Hakaroma 4

Thitamenedhi thaAbrahamu

1Nye sho tu ghambe twe ne, yokwakerekandongo wetu Abrahamu? 2Ngeshi Abrahamu gha wanine ghuhunga payitenda yendi, opo gha wanine shemwa thinu thokumufumanekitha. Ene mbadi kwaNyambi. 3Nye ya ghamba yitjanga? “Abrahamu gha tawire mwaNyambi. Nyambi naye gha mu rikanyithire kughuhunga.” 4Ndjambi dhamurughani, mbadi ha mu pera mufuma, ene payitenda yendi. 5Ene munu yu ghokudhira kukurupera makonekero ghomuragho, ghokutawa mumwendi yu gha hungeka hakakudhira kutawa mwaNyambi, kukwendi gha mu hungamitha matawero ghendi. 6Kemo gha ghambire naye Davita eshi, mukafiyaghudhi munu yu gha hungeka Nyambi pakudhira kukoneka muragho:

7“Hakaruvigha hanu wa ha pira mahumbithero,

pamaharwero ghawo nawa ha thigherera maharwero ghawo.

8Mukaruvigha munu yu, gha dhira kuvuruka thinda

Nyambi maharwero ghendi.”

9Agha matetero ghokwawakafiyaghudhi ne, pofotji no ghawakakudhira kuken̂a ndi? Endi kwawakaghupumuru? Atwe kuna kuninga karo eshi: “Nyambi gha tapire matawero kwaAbrahamu, gha mu hungamithe.” 10Nako munye gha yi mu pire? Apa gha pwire kuken̂a ndi, endi ku shime gha karera ghupumuru. 11Aye gha wanine maken̂eno yira thidimukitho. Ethi ne thothidimukitho thokuneghedha eshi, shemwa Nyambi gha mu hungekire yoyishi gha tawire, oku ye no kumuken̂a temba. Thitambo thendi thino eshi, mbo gha kare wiha wawakakutawa, ngambi wa ha dhira kupwa kuken̂a. Yodigho, ghuhunga mbana ghu‐wawana pamatawero ghawo. 12Wihetu Abrahamu, mbo ghana kara wiha wawa hapwa kuken̂a, ene kadi kuken̂a keho no kutawa karo. Thika di gha tawire ye kughutho ghokumuken̂a.

Maturekero kughawana pamatawero

13Mbadi yoyi gha konekire Abrahamu muragho eshi ko gha karire maturekero kukwendi no kwawanahoka wendi, ghokuyora, kaye, kadi kemo yoyi gha muhungamitha matawero ghendi. 14Ngo hanu wa ha tatererire kumaturekero, pamakonekero ghomuragho. Ngo mbadiko ghushemwa ghomatawero nongcamu dhomaturekero. 15Muragho wa reta shemwa mahumbithero ghaNyambi. Yoyishi kehe ku kwapira muragho, kwapira karo maneghedhero ghomuragho.

16Yodigho, maturekero ghopamatawero, gha tunda muthin̂eke kate pa gheyire Abrahamu eshi, mbo yirikanye kwawanahoka wendi wahe. No hanahoka wendi mbadi ha karire nomuragho pithagko keho, ne nawa ha tawire thika di gha tawire Abrahamu. Aye ne yowihetu twaheya. 17Thika di ha yitjanga eshi: “Ame na kutendi wiha ghomarudhi ghomahe.” Oku ye kughutho ghorupara rwaNyambi, oyu gha tawire mumwendi. Nyambi yu gha tumuna hafu noyinu yi yadhira kukara po, ghana kuyipaka po pan̂ando dhendi. 18Apa papirire makurupero, Abrahamu ye ne gha tawire no gha kurupererire shime. No kemo dyo gha karire wiha ghomarudhi ghomengi, thika di ha yi mu turekerire eshi: “Dyo mbo ha kara hanahoka ghoye.” 19Matawero ghendi mbadi gha kasha. Ngambi kenge gha dimukire eshi ye ne mukuru‐kuru. Yoyishi gha karire nomyaka dhokukuma kudithere dyofotji — naSara gha kuruparire naye kate gha dhirire kureta hana. 20Aye mbadi gha tamangerire kumaturekero ghaNyambi. Ene gha tanarire mumatawero ghendi, no gha tapire difumanekero kwaNyambi. 21Aye gha dimukire karo thiwana eshi, Nyambi gha kara nongcamu dhokutenda thi gha tureka. 22Eyi ne yo gha mu hungamekithire. 23Ngeshi kuninga eshi, kukwendi pithendi ha tapire ghuhunga, ngo mbadi papendi pithendi ha yitjanga. 24Ene nomudina dyetu twahe karo gha kuyirikanyithera. Atwe twa tawa mwaNyambi yu gha tumunine Jesusi ghoHekudyetu mwawafu. 25Aye ha mu tapire pamurandu ghomaharwero ghetu. No ha mu tumunine eshi tu kone kuhungama.

Currently Selected:

Hakaroma 4: MHW1986

Highlight

Copy