Hakaroma 2
2
Ghuhunga ghoyipangura yaNyambi
1Yodigho kukoye ghomunu mbadiko mathigherero. Koye we munu ghokutetera ndhango hamweya, ghu kare yowe dye ngambi yowe thinye. Pakutetera ndhango ghumweya, dimuke vene ghothinda eshi yowe ghuna kukutetera ndhango. Yoyishi owe mukakutetera ndhango, nowe ghothinda yo wa tenda yoyo. 2Twa dimuka natwe shemwa, Nyambi gha tetera paghuhunga kwawanu wa ha tenda kemo. 3Ene munu we, owe ghuna kutetera ndhango hayendhoye wa hana kutenda kemo, oku nowe pakuyitenda ghothinda. Ghuna kughayara eshi we ne, mbo ghuna shwagha mundhango dhaNyambi dhishokuru ndi?
4Nyambi ne mutungi mughunongo, mumathigherero no mughudhughutjima! Eyi ne mbadi yina kukukwata kumutjima ndi? Endi mbadi ghuna kudimuka eshi Nyambi ne gha haka kukutwara kumapirukero paghunongo wendi? 5Ene paghukukutu ghoye nomutjima ghoye ghokudhira kupiruka. Po ghuna kukukongwedhera mahumbithero ghothinda, mudiyuwa dyoghughandhi apa mbo gha tetera Nyambi thinda ndhango dhendi dhoghuhunga. 6Aye mbo ghana ruwera kehe yu popayitenda yendi. 7Makughero kwawa ha kara muyirughana yoyiwa ghudhidhimeka. Dikuto no kushana ghuyumi, Aye ne kuwapa moyo ghororuheya. 8Ene kwawa ha karire ghuthururu no kupira ghutawedhi, kate wa tawire ghushemwa kughuyi, mbo ghana wa humbitha mughupata wendi. 9Aye ghana kureta kunyanda noyikudhekera mumoyo wakehe yu ghana kutenda ghuyi. Pakutangerera ne Mujuda, ene ngambi yu gha dhira kukara Mujuda. 10Makughero no dikuto no thiraro, gha yi tapa Ye kwakehe yu ghana kutenda ghuhunga. Pakutangerera ne Mujuda, ene ngambi yu gha dhira kukara Mujuda. 11Nyambi ne mbadiko yu gha torora kughutho.
Yikara yomumuragho, mbadi yina kukupiritha mahumbithero
12Waheya wa haharurire oku mbadiko muragho, mbana yongara karo oku mbadiko muragho. No wahe wa haharurire momuragho, kukwawo mbana wa tetera ndhango karo nomuragho. 13Ene kadi hakakuyuva muragho wo hahunga pithawo kwaNyambi, ene wa ha rughanitha muragho wo mbo ha wa hungeka. 14Ngeshi ha tendi hahayidena wa ha pira muragho, yinu yi wa hima muragho, ya rikanya kukwawo eshi muragho, ngambi kenge ha pira muragho. 15Yirughana yawanu ho kemo, yina kunegha yihima yomuragho mumitjima dhawo mu ha yitjanga. Karo maywi ghawo ghomakurembwerero gho ghana kuyinongonona. Ngeshi mbadiko makunungero muyighayara yokuheta, endi yomathigherero. 16Eyi ne mbo yina kumu mudiyuwa di mbo gha tetera ndhango Nyambi hanu paKristus Jesusi, kuyinu yokunda pofotji nombudhi dhodhiwa edhi na yuvithire.
Hajuda no muragho
17Owe ghuna kuninga eshi we ne, ghoMujuda, owe wa kutapa kumuragho. Wa kununeka po eshi, Nyambi ne Nyambi ghoye. 18Wa dimuka mahimeno ghendi no wa yakunutha yinu oku ya tamba. Yoyishi wapwa kuhonga pamuragho. 19Owe wa dimuka thiwana eshi yowe mukamiti wawakunga nomunyenge wawa hadi mudikokore. 20Yowe muhongi wawathuta. Mitiri wawakakudhira kudimuka thinu. Yoyishi muragho, wa kara kukoye mafupipithero ghoyidimuka noghushemwa — 21owe ne pakuhonga ghumweya, ghuna kuhonganga ghothinda ndi? Owe ghuna kughambanga eshi, munu ne kadi wa kwidha, mbadi ghu nedhanga we ndi? 22Owe wa ghamba eshi, munu ne kadi wa kutjora ghurugho, owe ne mbadi wa tjora ghurugho? Owe wa dhimba hanyambi hombango, mbadi wa kungura thinu mumatembeli ghawo ndi? 23Owe wa kupupanitha pamuragho, mbadi wa shamunanga Nyambi pakuregha muragho wendi ndi? 24Shemwa thika di yapwa kutjanga eshi: “Payikara yenu, dyapwa kushamuna Dina dyaNyambi kwawahayidena.”
Maken̂eno ghothinda vene ne mbadi thinu
25Maken̂eno gha kara thinu, ngeshi ha ghu koneka muragho. Ene ngeshi ha ghu reghanga muragho roruhe, maken̂eno ghana kuhukera kughupumuru. 26Ngeshi ha koneka muragho yu gha dhira kupwa kuken̂a. Mbadi mbo gha toya Nyambi ghupumuru wendi eshi maken̂eno. 27Shemwa, ngeshi yu gha kara nothidimukitho thoghupumuru, ha koneka muragho. Mbo ghuna kutetera ndhango ghothinda we wa regha muragho no maken̂eno, no wa regha miragho dhodhihe. 28Kadi yodiye Mujuda oyu gha kara noyinu yokumona no kadi ghomaken̂eno ghokumona, agha ghahokoka payirama. 29Mbadi kemo, aye ne Mujuda ghokudhira kumona no ghomaken̂eno agha ghawatenda Mupepo mumitjima. Ene mbadi pathina muragho. Munu ghokemo, ghana kuwana makughero kwaNyambi mbadi ghokwawanu.
Currently Selected:
Hakaroma 2: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
