जाणा, कि ईशु धर्मी छै, तां ईं वी जाणा कि जको कुई धर्म चे काम करे, वे ओकनु जमले।
Currently Selected:
1 यूहन्ना 2: ODR
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0
