Hakaroma 3

Ndhango dhaNyambi ne kadi pofotji noghuhunga waWajuda

1Thinu munye thothikuru thoGhujuda. No mudyo munye ghomaken̂eno? 2Shemwa, yingi yopamihingo dhodhingi dhokukutjaka‐tjaka. Thinu thothikuru ne thino, Nyambi gha tapire man̂ando ghendi kwaWajuda. 3Ene ngepi ne sho yi kare ngeshi kadi wa kudhidhimeka hamweya? No kupira madhi‐dhimikero ghawo ne, mbo ghana huritha makurupero ghaNyambi ndi? 4Mbokapwe. Ya kara po eshi, Nyambi ne mukaghushemwa na kehe munu ne mukambango, thika di ha yitjanga eshi:

“Owe ne ghomuhunga ngeshi ku ghuna kupangura

no ghuna kuwitha ngeshi ku hana kuhetera thinu.”

5Yitenda yetu yoyiyi, yadimukitha eshi Nyambi ne muhunga. Yinye keho sho tu ghambe? Ame na kughayara thika di ha ghayara hanu kehe pano. Kenge keho ne kadi muyi yu Nyambi ngeshi ha tu humbitha ndi? 6Kadi kemo. Ngo ngepi sho gha kone Nyambi kutetera kaye mwamo‐namo?

7Ene ngeshi mbango dhange dha shwaghitha ghushemwa waNyambi kumunyenge, no kukarera difumanekero dyaNyambi, pashanye karo ghokunipangwera yira nothiharuru? 8Eyi ne kuna kuninga nane eshi: Mu thighe tutende ghuyi. Yoyishi mo mbo ghushwagha ghushemwa? Po hadi hanu hamweya awa ha tu pakanga man̂ando ghomayi mutunwa twetu. Ene wo hana kuwana yitetera yawo popayitenda yawo.

Mbadiko yu gha kara muhunga

9Pashanye ya karera kemo? Atwe tudi Twajuda ne twa piterera hamweya ndi? No kamanana temba. Yoyi twa kuneghedha kare eshi, Mujuda ngambi kadi Mujuda, wahe ha kara mungcamu dhodiharwero. 10Yapwa kutjanga eshi:

“Mbadiko yu ghomuhunga, noyofotji temba,

11mbadiko mukamaghano,

noyofotji temba yu ghana kushana mahimeno ghaNyambi.

12“Waheya ha yongara,

waheya ha tenda ghuyi.

Mbadiko yu ghokutenda ghuhunga,

noyofotji temba.

13“Midyu dhawo ne mbira dhothiyahi,

nomarudimi ghawo ha tenda mbango.

Pamiromo dhawo kushwagha po man̂ando

ghomahungu yira yiyoka,

14tunwa twawo twa yara yikuto no ghuhatu.

15“Mapadhi ghawo maredhu kukunotora manyinga.

16Awo ha thigha munyima dhomuro maharan̂anyeno no yinyanda.

17Ndhira dhothiraro mbadi ha dhidimuka,

18Awo ha pira woma ghokwaNyambi.”

19Twa yidimuka twahe: Yoyiheya yi wa ghamba muragho. Agho wa ghamba kwawa ha ghudimuka. Noyofotji temba yu gha kona kumushinga, no kaye kokahe kakara mumahumbithero kughutho waNyambi. 20Yodigho, mbadiko munu yu mbo gha kara mughuhunga kughutho waNyambi pamuragho. Karo kemo munu gha kuhonga pamuragho eshi nye diharwero.

Nyambi gha komonona munu

21Ene pano ghuhunga ghu gha tapa Nyambi gha ghu hokora, ne kadi pathina muragho. Eyi ne ya ghu nongonona muragho nawaporofeta. 22Oghu ne ghoghuhunga ghopamatawero mwaJesus Kristusi. Ghuhunga ghu gha tapa Nyambi kwawatawi wahe. Eyi ne yapira makutjakero. 23Yoyishi wahe ha harurire, no mbadi ha yerana kughufumu waNyambi oghu gha turekerire munu. 24Ene wo hana kuwana thin̂eke nyara‐nyara mughuhunga pamakomweneno ghaKristus Jesusi. 25Aye gha mu tapire Nyambi eshi gha kare muyambo pamanyinga ghendi, agha gha shemwithanithire hakakutawa. No muyinu yino, po gha neghedhire Nyambi eshi Aye ne mukaghuhunga. Yino ya kona kukara kemo, yoyishi Aye mbadi gha mwashurire wangu maharwero mughudhughutjima wendi. 26Aye gha mu tapire Nyambi gha kare muyambo. Karo paPendi gha ne ghedhire munako dhodho eshi Aye ne muhunga. Papendi yarikanya yoghuhunga wendi no gha tetera ghuhunga kwakeheyu ghokutawa mwaJesusi.

27Twa kara nothinu ethi sho tu kufumanekithe thwathinda ndi? Mbadiko, thapwa kuyandhera. Pumaragho munye thapwera kuyandhera? Ghopayirughana ndi? Kadi kemo, ghopamatawero. 28Yighayara yetu, kehe munu ngo gha hungame mumatawero, kadi pakukoneka muragho. 29Endi Nyambi ne Nyambi waWajuda keho, kadi ghomarudhi ghawahayidena karo? Shemwa no marudhi ghawahayidena nawo wawo karo. 30Yoyishi, Nyambi yofotji gha kara po keho. Aye mbo ghana hungeka hakakupwa kuken̂a pamatawero, no hakaghupumuru mumatawero ghofotji. 31Tu tundithe twe muragho pamatawero ndi? Mbokapwe, mbadi kemo. Tu thighe muragho ghukare mughuhunga wagho.

Currently Selected:

Hakaroma 3: MHW1986

Highlight

Copy