Hakaroma 16
16
Marumeritho ghendi
1Ame kuna kumurawera n̂amba dhetu Febe, oyu gha rughana mumbunga dhomuKengeriye kukwenu. 2Eshi mu mutambure thika hanu wa ha tawa mwaFumu. Kenge di yawaroghera. Gho mu mughamwene muthinu thothihe omu gha nyanda maghamweno. Yoyishi, gha karire wawengi, no mughamweni wange karo.
3Dirumeritho kwaPriska naAkwila. Awa ha rughana nange mwaKristus Jesusi. 4Awa ha yerekire kwimanena moyo dhawo kukwange. Ene mbadi yame pithange keho na kumutumera. Nomambunga ghomahe ghawahayidena nawo. Dirumeritho karo kumbunga, edhi dhina kukongwedhanga pofotji mundhugho dhadho. 5Dirumeritho dyange diyende shime kwamushere‐wange ghomuhakwa Epenetusi. Mupiruki ghokutanga muthiko thaAsiya. 6No kwaMaria oyu gha mu twamenine thikuma. 7Mu tape dirumeritho dyange, kwaAndronikusi naJuniyasi. Hapange wa na karire nawo mun̂otwa. Hapwire kukutekera kwawapostoli no ha karire hakriste kughutho wange.
8Karo na kutuma dirumeritho dyange kwaApiliyatusi, ghomuhakwa wange mwaFumu. 9KwaUrbanusi, ghomurughani nange mwaKristusi namushere wange Stagisi. 10No kwaApelesi — oyu gha neghedhire maghukukutu ghomatawero ghendi — nawakaAristobulusi. 11KwaHerodiyoni ghomwapange nawakadidhiko dyaNarsisusi awa ha tawire nawo. 12Dirumeritho karo kwaTrifena naTrifosa. Harughani hohakuru kwaFumu, awo ne hakamadi wa ha rughanena thikuma Fumu, no kwamuhakwa wange Persisi, oyu gha rughanena thikuma Fumu. 13Mu tape karo dirumeritho dyange kwaRufusi, mutoghoropi muthirughana thaFumu no kwanyina oyu gha karire nawe name roruhe. 14Harumere karo haAsinkritusi, Felegoni, Hermesi, Patrobasi, Hermani nawayendhawo wahe. 15
16Mukurumerithe nomacumitero ghoghukriste. Mbunga dhodhihe dhaKristusi dhina mu tumena dirumeritho.
Mahurero ghoyirughana yendi
17Mwayendhange, eyi, mumitjima dhenu na kuyidhundeka eshi mu koneke thikuma kwawa hana kuyakunutha no kupemukitha hanu kuyihonga yi mwa wana. Mu yakunuke kukwawo. 18Hanu hokenge yo mbadi ha karera Kristusi ghoHekudyetu. Ene wo ha tokomena yirumbera yawo nodirura dyawo. No hana kupemukitha hakamatawero ghomawa, payihongaghura yawo. 19Waheya ha yuva yoghutawedhi wenu ghokumbudhi dhodhiwa. Na shamberera thikuma kukwenu. Ho na haka shemwa kumona eshi, mwa dimuka yoyiwa no mbadi na himi kudimuka yoyimango. 20Nyambi mukakutapa thiraro ne mbo ghana thaghurura Shatani wangu kwishi dhomapadhi ghenu.
N̂eke dhaHekudyetu Jesusi, dhi kare nenu!
21Murughani nange Timoteghusi, ghana mu tumena dirumeritho naLusighusi naye karo kemo, Jasoni, naSosipateri hakadiko dyange.
22Ame Teritighusi yu ghana tjanga mbapira dhino, ghomutawi muyendhenu, na mu tumena dirumeritho.
23Gayusi ghomugenda wange no mugenda ghombunga dhodhihe dhomuno, naye ghana murumeritha. Dirumeritho karo shime dyaErastusi, ghomupunguri‐manyinga ghombara no dyamuyendhange Kwartusi.
Makughero
25Nyambi gha kara nongcamu dhokumutanaritha, thika di na yuvitha mbudhi dhodhiwa dhaJesus Kristusi pofotji noyihokora yothithithatero. Pakare‐kare, ya karire mughudhindo. 26Ene pan̂anyi‐n̂anyi ne yina hokoka. Payitjanga yawapumbi no pamarawero ghaNyambi ghomukaroruheya yapwa kudimukitha kumarudhi ghomahe. Eshi ha kone kutawa mwaNyambi no kukara ghutawedhi kukwendi.
27Kukwendi pithendi Nyambi ghomukakudimuka yoyihe, difumanekero paJesus Kristusi kate kuroruheya! Amen.
Currently Selected:
Hakaroma 16: MHW1986
Highlight
Share
Compare
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
