2 Timoteghusi 4
4
1Ame na kukurawera kughutho waNyambi no kughutho waKristus Jesusi eshi, wa mba pangura hayumi nohafu. Ame kurawera na kukurawera nothitambo tho hufumu wendi. 2Yuvithe n̂ando dhi, no dhikon̂wetwedhe roruhe no kehe pano: Neghedhe ghumbango wawo. Wa shinge no wa tjokedhe, pakuwahonga noghudhughutjima. 3Yoyishi mbo dhi neya nako, edhi mba dhira kuthotera hanu kuyihonga yoghushemwa. Awo mbana kuthu yirumbera yawo no mbo hana kukongwedhera hahongi awa mba ghamba yi ha hima wo. 4Awo mbadi mbo ha tegherera kughushemwa, shimengwa kuyinu yonyara‐nyara ndani. 5Ene we, turumuke muyoyihe. Nyande kenge yo. Tende thirughana thoye yira muyuvithi ghombudhi. No kumithe mo yirughana yoye yoyihe yomuyikarera. 6Yira kukwange po me ne, kare napwa kuyamba noyinwa. Yoyishi, nako dhange dhokutunda pano ne dhina kokera. 7Ame ne na rwa yita yoyiwa. Ho na kumu kughuhura. No na kara nomatawero thiwana kate kukuma mo. 8Apa no me, thikoroni thoghuwithi tha ni taterera. Thikoroni thoghuhunga. Mudiyuwa dyomwiyero wendi karo, po mbo gha thi nipa Fumu, ghoMupanguri ghomuhunga. Ene kadi pithange mbo gha thitapera no kwawamweya karo, awa ha kara nodirura dyomwiyero wendi.
Man̂ando ghendi thinda
9Ngo yereke kwiyerera wangu kuno kukwange, 10yoyishi Demasi gha haka kaye kopashadyarero ho gha ni mwagha no gha dhirukera kuTesalonika. Kresensi yene kuGalasiye, Titusi ne kuDalmasiye. 11Shimengwa Lukasi yo ghadi nange. Yende ghu kashimbe Markusi mu keye pofotji nendi. Yoyishi, aye gha kona kunighamwena thikuma muyirughana yange yoyikuru. 12Tigikusi ne, kuEfesusi na mu tuma. 13Ngeshi wa kwiye, wa kona kunipitwera mwaye wannge ghoruyendo oghu na ka thighire kwaKarpusi muToroghasi nomarukwaro thikuma ne ghoyikumba.
14Aleksanderi, mufuri ghongoporo, ghana ni tendire ghuyi thikuma. Fumu ngo gha mu thigherere koyi gha tendire. 15Nowe karo, ka mu koneke thiwana. Yoyishi, aye ne gha kenyapera thikuma yiyaghura yetu. 16Apa na kughamwenine nothinda rokutanga mundhango, noyofotji temba yu gha ni thoterire. Waheya ha yi ni topererire. Nyambi ngo gha kone kuyiwathigherera! 17Ene Fumu ghani thoterire no ghani pire ngcamu, eshi ni kone kuyaritha yiyaghura yange mughuhunga nohahayidena, ha kone kuyiyuva wahe. Ame na pwire kughamwena mukanwa konyime. 18Naye Fumu mbo ghana ni ghamwena mu kehe dihudhi no mbo ghana ni pungura mughutungi wendi ghomudiwiru. Kukwendi difumanekero kate kuroruheya! Amen.
Dirumeritho dyoghuhura.
19Rumerithe Priska naAkwila nawakadidhiko dyaOnesiforusi. 20Erastusi ne nga ka thighara kuKorinte, Trofimusi na mu thighire muyikorwa muMilete. 21Tambukerere kwiya oku mbadi ghana tanga kufu. Eghubulusi naPudensi, naKlaghudiya nawayendhoye wahe, hana kutumena dirumeritho. Fumu mbo gha kare noye.
22Neke mbo dhi kare nenu!
Currently Selected:
2 Timoteghusi 4: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
