Titusi 3
3
Yikara yoghukriste
1Vurukithe hanu ghudhundeka eshi, ha kone kutawa kwawakuru no kumuragho, ha kone kukara ghutawedhi no ha kwinduke mu kutawa yoyihe yoyihunga. 2Awo ha pire ghughandhi kwaghumweya no ha pire marwanamvo. Ha kone kukara hanongo, gho ha ghayare kehe pano kwawahe.
3Pakutanga twa karire twathuta natwe, twathururu, twa pemukire, twa karire twapika hoyirumbera yonyara-nyara, munyinya twa parire munya, ha tu dhimbire no twa kudhimbire. 4Ene munyima ho weyire ghuhunga waNyambi ghoMushuturi wetu, noruhakitho rwendi rwa hokokire kwawanu. 5Aye gha tu shuturire, ene kadi payitenda yetu yoyihunga, ne pamurandu ghothin̂eke thendi thinda. Eyi gha yitenderire yi, pamushamurukero ghoghuwadi ghomakushwero ghomaharwero, no paMupepo ghoKupongoka yu gha tapa moyo ghoghupya. 6Nyambi gha mu tapathanithire Mupepo ghoKupongoka, pakumutushuruthera paJesus Kristusi ghoMushuturi wetu. 7Kemo dyo twapwa kuhungeka pan̂eke dhendi no gha tu yaritha moyo ghororuheya oghu twa taterera.
8Edhi no ne n̂ando dhoghushemwa. Yodigho na kuhima me eshi, ghu kone kudhundeka thikuma pakunongonona yinu yino. Eshi awa ha piruka kwaNyambi, ha kone kukon̂omeka muyitenda yoyiwa no yomudyo yokwawanu. 9Ene wa kupaka muman̂anani ghawathuta no mumarukwaro ghomashimurukero no muyita, no mun̂anani dhokumuragho, yoyishi, eyi ne yapira mudyo no yafwe‐fwere. 10Noyu wa koghaghura paruwadi, ngambi yu ghana kureta shime makutavaghaneno, mbadi wa kona kukwata ko. 11Yoyi wa dimuka eshi munu ghokemo, gha pemuka mundhira. Pamaharwero ghendi ghana kukutetera thinda ndhango.
Yirughana yimweya nomarumeritho
12Apa na kukutumena Atermasi ngambi Tigikusi, wa kuyereke kwiya kuno kukwange muNikopolisi. Yoyishi na himi kuna kara ko muthivaka thokufu. 13Tokomene thirughana thoye thokwaSenasi ghomukamuragho, naApolosi eshi, ghu wa ghamwene muruyendo rwawo rokughutho, ho koneke thiwana eshi mbadi ha kona kupira thinu. 14Mu honge karo hayendhetu ha kare nawo muyirughana yoyiwa, no ha wa ghamwene oku hadi muyinyanda yawo yoshemwa. Munyima yipara yawo, po mbo yikara mughuyeghave.
15Waheya wa hadi nange kuno hana kutumena dirumeritho. Tape karo dirumeritho dyetu kwawayendhetu mumatawero.
N̂eke dhi kare nenu mwahe!
Currently Selected:
Titusi 3: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
