Filemoni 1
1
Mbapira dhokwaFilemoni
1Edhi dhina kutunda kwaPaghulusi, mukan̂otwa pamurandu waKristus Jesusi, namuyendhetu Timoteghusi.
KwaFilemoni, ghomuyendhetu nomurughani pofotji netu, 2no kwan̂amba dhetu Afiya naArgipusi, ghomukayita muyendhetu no kwawambungakriste awa ha kongananga kehe pano mundhugho dhoye.
3N̂eke nothiraro thaNyambi Wihetu naHekudyetu Jesus Kristusi thi kare nenu!
Ruhakitho rwaFilemoni nomatawero ghendi
4Roruhe apa na raperanga, na kuvurukanga we no kutumera Nyambi. 5Yoyishi ame, kuyuva na kuyuva ruhakitho nomakurupero ghoye ghokwaFumu, agha ghuna kunegha kwawatawi wahe. 6Ndapero dhange ne dhino eshi, mbunga edhi twa wana pamatawero ghetu, mbo dhi kupe ghudhungi ghoghudimuka ghoyinu yoyihe yoyiwa, eyi twa kona kutenda kwaKristusi. 7Ruhakitho roye rwa reta yishamberera yoyikuru nomatjokedhero. Yoyishi, owe muyendhange, yowe wa tanaritha mitjima dhawatawi.
Paghulusi ghana kughamwena Onesimusi
8Yodigho, ngambi kenge na kara mwaKristusi nongcamu dhodhihe eshi, ni kuneghedhe yirughana eyi wa kona kurughana, 9na kukukanderera pamurandu ghoruhakitho. Ethi no tho na kutenda me Paghulusi ghokukurupara nomukan̂otwa muDina dyaKristus Jesusi. 10Ame kukanderera na kumukanderera pamwanange Onesimusi. Muno mun̂otwa mo na kara nowihe mumudhimu. 11Pakutanga, mbadi gha karire mudyo, pan̂anyi‐n̂anyi ne ghana kara mudyo kukoye no kukwange.
12Ame ne kutuma na kumukutumena ni mu kuhuthere, nomutjima wange ghoghuheya ghu yende nendi. 13Yoyishi, kukwange pithange, ngo na mu pungura kukwange, gha ni karere oku me shime mun̂otwa pamurandu ghombudhi dhodhiwa. 14Ene mbadi na kuhima kuyitenda oku mbadi ghuna ni tawedhera we. Yoyishi maghana sho yikare yirughana yoye yira yamuthineneko. Eyi no ne kumahimeno ghoye ghothinda. 15Ngwa yo ya mu tundithire Onesimusi kukoye karuvedheghana eshi mbo gha kare ghoye roruhe. 16Pan̂anyi‐n̂anyi, kadi shime yira mupika ene gha piterera thikuma mupika, ghomuyendhetu ghomuhakwa. Aye ne yomuhakwa ghokupiterera kukwange, ngepi keho mbo gha piterera thikuma kukoye yira munu nomuyendha mwaFumu.
17Yodigho, ngeshi ho ni mono we yira nomuyendha mumatawero, mu tambure naye yira yame ghuna kutambura. 18No ngeshi ghuyi gha kutenda endi mukudi gha kudyera, yipake pambapira dhange dhomukudi. 19Apa no, yame Paghulusi na kuyitjanga nonyara dhange nothinda eshi:
“Mbo na yiruwera.”
Ame mbadi na nyanda kukuvurukitha eshi yowe dye ho ghu pire matumero ghokukwange.
20Kemo minange muDina dyaFumu ni ghamwene muyinu yino. Shambererithe mutjima wange yira mina mwaKristusi. 21Ame na kurupera pakukutjangera eshi n̂anyi wa kutende, eyi na kwipura. Karo na dimuka eshi mbo ghuna yitendi ghothinda kupiterera yi. 22Ni roghithere karo ndhugho dhange. Yoyi na kurupera eshi mumandapero ghenu mbo ghana ni hutha karo Nyambi kukwenu.
Marumeritho nofiyaghudhi
23Epafrasi muyendhange oyu twa kara nendi mun̂otwa, pamurandu waKristus Jesusi, naye ghana kutumena dirumeritho. 24Kemo karo nawarughani hayendhange haMarkusi, Arisitagusi, Demasi naLukasi, nawo hana kutumena dirumeritho.
25N̂eke dhaFumu Jesus Kristusi dhi kare nenu!
Currently Selected:
Filemoni 1: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
