Titusi 1
1
Mbapira kwaTitusi
1Edhi dhina kutunda kwaPaghulusi ghomukareri waNyambi, nomupostoli waKristus Jesusi. Ame na tambura thirughana thokutwara awa gha torora Nyambi kumatawero, no kuwadimukitha ghushemwa. Ghushemwa ghu, ghokutwara kughukareri waNyambi, 2no kutapa makurupero ghokumoyo ghororuheya. Nyambi yi gha ghamba n̂ando dhendi dhoghushemwa, gha tu toyedhera kare moyo ghororuheya. 3Pano gha dhi hokora panako dhokurikanya edhi na yuvitha muyiyaghura. Ethi ne thothirughana thange thi gha nipa Nyambi wetu ghoMushuturi.
4KwaTitusi ghomwanange ghomuhakwa, mumatawero gha twa nongonona twahe.
N̂eke nothiraro thaNyambi no thaKristus Jesusi ghoMushuturi wetu thi kare noye.
Thirughana thaTitusi muKreta
5Eyi na kuthigherire muKreta, noyihima yino eshi, ghuroghithe yoyiheya yi yathighara ko no yende ku kehe mbara, ghu ka pake mo hakungi hombunga thika di na yi kurawera. 6Mukungi gha kare katughuru ghoyikara mwene. Gha tjimape kwamukamadi wendi. Hanendi ha kare hatawi no mbadi ha kona kuwana dina dyoyipara yodishawana, no kadi wa kwiman̂anyena muragho. 7Mukungi ne muyendithi ghoyikara yomundhugho dhaNyambi. Yodigho, aye mbadi gha kona kukara munu ghothidakwi, endi mukamarwanamvo ngambi mushani ghoshosho dhodhiyi. 8Aye gha kone kukara mundambo wawagenda no mukakuhima yoyihunga, gha kare munu ghomaghano, muhungami, gha pongoke no gha kwate mutjima wendi. 9Aye gha tanare kuman̂ando ghomakurupero, agha ha mu honga. Munyima po mbo gha kona naye kutjokedha hamweya kuyihonga yoghushemwa no kukanunutha n̂anani dhawakan̂ore.
10Padi hengi, thikuma ne pakatji kawapiruki awa ha shwagha mudiko dyaWajuda, awa heman̂anyena muragho nawa ha ghambanga yinu yokupira mudyo no kupemukitha hanu. 11Tunwa twawo tupwe kuvuka. Awo ha reta thivunganyi pamadhiko ghomahe, payihonga yawo yombango, mukupira honyi eshi ha wanene po manyinga. 12Yofotji ghopapawo muporofeta wawo hathinda gha ningire eshi: “Hakreta ne hakambango, hayishereka no hava.” 13Ghushupi ghuno ne wa ghushemwa. Yodigho, wa kona kuwathundawedha thikuma, eshi nawo ha kone kuwana matawero ghoshemwa. 14Awo ha kone kuthigha ndani mbango dhaWajuda nomiragho dhawanu wa ha pemuka ghushemwa. 15Kwawakushuki ne yoyiheya yakushuka. Ene kwawashinyi nawakakupira matawero, mbadi ya kushuka. Yoyishi makurembwerero ghawo ne gha shinyiha. 16Karo ha kununeka eshi ha dimuka Nyambi, ene ha mu kanana muyitenda yawo. Awo ne hayi kadi wa kuyuva, no mbadi ha kona kutenda yoyiwa.
Currently Selected:
Titusi 1: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
