Hakaroma 15
15
Thitamenedhi thaKristusi
1Papetu twe twa tanara mumatawero, po gha turumuthera marawero, ghokushimba ghukashu wawa ha dhira kutanara. Ene mbadi twa kona kukughayarera twathinda vene. 2Yomuhe ghopapetu, gha ghayare kwamuyendhendi, eyi ya mu roghera noyi ya tanaritha matawero ghendi. 3Kristusi naye mbadi gha kughayarire thinda keho. No hamweya gha ghayarire. Kukwendi ya karire thika di ha yitjanga eshi:
“Mashamweno ghawa hana kushamuna,
papange ghana wera.”
4Yoyiheya yi ya karire muYitjanga pakare‐kare, yatwe ha yitjangerire kukutuhonga. Eshi, pamadhidhimekero nomatjokedhero, tu kare nomakurupero ghokuyara. 5Ngo gha mupe Nyambi ghodivetu‐vetu dyomadhidhimekero nomatjokedhero ghoyoyihe eshi mukupakerere pofotji. Thika di gha yihima Kristusi. 6Po sho mu kone kukupakerera kanwa kofotji ghukugha Nyambi, Wiha Hekudyetu Jesus Kristusi.
Mbudhi dhodhiwa ne dhawahe
7Mukutamburethane ne keho. Thika di gha mu tamburire namwe Kristusi, kudifumanekero dyaNyambi. 8Eyi na kuninga ne yino. Kristusi gheyire pamurandu waWajuda, na gha kare mupika. Aye gha kone kuwayarithera ghushemwa waNyambi. Pamaturekero agha ha tamburire hakerekandongo wetu pakare. 9Aye gheyire karo eshi, marudhi ghamweya, gha fumaneke Nyambi kuthin̂eke thendi, thika di ha yitjanga eshi:
“Yo sho ni kukughere kughutho ghomarudhi,
no padikuto dyoDina dyoye,
na kukwimbera dimbo dyomakughero dyomupisalemi.”
10No shime ha ningi eshi:
“Mushamberere, mwamarudhi ghamweya,
pofotji nodiko dyendi.”
11Karo eshi:
“Mu kughe Fumu, mwamarudhi mwahe!
Mu mushogherere, mwamako mwahe!”
12Jesaya naye kuninga ghana kuninga eshi:
“Isayi, mbo ghana wana hanahoka,
no mbo gha nemana gha rawere marudhi.
Marudhi mbo ghana kurupera papendi.”
13Mu ninge Nyambi ghodivetu‐vetu, dyomakurupero, gha mu yarithe pamatawero ghenu noyishamberera yoyihe nothiraro. Kemo sho gha tanare thikuma matawero ghenu pangcamu dhaMupepo ghoKupongoka.
Thirughana thoghutumi waPaghulusi
14Mwayendhange, name nothinda na dimuka thiwana eshi, namwe mwa yara noyinu yoyihe yoyiwa, no mwa kara nomaghano ghomengi. Eshi mu kone kukughamwena mwathinda mundhira dhodhiwa. 15Karo muyipindhi yimweya yomumbapira dhange, na gha mbire mo pakutanga. Eyi ne ya karire mamuvurukithero ghoyimweya. Nyambi gha nipire mun̂eke dhendi ngcamu. 16Eshi ni rughane thirughana thaKristus Jesusi, mukatji kawahayidena. Ethi no ne thothirughana thange thoghupristeri thokuyuvitha mbudhi dhaNyambi kukwawo. Kemo sho mu shwaghe thitapa thomuyambo, ethi sho gha menya‐menyene Nyambi no thi thapwa kupongokitha kwaMupepo ghoKupongoka. 17Na kukukugha mwaKristus Jesusi koyi na tenda, muyirughana yaNyambi. 18Mbadi na kona kuyereka kughamba kuthinu thatho‐natho. Shi mengwa koyi gha paka Kristusi parudimi rwange, mukudhira kutenda hahayidena ghuthururu kwaNyambi. Eyi gha yitendire papange pan̂ando no payitenda. 19Pangcamu dhoyidimukitha noyitenda, pangcamu dhaMupepo waNyambi. Kemo na konine me kutunderera kuJerusalema kate kuIllirikumu, ni tware thirughana thange thokuyuvitha mbudhi. No kudhirughanitha shemwa. 20Kemo dyo na pakire mo fuma dhange. Ni yuvithe oku ha dhirire kuyuva hanu yaKristusi eshi, ni dhire kushokekera pakashemandhugho kaghumweya. 21Ene thika di ha yitjanga eshi:
“Oyu ghokudhira kuthimwetwedha yokukwendi,
mbo ghana mono,
noyu gha dhirire kumuyuva mbo ghana tjwathana.”
Dighanao dyaPaghulusi dyokudhingura Roma
22Eyi ne yo ya ni ghowithanga rwingi, pakudhira kwiya kukwenu. 23Keho, pan̂anyi‐n̂anyi, mbadi na wana shime dyango muthiko thino edi sho ni rughanene. Na rura myaka dhodhingi eshi, niye kukwenu. 24Apa na kuyenda kuSipanye, na ghayara eshi, mbo na na mupiti ni mu dhingure. Na himi shemwa kukukara nenu karo kanakoghana. Munyima ndani po mbo ni rundurura ruyendo rwange kuSipanye, nomaghamweno ghenu. 25Pano nidi, kuJerusalema na tamba tango pakutanga, nomaghamweno ghomanyinga ghawatawi. 26Mambunga ghomuMasedoniya naAgaye, gha ghayarire thiwana mukutapa yinu kwawahepwe, homukatji kawatawi hoMujerusalema. 27Hathinda ha yi ningire. Karo nomurandu wawo. Yoyishi, ngeshi hatawi hokutunda mwaWajuda, hana kukutapera ghutungi wawo ghokupongoka nawahayidena. Ha kara nawo hatawi hokutunda mwawahayidena, no murandu kwawatawi hokutunda mwaWajuda, pakuwaghamwena nothinu thopamuve. 28Ngeshi na kurikanye nomanyinga gha ha kongwedhire, na kawapa thiwana. No mbo na na mu piti pakuyenda kuSipanye. 29Ame na dimuka eshi, ngeshi mbo niye kukwenu, mbo neya nomakandadhekero ghokuyara ghaKristusi.
30Mwayendhange, ame na kumutokomena muDina dyaHekudyetu Jesus Kristusi. No paruhakitho ru rwa tunda kwaMupepo ghoKupongoka. Eshi mu kanane pofotji nange, pa kuniraperera. 31Mukuninga eshi, Nyambi gha kone kunikunga thiwana, mukatji kawakakudhira kutawa hoMujudeya, no maghamweno ghange gha kone kutambura hatawi homuJerusalema. 32No ngeshi mahimeno ghaNyambi gha, mbo na shamberera thikuma. Apa na kwiya kukwenu pa kuna turumutherako kanakoghana. 33Nyambi yu gha tapa thiraro, gha kare nenu roruheya! Amen.
Currently Selected:
Hakaroma 15: MHW1986
Highlight
Share
Compare
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
